Т.Аюурсайхан шүүхийн өмнө том байна. Дөрвөн өмгөөлөгчтэй шүүх хуралдаанд орж дээр нь мэдүүлэг, тайлбар өгөхийнхөө өмнө нь “Би хууль тогтоох дээд байгуулагад ажиллаж байсан” хэмээн пээдэлзэж, шүүхийн өмнө том, зоригтой дуугарч байгаа харагдана. Түүнд зоригтой дуугарах шалтгаан байгаа нь тодорхой. Энэ том хэргийн бүх хариуцлагыг гишүүдээс ганцаараа, улстөрчдөөс багаараа даагаад гарч чадахгүй гэдгээ тэр намынхаа журамт нөхдүүдэд, ах нартаа санууллаа, анхаарууллаа.

      УИХ-ын гишүүний бүрэн эрхээсээ чөлөөлөгдөж, сайдын суудлаас буухдаа ч тэр ингэж заналтай, хонзонтой, ууртай байгаагүй. Өөрийгөө журмын нөхдөө хамгаалж үлдэх хамгийн боломжит хувилбар нь уг нь сайдын суудал, гишүүний бүрэн эрх байсан. Тэр чуулганы танхимд нүүрсний хулгайтай холбоотой асуудлаар ганц үг ган хийхгүй байсаар бүрэн эрхээсээ буусан. Мэдээж хаалттай чуулганы хуралдаан дээр нүүрсний гол асуудлаа ярьсан нь тодорхой. Түүнийг нүүрсний хулгайч хэмээн зарлаж байхад ч тэр ингэж чанга дуугарч байсангүй. Харин шүүх хуралдааны урьдчилан хэлэлцүүлэг дээр тэр дөрвөн өмгөөлөгчтэй, өөртэйгээ нийлээд тавуулаа нүүрсний хулгай бол хэлмэгдүүлэлт гээд удаа дараа мэдэгдчихлээ.

УИХ-ын гишүүний бүрэн эрхээсээ чөлөөлөгдөж, сайдын суудлаас буухдаа ч тэр ингэж заналтай, хонзонтой, ууртай байгаагүй. Өөрийгөө журмын нөхдөө хамгаалж үлдэх хамгийн боломжит хувилбар нь уг нь сайдын суудал, гишүүний бүрэн эрх байсан. 

        Нүүрсний хулайн хэрэгт холбогдогчид Б.Ганхуяг гэхэд л “Энэ хэрэгт Т.Аюурсайханыг шалгаж байгаа бол 76-уулаа шалгуулах ёстой. Тойрч суугаад шалгуулцгаая” гэх утгатай зүйлсийг ч өмнөх шүүх хуралдаан дээр ярьсан. Өөрөөр хэлбэл, нүүрсний хэргийн хамгийн том холбогдогчид нь тэд. Гэхдээ тэд мөн хамгийн том гэрч нь болж байгаа нь ч үнэн.

         Тиймээс ч хэлсэн үг, тайлбар болгон нь одоогийн улстөрчдийн бодит байдлыг илчлэхэд эсвэл нүүрсний хэргийн холбогдогч нар руу чиглэгдэж байгаа нь илэрхий байна. УИХ-ын гишүүн асан Т.Аюурсайхан “Шүүх хурлын урьдчилсан хэлэлцүүлэгт оролцоод би олон зүйлийг гайхаж байна. Монгол Улсын хууль шүүхэд ийм зүйл урьд өмнө нь болж байсан үгүйг мэдэхгүй. Гэхдээ айхтар хэлмэгдүүлэлт болж байна.  Эрүүгийн хэргийн 2.3 гэдэг бол хүнд гэмт хэрэг. Энд хэд хэдэн хүнийг багтааж, ялд унагааж байна. Ийм хэрэгт яллагдагчаар татан шалгахад бодитой, үнэн зөв нотлох баримт хэрэгтэй. Нотлох баримтгүй намайг яллагдагчаар татагдсан. Би үүнээс болж, УИХ-ын гишүүн, Засгийн газрын сайдаас чөлөөлөгдсөн” гэсэн.

       Тэр өөрийгөө зүгээр ч нэг улс төрийн хэлмэгдүүлэлтэд өртчихлөө гэж хэлээгүй нь тодорхой. Нэг ёсондоо УИХ-ын гишүүний бүрэн эрхээсээ түдгэлзэхдээ “Энэ хэргийн хариуцлагыг ганцаараа хүлээхгүй. Араасаа олон гишүүн дагуулна” гэж хэлсэний гол агуулга энд явж байгаа нь илт байна. Өөрөөр хэлбэл, намынхаа гишүүдэд ганцхан надаар туг тахих гэвэл надад хөзөр бий гэдгээ энэ мэдүүлгээрээ шуудхан л хэлчихлээ.

     Тун удахгүй УИХ дээр нүүрсний сонсгол болно. Үүнээс урьтаж, шүүхийн урьдчилсан хэлэлцүүлэг дээр Т.Аюурсайхан өөрийнхөө цаад санаа зорилгыг хэлж, анхууруулж, цаашлаад намынхаа журамт нөхдөд гомдож байгаагаа ийн анхааруулав. Өөрөөр хэлбэл, ямар ч хэрэг хийгээгүй хүнээс нэг ийм зоригтой үг гарна. Бүүр эсвэл яахаас ч буцахгүй зоригтой хүн ийм алхам хийнэ.

        Түүнчлэн тэрбээр “Би эх орон ард түмнийхээ төлөө болохгүй бүтэхгүй асуудлуудтай тэмцсэн. Дэлгэхийг нь дэлгэсэн. Олон хүний эрх ашгийг хөндсөн. Ингэж хөнгөн хумгай хандаж болохгүй. Би зургаан жил хууль тогтоогчоор ажилласан. Бидний батласан хууль тогтоомжийг гүйцэтгэгчид ингэж замхруулж байгааг харах харамсалтай байна. Миний холбогдоод байгаа хэрэг дээр МАН-ын “Шинэчлэл хөгжлийн хороо”-г гэмт бүлэглэлийг төлөөлүүлэн ойлгуулж байгааг би эсэргүүцэж байна. Энэ хорооны зорилго Улсын бүртгэлд тодорхой байгаа. Гэтэл энэ хороо 2016, 2017 оноос хойш үйл ажиллагаа явуулаагүй. Монгол Улсад жилд хэдэн авлига, албан тушаалын хэрэг шалгагдаж байна вэ, хэд нь шүүхээр шийтгэгдэж байгаа вэ. Бодитоор тушаал шийдвэр гаргаж, тамга тэмдгээ дарчихсан, гарын үсгээ зурчихсан, гэмт хэрэгт холбогдсон байхад нөхцөл боломжийг нь бүрдүүлсэн гэж шалгадаггүй юм бэ” хэмээсэн.

       Тэр ах намынхандаа, журамт нөхддөө энэ хэрэг дээр хуумгай хандвал надад хэлэх зүйл байгаа гэдгээ ч мөн санууллаа. “Шударга тав” бүлэглэлд нэгдэж, эрх мэдэлд хүрхийн төлөөх тэмцэл хэрхэн өрнөсөн, одоогийн эрх баригчдтай ямар замаар өгсөж гарч ирсэн гэдгийг улс төрд үүрлэсэн булхай, хууль тогтоомжийн цоорхойг тэр бүгдийг нь мэдэж байгаа гэдгээ ч мөн энэ үеэр сануулсан нь энэ бололтой.  Түүний энэ мэдүүлэг, тайлбар, өөрийгөө хамгаалж хэлсэн үг болгон тодорхой хэмжээнд одоогийн Засгийн газар, эрх баригчид руу чиглэж байгаа нь илэрхий байна. Тиймээс хөшигний ард нуугдсан улстөрчдийг бүгдийг нь ил болгоно гэх мессежийг сүүлийн үед өгөх боллоо.

     Өчигдөр гэхэд л Б.Ганхуяг “Миний 40 тэрбумын хэрэг яах вэ, цаана нь байгаа 40 их наядын хэргийг яах вэ” хэмээн шүүхийн өмнө томорч харагдсан. Нүүрсний хулгайн хэргийг Т.Аюурсайхан, Б.Ганхуяг тэдний хамаарал бүхий 11 хүн дангаараа хүлээхгүй, ард нь нуугдсан улс төрийн ашиг сонирхолыг тэр чигт нь  ил гаргана гэдгээ тэд ийн ээлж дараалан сануулж, ах намынхнаа айлгаж байна.