Ардчилсан нам даргатай болох тохирооны хариугаа ирэх намар биелүүлнэ. Өнгөрсөн гурван жилийн хугацаанд хоёр дарга, хоёр тамгатай болсон тэд сүүлд Улсын дээд шүүхэд намын даргаар Л.Гантөмөрийг бүртгүүлснээр тамга, тэмдгийн маргаанаа эцэслэсэн. Одоо тэдэнд Үндэсний бодлогийн хороогоо хуралдуулж, намын генсекээ тодруулах, намын дүрмээ шинэчлэх том ажил үлдсэн. Ардчилсан нам ҮБХ-ны хуралдаанаа энэ сарын 28-нд хуралдуулахаар товлоод байгаа.

      ҮБХ-ны хурлаар тус хорооны гишүүдийг шинээр сонгон батламжлах, Дээд шүүхэд бүртгэгдсэн дүрмийнхээ хүрээнд намын дотоод бүтэц, зохион байгуулалтыг өөрчлөх, ҮБХ-ны шинэ бүтцийг танилцуулах зэрэг асуудлыг хэлэлцээр урьдчилан төлөвлөжээ. Мөн АН-ын даргын санал болгосноор тус намын дэд даргыг томилох, Ардчилсан намын бүх шатны сонгуульт гишүүний татварын хэмжээг тогтоох, Улс төрийн зөвлөлийн гишүүдийг томилох тухай асуудлуудыг хэлэлцэхээр болсноо мэдэгдсэн. Намын генсект өрсөлдөх улстөрчдийн нэрс ч эхнээсээ олны дунд яваад эхэлсэн харагдана лээ.

      Тэр дундаа Сангийн сайд асан С.Баярцогтыг намын генсект хүч үзнэ гэх бор шувуу ч нисгээд эхэлсэн. Тэрбээр өнгөрсөн удаад намын даргын сунгаад өрсөлдөж байсан удаатай. Энэ талаараа тэрбээр “Сүүлийн 2.5 жил АН дотроо маргаантай байсан. Намыг итгэмжлэн төлөөлөх субъект байхгүй, хоёр талдаа ҮБХ гаргаж, удаан хугацаанд явж байна. Тиймээс гишүүд төөрөлдөж байгаа учраас намыг нэгдсэн үйл ажиллагаатай болгохыг хүсэж байна. Түүнээс хэн нэгэн хүний дор байхыг хүсэхгүй” хэмээж байсан.

        Намын тамга, тэмдэгийг нэг тийш болоход түүний оролцоо чамгүй их байсан гэх нь  ч бий. Харин түүнийг МАН-тай тохиролцоонд хүрч АН-ыг удирдах уу гэх хардлага ч олны дунд байлаа.  Харин олны таамаг эсэргээрээ эргэж Л.Гантөмөр намын даргад сонгогдсноор “гал”-ыг түр намжаасан. Үнэн хэрэг дээрээ С.Баярцогт байна уу, Л.Гантөмөр байна уу аль аль нь намаа нэг нэртэй болгохын тулд яриа хэлэлцээр “ах” намынхантай хийсэн л байж таараа. Тэр тусмаа МАН хүчээ авч, АН шалдаа буусан энэ цаг үед сөрөг хүчнээ хөл дээр нь босгох онирхол МАН-ынханд яаж байх билээ. АН өмнөх шиг ээ хүчтэй болоод эхэлбэл нэр хүнд нь уначихсан байгаа энэ цаг үед унахад амархан болно гэсэн үг. Тэд АН-ыг чих зөөлөнтэй байх бүх тооцоолборыг хийчихсэн нь Үндсэн хуулийн өөрчлөлт зэргээс тодорхой харагдана лээ. Түүгээр ч зосгохгүй өнгөрсөн хугацаанд МАН-ын алдаан дээр АН дөрөөлж улстөржих боломж хангалттай байсан. Гэвч гишүүд нь амралт зугаалга хөөсөн шигээ анир чимээгүй сууцгааж байна.

Тиймээс Ардчилсан намыг өөрсдийн “хуруун үзүүрээр” хөдөлгөх санаа МАН-ынханд байж л байж таарна. Яах вэ энэ удаагийн АН-ын дараагийн генсект Х.Тэмүүжин, Ч.Өнөрбаяр, З.Нарантуяа нар өрсөлдөнө гэх.

     Тэд мөн л намын даргын сунгаанд хүч сорьж байсан АН-аас сүүлд арай нэр цэвэр үлдсэн цөөн хэдэн улстөрч юм уу даа. Ямартай ч энэ намар АН генсекээ тодруулснаар бүрэн бүтэн болж, сонгуулийн компанит ажилд орох бэлтгэл хангагдана гэсэн үг. Гэвч өнгөн дээрээ тэд эв зүйгээ олж,  үйл ажиллагаагаа явуулж байгаа мэт харагдавч үнэн хэрэг дээрээ хоорондын маргаан нь эцэслэгдээгүй л байгаа. Тэр нь ч энэ удаагийн ҮБХ-ны хурал намын генсекийн өрсөлдөөнөөс тодорхой болох биз. Ялангуяа АН-ын хууччуул тэр дундаа АН-ыг сүүлд хоёр талцуулахад хүргэсэн Х.Баттулга, С.Эрдэнэ нарын ойрын хүмүүс нэгэнтэйгээ нэгдэх сонирхол тун бага байгаа.

            Эцсийн дүндээ АН учраа олж, даргатай болоход МАН-ын дэмжлэгийг авсан нь ч нууц биш. Харин хэсэг хугацаанд олны анхаарлаас холдоод байсан АН энэ намар амь орж, орохдоо МАН-д хариугаа барих даалгавараа биелүүлнэ. Өөрөөр хэлбэл, намын лидерүүд нь хоорондоо талцалж, түүнийгээ дагаад намын залуу гишүүд нь ч шат шатандаа хэд хэдэн хуваагдчихсан. Ардчилсан нам гэх нэг малгай дор явж буй 200 гаруй гишүүн дэмжигч нар нь хэрхэх учраа олохгүй төөрөгдөл нь өнөөдрийг хүртэл гараагүй яваа нь нууц биш юм.

     Өнгөрсөн нэг сарын хугацаанд Л.Гантөмөр даргатай хэсэг гишүүд баруун бүсийн Эдийн засгийн чуулга уулзалтыг зохион байгуулж, хөдөө орон нутгаар уулзалт хийх зуураа намынхаа ерөнхий байр байдлыг танилцуулж яваа бол Бүлгийн гишүүд нийслэлд Сангийн тухай хуулийг хэлэлцүүлэх нэрээр намынхаа дэмжигч нарын ерөнхий байр байдлыг ажигласан шиг ээ ҮБХ-ны хуралдаа бэлдэцгээж байна.

   Улс төрийн 36 намын олонх нь МАН-ын халаасны нам гэх олны үг ортой. Тэд сонгуулиар үйл ажиллагаагаа идэвхжүүлж, иргэдийн саналыг хуваах зорилгоор дуучин, жүжигчин, олны танил гэгдэх хэнбугайг ч намаасаа нэр дэвшүүлж, олныг төөрөгдүүлж, сонгуулийн саналыг будилаантуулдаг бохир технологиор дээш өгссөөр байгаа. Тэгвэл улс төрийн сөрөг хүчин гэгдэж байсан АН ч тэдний араас орж, МАН-ын “халаасны нам” болоход тун ойрхон байна. Тэд өнгөрсөн хаврын чуулганаар Үндсэн хуулийн нэмэлт өөрчлөлтөд өөрийн саналаа тусгаж байгаа мэт харагдуулах нэг заалт оруулаад л Л.Оюун-Эрдэнийн бодлогыг хоёр гараа өргөөд дэмжсэн. Ирэх сонгуульд АН одоо байгаа суудлынхаа тоог хэдэн хүнээр нэмэгдүүлэх ч олонх болох нь битйги хэл сөрөг хүчний үүрэг гүйцэтгэх хэмжээний чадалтай болж гарч ирэхгүй ч байж мэдэх зам руугаа орчихлоо. Ардчилсан нам үндсэндээ ирэх сонгуульд МАН найруулсан улс төрийн тоглолтоор оролцох нь. Ардчилсан нам тэр чигтэй МАН-ын сонгуулийн штаб болох уу, үгүй юү гэдэг том босгон дээр тулаад ирчихлээ дээ.