-ҮЕРИЙН ДАЛАН БАРЬЖ, НОГООН ХӨГЖЛИЙГ БИЙ БОЛГОХ БАГААРАА ДЭМЖҮҮЛСЭН БАЯНЗҮРХЧҮҮДИЙН АМЛАЛТ БИЕЛЭЛЭЭ ОЛСОНГҮЙ-

      Баянзүрх дүүргээс сонгогдсон гишүүд энэ зун хийсэн ажил, хэлсэн үгний дүнг нэг сайн тавиуллаа даа. Одоо тэнд дахиад намайг сонгоод өгөөч гэж хэлэх нүүр лав үлдээгүй байх. Өөрөөр хэлбэл, Баянзүрхчүүд өнгөрсөн сар гаруй хугацаанд ээлж дараалан усанд урслаа даа. Хамгийн сүүлд хайран таван амийг үерийн ус авч одож, 200 гаруй өрх орох орон, оочих аягагүй болов. Уулнаас буусан уруйн үер хэдхэн минутын дотор л бүхэл бүтэн гурван хороог хуу хамаад аваад явчихдаг юм байна. “Хашаа хороо, байшин сав, эд хөрөнгө ч яах вэ амьд мэнд үлдсэн нь л их юм боллоо” гэж өөрийгөө тайвшруулахаас өөр аргагүйдэж байна, иргэд.

     Насаараа цуглуулсан хөрөнгө нь нүдэн дээр нь урсаад явчихыг харсан иргэдэд дээшээ тэнгэр хол доошоо газар хатуу гэгч л болж байна даа. Уг нь яг ийм л хүнд үед нь сонгуульд горилогчид, өмнө нь сонгогдсон гишүүд нь тойрогтоо очиж, газар дээр нь ажилладаг, ард түмний амьдралд дэм болдог баймаар байна. Өөрөөр хэлбэл, сонгуулийн үеэр иргэдтэй тэврэлдэж үнсэж, “Гэр нь хог шүүрдэж, аяга угаа гэвэл” түүнийг нь чих зөөлөнтэйгөөр гүйцэтгээд ч хамаагүй саналыг нь авчихаад гамшиг тохиолдсон энэ үед нь нүүрээ буруулаад зугтдаг хариуцлагагүй тогтолцоо манайд бий.

Одоогоос гурван жилийн өмнө МАН-ынхан “Хүчээ нэгтгэе” гэх уриан дор нэгдэж, УИХ-ын сонгуульд ялалт байгуулан 63-уулаа парламентад суусан. Тэр дундаа “Баянзүрхчүүдийг багаар нь дэмжье” хэмээн нэр бүхий таван гишүүн тус тойргоос олонхын саналаар гарч ирсэн билээ.

         2020 оны УИХ-ын ээлжит сонгуулиар УИХ-ын 22,23 дугаар тойрог буюу Баянзүрх дүүргээс МАН-ын таван гишүүн сонгогчдын олонхын санал авч, Их хурлын гишүүн болж байлаа. Тодруулбал, УИХ-ын гишүүн Б.Бат-Амгалан, Б.Саранчимэг, Ж.Чинбүрэн, Б.Энхбаяр, Х.Булгантуяа нар Баянзүрхчүүдийг төлөөлж Их хуралд суугаа.

САНСАРЫН УУЛЗВАРААС ДАМБАДАРЖАА ХҮРТЛЭХ ЗАМ БОЛОН ДАРЬ-ЭХ ШАД ХАД ЗЭРЭГ ГЭР ХОРООЛЛЫН ДУНДАХ ЗАМЫГ СТАНДАРТЫН ДАГУУ ӨРГӨТГӨЖ, ЯВГАН ХҮН, ДУГУЙН ЗАМ ҮЕРИЙН УС ЗАЙЛУУЛАЛ, ГЭРЭЛТҮҮЛГИЙГ ХЭСГИЙГ ХАМТАД НЬ ШИЙДНЭ ГЭСЭН ЯАСАН БЭ, ГИШҮҮДЭЭ

        Тэр дундаас УИХ-ын гишүүн Б.Саранчимэг 2016 оны УИХ-ын сонгуульд Баянзүрхчүүдээс дэмжлэг авч, УИХ-д долоон жил сууж байна. Тэрбээр 2020 оны ээлжит сонгуульд Баянзүрх дүүрэгт нэр дэвшихдээ “Би 2016 онд Баянзүрх дүүргийн дөрөв, тав, 13 дугаар хорооноос УИХ-ын сонгуульд иргэдийнхээ итгэлийг хүлээж сонгогдсон. Энэ хугацаанд Баянзүрх дүүргийн хөрөнгө оруулалтыг нэмэгдүүлэх, иргэдийн эрүүл аюулгүй орчныг хангах, хүүхэд залуусын боловсролд анхаарсан. Цаашид иргэдийн аюулгүй амьдрах орчинг хангахын тулд бид ногоон хөгжлийн бодлогыг дэмжих, хууль эрх зүйн орчинг бүрдүүлэхэд анхаарч ажиллана” гэх амлалтыг тойргийн гишүүддээ гурван жилийн өмнө өгч байлаа.

         Тэр байтугай УИХ-ын сонгуульд Баянзүрх дүүргээс нэр дэвшсэн дээрх нэр бүхий таван гишүүн сонгуулийн мөрийн хөтөлбөртөө Баянзүрх дүүрэгт хийх ажлын жагсаалалтыг ярайтал бичиж, дурайтал биччихсэн амлалт нь цагаан дээр хараар тэмдэглээстэй байна. Тодруулбал, тэдний амлалт дээр “Сансарын уулзвараас Дамбадаржаа хүртлэх зам болон Дарь-Эх шад хад зэрэг гэр хорооллын дундах замыг стандартын дагуу өргөтгөж, явган хүн, дугуйн зам үерийн ус зайлуулал, гэрэлтүүлгийг хэсгийг хамтад нь шийднэ” гээд амлалт өгчээ тэд одоогоос гурван жилийн өмнө.

       Өөрөөр хэлбэл, УИХ-ын гишүүдийн бүрэн эрхийн хугацаа жил гаруйхны дараа дуусаж, хийсэн ажил, амласан амлалтаа биелүүлэхэд төдий чинээ хугацаа үлдсэн энэ үед тэдний амлалт хэрэгжсэн үү, үгүй юү гэдгийг шалгах, шаардлага тавих хангалттай хугацаа үлдсэн гэсэн үг. Гэтэл УИХ-ын гишүүдийн хоосон амлалт, хийгээгүй ажил, хагас дутуу оромдсон хариуцлагагүй үйлдлүүдээс нь болоод таван зүрх зогсож, 200 гаруй гэр орноо усанд урсгав. Үндсэндээ хийсэн ажилд нь байгаль эх хэдийнэ дүн тавьчихлаа даа.

        Уг нь тэд өдийд хэлсэн дээ хүрдэг байсан бол ийм их хэмжээний хохирол амсахгүй байлаа Баянзүрхчүүд. Адаглаад амлалтандаа хүрэх боломжгүй ч зүрх сэтгэлтэй бол үерт автсан аль нэг айлын гэрийн эздийн сэтгэл санааг өргөх үг хэлээд, ялгадастай хутгалдсан хулдаас, тавилга, хувцас, ор хөнжлийг нь ч болтугай гаргалцаад зогсоод, сонгуулийн өмнө иргэдэ тойглодог шиг гүйж байсан бол өөр байх байв.

     Харамсалтай нь, тойргийн сонгогчдынхоо өмнө хэлэх үггүй, харах нүүргүй дээ хамраа ч зухуйлгахгүй нүүр буруулаад алга болчихжээ УИХ-ын гишүүд. Тэр байтугай УИХ-д Баянзүрх дүүргээс сонгогдсон гишүүдийн биелүүлээгүй амлалт дөрвөн хүний амийг авч, хэдэн зуун айлыг гамшигт унагалаа. Үнэхээр л тус тойрогт, тухайн хэсэгт үерийн усны далан нэн шаардлагатай байгааг мэдсэн нь мэдээгүй царайлж, төрд түмэн олныг төлөөлөх үүргээ гүйцэтгэж чадаагүй, хэлсэндээ хүрдэггүй гишүүдэд хариуцлага тооцож, эгүүлэн татая.