Л.Оюун-Эрдэнийн Засгийн газар ажлаа хүлээж авснаас хойш 200 хоног болжээ.

Өнгөрсөн 100 хоногийн тайлангаа Ерөнхий сайд хэвлэл мэдээллийн байгууллагуудыг цуглуулж, сэтгүүлчдэдээ уулзаж, танилцуулж байсан бол энэ удаад цахим хаягаараа график мэдээлэл болгон дамжуулаад л өнгөрлөө. Угтаа бол олны анхаарлаас холуур, аргацаасан байдалтай тайлан байв. Арга ч үгүй биз, сүүлийн 100 хоногт Засгийн газраас бодлого шийдвэрийн түвшинд олны анхааралд өртөхүйц, дорвитой арга хэмжээ авалгүй, цаг үеийн шийдвэрүүд гаргаад өнгөрсөн. Сайд дарга нар найр наадам хэссэн шиг ээ, энэ зуныг өнгөрөөчихсөн удаатай.

Тиймдээ ч Засгийн сайд нар “Бид өнгөрсөн 100 хоногийн хугацаанд өмнөх 100 хоногоосоо ахиулан ийм ажил хийж, ийм үр бүтээлтэй байлаа” гээд ам бардам хэлэх үг тэдэнд байсангүй. Ингээд л иргэдийн дунд бүдэг бадагхан 200 хоногийн тайлан гэх зурган мэдээллийг түгээв. Угтаа бол энэ мэдээллийг сонирхож харах нь хараад олонхын анхаарлаас холуур үлдэх тайлан байлаа.

Нэгдсэн мэдээллээс харахад өмнөх 100 хоногт эхлүүлсэн ажлаа үр дүнд хүргэх гэж үлдсэн 100 хоногт нь ажилласан гэх агуулгыг зураг мэдээлэлд багтаасан бололтой. Гэвч эндээс хангалттай үр дүн харагдсангүй гэж шүүмжлэх хүн цөөнгүй байна. Өнгөрсөн хугацаанд Засгийн газраас иргэдийн орлогыг хамгаалах бодитой арга хэмжээ авч, эдийн засгаа хөөрөгдөхгүй авч үлдсэн эсэх нь ч эргэзээтэй. Гэтэл “Нохойд барьдаг мод” гэгчээр мөнөөх л Засгийн хуралдаан болгон дээр барьж авч ярьдаг, гол сэдэв эдийн засгийг идэвхжүүлж, ажлын байрыг дэмжих 10 их наядын төлөвлөгөөгөө дурайтал гаргажээ.

Хэдий Засгийн газраас энэ хугацаанд авч хэрэгжүүлсэн чухал арга хэмжээ хэдий ч иргэдийн чихэнд улиг болтол нь ярьж, тайлбарласан байлтай. Тэгээд ч энэ зээл эзэндээ хүрч, ажлаа байраа хадгалсан уу гэдэг нь бодит байдал дээрээ ямар байгаа вэ гэдэг асуулт олны дунд эргэлзээтэй хэвээр байгаа. Засгийн газрын 200 хоногийн тайланд эдийн засгийг дэмжих зээл өнөөдрийн байдлаар 34 хувийн гүйцэтгэлтэй яваа бөгөөд нийт 3.4 их наядын зээл гаргасан байна. Ингэснээр нийт 54.5 мянган бизнес эрхлэгч энэ зээлийг авч, 225 мянган ажлын байрыг хамгаалсан хэмээн танилцуулжээ. Гэтэл бодит байдал дээрээ жинхэнэ ЖДҮ эрхлэгчид “Энэ зээлийг хүртэж чадаагүй, банкны шаардлага хэт өндөр учраас зээл авч чадахгүй байсаар санхүүжилт нь дууссан гэсэн” гээд ам уралдан ярьж байгаа.

Засгийн газар хэрэгжүүлсэн арга хэмжээгээ хөрсөн дээр бууж байгаа эсэхийг нь судалсан бол хоосон тоо гаргаж, зурагны ард нуугдахгүй байсан биз.

Ерөнхий сайд Л.Оюун-Эрдэнэ суудлаа хүлээж авах үеэрээ “Амны хаалтаа тайлж, ковидгүй зуныг угтана” гэх амлалт байв. Өнгөрсөн 200 хоногийн хугацаанд дотоодын халдвар өдөрт 2000 хол давж, нас баралт өдрийн 10-20 хүнээр нэмэгдэж байсан цаг бий. Харин Засгийн газрын тайланд бид үүнээс ч их хохирол амсах байсныг бууруулсан гэх судалгаа гаргасан байна.

Тодруулбал, нийт хүн амын 60 гаруй хувийг вакцинжуулаад байгаа тул халдвараас хамгаалах дундаж үр нөлөө нь 75-80 хувь, хүндэрсэн тохиолдолд нас баралтаас сэргийлэх магадлал 92 хувь гэж үзэж байгаа гэх тайлан гаргажээ. Ийн иргэдийн олонхыг дархлаажуулж, нийгэм, эдийн засгийн хэвийн горимд шилжихээр бүтэн хоёр жил хаалгаа барьсан аж ахуйн нэгжүүдийг шат дараатай нээж буй. Сайны хажуугаар саар гэгчээр Монгол Улсад коронавирусийн мутацлагдсан хувилбар буюу делтавирус бүртгэгдэж, иргэдийг түгшүүрт автуулсан хэвээр байна.

            Цар тахлын нөхцөл байдлаас шалтгаалж манай улсын эдийн засгийн үзүүлэлт -5.3 хувьтай гарсан. Харин Л.Оюун-Эрдэнийн Засгийн газар өнгөрсөн 200 хоногт эдийн засгийг сэргээхээр экспорт, импортын гол хэсэг болох Өмнөговь, Дорноговь аймгийг ногоон бүс хэмээгээд халдвар хамгааллын чанад дэглэм мөрдүүлсэн удаатай. Гэвч импортын гол хэсэг болсон Замын-Үүд боомтод ачаа бараа саатаж, авлига цэцэглэсэн муу мэдээ цар тахлын хүндхэн үед үүссэн байдаг. Үүнийг засаж сайжруулах ажлын хэсэг томилж, баривчлах ажиллагаа явуулсан удаатай.

Ийн өргөн хэрэглээний бараа бүтээгдэхүүний үнэ хил дээрээ эрс нэмэгдэж, иргэдийн нуруунд хүнд ачаа болоод буй. Түүгээр ч зогсохгүй дэлхийн зах зээлд газрын тосны үнэ нэмэгдэж, манайд сонгуулийн үеэр хүчээр барьж байсан шатахууны үнэ литр тутамдаа 600 төгрөгөөр эрс өсөв. Үүгээ мөн л Засгийн сайд нар бид хамгийн боломжит үнээр барьж байгаа хэмээн иргэдийн толгойг угааж, бодит байдалтай нийцэхээс аргагүйд хүргэв. Угтаа бол Засгийн газрын 200 хоногийн тайланд энэ талаар АИ-92 авто бензиний дотоодын зах зээл дээрх үнийн өсөлтийг хязгаарлах үүднээс онцгой албан татвараас чөлөөлсөн. Ингэхдээ вакцинжуулалт нийт хүн амын 60 хувьд хүртэл авто бензиний үнэ өсгөхгүй байх тохироо хийсэн. Өнгөрсөн нэг сарын дотор шатахуун 600 төгрөгөөр өсч, литр тутамдаа 1450 байснаа 2050 төгрөг болсон гэх тайлбарыг гаргажээ.

Ийн Л.Оюун-Эрдэнийн Засгийн газар 200 хоногт ямар байснаа тайлангналаа. Ирэх өвөл гэх хүндхэн даваа хүлээж байхад энэ байдлаараа залхуу сайд нар ажлаа хийхгүй бол иргэд туйлдаж, эдийн засаг эргэж босохгүй элгээрээ хэвтэх нь.