Эргэлт.мн мэдээллийн сайт долоо хоног бүр нийгэм, улс төр, эдийн засаг, дэлхий дахинд болж өнгөрсөн онцлох үйл явдлыг тоймлон хүргэдэг билээ. Өнгөрсөн долоо хоногт Засгийн газрын ээлжит хуралдаан болж, “Токио 2020” зуны олимпын наадмыг зорьсон тамирчид эх орондоо ирлээ. Түүнчлэн Оюутолгойг шалгах ажлын хэсгээс мэдээлэл хийж, хөндлөнгийн шинжээч нарын дүгнэлт гарсныг танилцуулав. Эдгээр үйл явдлыг тоймлон хүргэж байна.

НАМРЫН УРГАЦ ХУРААЛТАД ОЮУТНУУДЫГ ЦАЛИНТАЙ АЖИЛЛУУЛНА

           Засгийн газрын ээлжит хуралдаан өнгөрсөн лхагва гарагт боллоо. Энэ хуралдаанаар намрын бэлтгэл ажил болон цаг үеийн зарим асуудлыг хэлэлцэж, шийдвэр гаргасан юм. Тухайлбал, намрын ургац хураалтын үеэр их дээд сургуулийн оюутан, цэргийн алба хаагч болон хөдөлмөрийн насны иргэдийг цалинтай ажиллуулах шийдвэр гаргасан.

Энэ талаар Хүнс хөдөө аж ахуй хөнгөн үйлдвэрийн сайд З.Мэндсайхан “Энэ жил өмнөх жилүүдээс илүү их хэмжээтэй ургац хураан авах төлөвтэй байна. Хөл хорионы үед хаврын тариалалтын бэлтгэл ажлыг эхлүүлсэн. гэхдээ аж ахуйн нэгжүүд цаг хугацаандаа ургацаа тариалж эхэлсэн. Энэ жил бид 616 мянган га талбай дээр тариалалт хийсэн.

Үүний 416.8 мянган га дээр улаан буудай, 29.1 мянган га-д төмс, 9.1 мянга га-д хүнсний нөгөө 4000 га-д тосны ургамал 4.7 мянган га-д жимс жимсгэнэ тариалсан байна. Бид газар дээр нь ажиллахад соёололт 90 хувьтай сайн байна. Бид боломжийн ургац авах нь. Улсын болон орон нутгийн автозамыг засаж, ургацаа сайдгүй тээвэрлэх шийдвэр гаргалаа. Мөн ажиллах хүчний нөөц хомс байгаа. Тиймээс их дээд болон мэргэжлийн сургуулийн оюутан, цэргийн алба хаагч, ажил хайж буй иргэдийг оролцуулна.

Үндсэндээ 8000 мянган ажлын байр байга гэсэн. Ингэхдээ өдрийн 50 мянган төгрөгийн дундажтай ургац хураалт дээр ажилуулна гэдгээ илэрхийлсэн. Бид аль болох хурдан хугацаанд ургацаа хураах зорилго тавьж байгаа. Өнгөрсөн жил бид хүнсний ногооны 40 хувиа хангасан бол энэ жил 60 хувиа бүрдүүлэх төлөвлөгөөтэй байгаа. Хөдөө аж ахуйн бүтээгдэхүүнээ бид үнэ цэнтэй байлгах бодлого баримтлаж байгаа.

Х.НЯМБААТАР: Оюутолгойн зардал хэтэрсэн нь геотехникийн асуудалтай холбоогүй гэж үзсэн

         Засгийн газар Оюутолгой төслийн гүний уурхайн бүтээн байгуулалтын зардал нэмэгдсэн, хугацаа хойшилсон шалтгааныг судлан дүгнэлт гаргах зорилгоор хөндлөнгийн хяналт хийлгэхээр болсон юм. Хөндлөнгийн хяналтын дүгнэлт гарсантай холбогдуулан ажлын хэсэг мэдээлэл хийсэн. Тодруулбал, Хөндлөнгийн шинжээчдийн дүгнэлтээр Оюутолгойн гүний уурхайн бүтээн байгуулалтын зардал өсөж, ашиглалтад оруулах хугацаа хойшилсон нь геотехникийн асуудалтай холбоогүй гэж үзсэн байна.

Энэ тухай Хууль зүй, дотоод хэргийн сайд Х.Нямбаатар "Оюутолгойн гүний уурхайн бүтээн байгуулалтын зардал нэг тэрбум 450 сая ам.доллараар хэтэрсэн. Гүний уурхай ашиглалтад орох хугацаа 22 сараар хойшилсон асуудлаар Засгийн газар Оюутолгой ХХК-д удаа дараа хүсэлт тавьсан. Үүний дагуу дэлхийд нэр хүндтэй хөндлөнгийн шинжээч нараар дүгнэлт гаргуулах хүсэлт тавьсан.

Хөлдөнгийн шинжээчид энэ оны гуравдугаар сараас эхлэн таван сарын турш уурхай дээр ажиллаж, бидэнд дүгнэлтээ хүргүүллээ. Энэ дүгнэлтээр гүний уурхай ашиглалтад орох хугацаа  22 сараар хойшлож, хөрөнгө оруулалтын зардал нэмэгдсэн нь төслийн гүйцэтгэлийн явцад илрүүлсэн геотехникийн асуудлаас болж нэмэгдээгүй гэсэн байна” гэх тайлбарыг хийгээд буй.

ТОКИО 2020 ЗУНЫ ОЛИМПЫН НААДМЫГ ЗОРЬСОН ТАМИРЧИД ЭХ ОРОНДОО ИРЛЭЭ

          “Токио-2020” зуны XXXII наадамд Монгол Улсыг төлөөлж, оролцсон баг, тамирчдын хоёр дахь ээлж өнгөрсөн лхагва гарагт эх орондоо ирсэн. Чөлөөт бөх, усан сэлэлт, хөнгөн атлетикийн төрөлд оролцсон тамирчид багш, дасгалжуулагчийн хамт 40 гаруй хүний бүрэлдэхүүн ирсэн билээ.

Үүнээс чөлөөт бөхийн төрөлд хүрэл медаль хүртсэн Б.Болортуяа сэтгэгдлээ хуваалцсан юм.

Тэрбээр “Олимпын наадмаас медаль хүртсэн Монголын чөлөөт бөхийн 10 дахь тамирчин, хоёр дахь эмэгтэй тамирчин болсондоо үнэхээр их баяртай байна. Олимпын дэвжээнд муу тамирчин гэж байхгүй. Бүгд л шилдэг байлаа.

          Дэвжээн дээр гарах бүрдээ багштайгаа утсаар ярьж, техникийн зөвлөгөө авч байсан. Намайг амарч байх үед багш нар маань барилдааны бичлэг үзээд арга, техникийн зөвлөгөө өгч байсан юм. Монгол Улсаас чөлөөт бөхийн есөн тамирчин олимпын эрх авч очсон. Бид бүгд медаль авах боломж бүрэн байсан.

          Чөлөөт бөх бол чөлөөтэй барилдахын илэрхийлэл. Дэвжээн дээр гарах зургаан минутдаа дахиж хэзээ ч харамсахгүйгээр барилдах хэрэгтэй. Би шантарч байгаагүй. Тамирчин хүний зорилго дуусахгүй. Цаашид илүү хичээж, бэлтгэлээ хийж дараагийн олимпод оролцоно.

          Өмнө нь Японы бөх Мүкайтай барилдаж үзээгүй байсан. Барилдааны өмнө тухайн бөхийн талаар сайн судалсан. Ялах бүрэн боломж байсан ч өөрийн буруугаас болж унасан. Багш нар маань “Дараагийн барилдаан байгаа сэтгэлээр унаж болохгүй дараагийн барилдаандаа бэлд” гэж байлаа. Ер нь бол сэтгэлээр унах боломж олдоогүй.

          Харин одоо бол гэрийнхэнтэйгээ хамт байж, амрахыг хүсэж байна. Цар тахлын хүнд, хэцүү үед удаан хугацаанд хол байлаа шүү дээ” хэмээв.