Монгол Улсын гурав дахь Ерөнхийлөгч Намбарын Энхбаяр 2008 оны Бээжингийн олимпын наадмын нээлтэд гэргий О.Цолмонгийн хамт оролцож, улсынхаа нүүр царай болон мандаж явсан даа. Төрийн тэргүүнээр дөрвөн жил ажиллахдаа иргэдийн дунд чамгүй нэр хүнтэй нэгэн байсан тэрбээр өнөөдөр улс төрийн карьераа бүрэн мөсөн дуусгав бололтой.
Хэдий Ерөнхийлөгчийн сэнтийгээс буусан даруйдаа хууль, шүүхийн байгууллагад шалгагдаж, оймстойгоо ачигдаж байсан ч “Улс төрийн хэлмэгдүүлэлтэд өртсөн” хэмээн олон нийт түүнийг илүү хайрлаж, мөн ч их итгэж байлаа. Харамсалтай нь, Н.Энхбаяр улс төрийн замналаа энэ жил дуусгаж, Судалгааны хүрээлэнгийн дарга болоод сураг тасрав. Угтаа бол МАН-ын даргыг Ерөнхийлөгч болоход нь дэмжлэг үзүүлж, шинэ Ерөнхийлөгчийн Үндэсний аюулгүй байдлын зөвлөлийн Стратеги судалгааны хүрээлэнгийн захирлаар томилогдож, зургаан жил амар жимэр суух болоод буй.
Өнгөрсөн хугацаанд гишүүд, дэмжигчдийнхээ чихэн дээр цэцэг ургуулж, улч төрийн хүрээнд чамгүй дэмжлэг авсан хэр нь хажууд нь үлдсэн цөөн хэдэн залуучууд өөд татснаас өөр зүйл үлдээгээгүй түүнийг олон нийт өөрөө даргын зөөлөн суудалд заларч, нүдэн балай чихэн дүлий суух болсоныг шүүмжилж буй.
МАН-аас өрх тусгаарлаж, Монголын төрд бугшсан муу муухайг илчилнэ гэж амласан амлалтаасаа буцаж, МАН-ын бөөрөнд наалдав
Нэг ёсондоо монголын ард түмэн түүнийг улс төр дэх үнэн төрх, бохир байдлыг бодитоор илчлэх зангаргатай улстөрч хэмээн итгэж байсан ч тэрбээр “хар толгойгоо” бодоод өөрийнхөө зам мөрийн хөөхөөр шийдэв бололтой. МАН-аас өрх тусгаарлаж, Монголын төрд бугшсан муу муухайг илчилнэ гэж амласан амлалтаасаа буцаж, МАН-ын бөөрөнд наалдав.
Тэрбээр энэ удаагийн сонгуульд У.Хүрэлсүхийг дэмжихдээ гурван сайдын суудал, Төрийн нарийн бичгийн даргын суудал авах тохироотой байснаас хамгийн том нь өөрийн хүү Э.Батшугарыг Сонгинохайрхан дүүргийн нөхөн сонгуульд нэр дэвшүүлж, МАН-ын гишүүдээр дэмжүүлэх байв.
Одоохондоо тэдний хүрээллийнхэн “бялуу”-гаа хүртэж, удирдах албанд томилогдсон хэдий ч, нөлөө бүхий тодорч гарах томоохон тушаал авсан хүн алга. Үндсэндээ бол У.Хүрэлсүхэд дахин мад тавиулж, улс төрийн хүрээллээс бүрэн мөсөн арчигдаж мэдэхээр байгаа гэхэд хилсдэхгүй.
Харин нөхөн сонгуульд Э.Батшугарыг нэр дэвшүүлэх эсэх нь тун эргэлзээтэй байгаа.
Анх түүнийг МАН-тай, МАХН-ыг нэгтгэхэд нь Үндсэн хуулийн цэцийн даргаар томилох сураг гарч байсан ч тушаал буурч, Үндэсний аюулгүй байдлын зөвлөлийн Стратеги судалгааны хүрээлэнгийн захирал болгосон. Харин нөхөн сонгуульд нэр Э.Батшугарыг дэвшүүлэх эсэх нь тун эргэлзээтэй байгаа. Сонгинохайрхан дүүргээс сонгогдсон ч хотын даргын албанд томилогдсон Д.Сумъяабазар өөрийн ойрын хүн гэгдэх нийслэлийн орлогч асан Ж.Сандаг-Очирыг дэмшүүлэх сонирхолтой байгаа гэх цуу яриа бий.
Угтаа бол Ерөнхийлөгч У.Хүрэлсүх нөхөн сонгуульд Э.Батшугарыг дэвшүүлэх санал гаргаад ч Л.Оюун-Эрдэнэ, Д.Сумъяабазар нь гэдийчихвэл Н.Энхбаярт ямар ч арга үлдэхгүй гэсэн үг. Нэг ёсондоо Судалгааны хүрээлэнгийн захирал хийгээд тэтгэвэртэй гарч магадгүй гэсэн үг.
Олон ч жил төрд зүтгэж, үсээ буурал болтол зүтгэсэн Н.Энхбаяр нам ч үгүй, улс төрийн карьер үгүй дуусгах нь бололтой.
МАНДАЖ ЯВСАН Н.ЭНХБАЯР НАМ Ч ҮГҮЙ, УЛСТӨРЧИЙН КАРЬЕР Ч ҮГҮЙ ДУУСЛАА ДАА... |
|