Ерөнхийлөгч тангаргаа өргөлөө, удтал хүлээгдсэн МАН-ын шинэ дарга сонгогдлоо. Одоо "Н.Энхбаярынхан хэзээ, хэрхэн хоолондоо орох вэ" гэдэг асуулт Монголын улс төрийн ойрын ирээдүйн хамгийн сонирхолтой сэдэв  байх нь. Тэгвэл эрх баригч МАН-аас Н.Энхбаярынханд эхнээс нь албан тушаалын "бялуу"-ны хувь хүртээгээд эхэллээ.  Эхний хэрчмийг  Б.Тулга хүртэж, эрх баригч намын нарийн бичгийн дарга болж дэвшлээ. Дараа дараагийн хэрчмийг хэн хэн хүртэж, хаана хаана "залрах" нь тун удахгүй ил болно.

Н.Энхбаяр МАН-тай эвлэрэхдээ "Гурван сайд, нэг төрийн нарийн бичгийн даргын суудлаар тохироо хийсэн" гэгдэж байсан. Н.Энхбаярт "тахил" өргөх зарим яамдын нэрс ч ил цагаан яригдаж байгаа. Б.Тулгын хувьд МАН, МАХН-ны "их эвлэрэл"-ийн зуучлагч, зохион байгуулагчаар ажилласан, Н.Энхбаярын туслахаас эхлээд МАХН-ын нарийн бичгийн дарга хүртэл дэвшсэн үнэнч "цэрэг" нь. Энэ утгаараа Н.Энхбаяр, У.Хүрэлсүхийн тохироогоор аль нэг яамны сайдаар залрах байх гэсэн хүлээлттэй байсан. Гэсэн ч ийнхүү МАН-ын гал тогоонд "бэлтгэгч" боллоо. Н.Энхбаяр үнэнч "цэрэг"-ээ сайдад зүтгүүлэхийн оронд МАН-ын дотоод асуудалд оролцуулж, мэдээлэлтэй илүү ойр байлгахыг хүссэн бололтой юм. 

10 жилийн өмнө МАХН зүсээ хувиргаж МАН болоход Н.Энхбаяр ахмадуудаа, хуучин нэрээ л авч үлдсэн. Өнгөрсөн хугацаанд Б.Тулга, Э.Эрдэнэжамъян хоёр Н.Энхбаярыг ганцаардуулалгүй нөмөр түшиг, хань бараа болж, урваж шарвалгүй дэргэд нь байж ирсэн, баруун, зүүн гар нь. Б.Тулга Э.Эрдэнэжамъян шиг "Н.Энхбаяр даргыг минь" гэж олны өмнө уйлаагүй ч үнэнч байдлаа цаг тутам харуулж ирсэн нэгэн.

Тухайлбал, Б.Тулга 2002 онд МАХН-д мэдээлэл технологийн ажилтнаар ажилд орж, Н.Энхбаярын нүдэнд үе үехэн өртөж явсаар, 2004 онд нэг мөр тоогдож, туслахаар нь ажиллаж эхэлсэн. Их эвслийн Засгийн газар байгуулагдаж, Н.Энхбаяр УИХ-ын даргаар сонгогдон ажиллаж байсан үе гэсэн үг. Улмаар 2005 оны Ерөнхийлөгчийн сонгуулиар Н.Энхбаяр нийт сонгогчдын 65 хувийн санал авч, төрийн тэргүүнээр сонгогдох үед Б.Тулга дагаад Ерөнхийлөгчийн туслах болж дэвшиж байв. Н.Энхбаяр Ерөнхийлөгчөөс буумагцаа бизнесийн зөвлөгөө өгдөг компани байгуулахад нь ч Б.Тулга дэргэд нь байлаа. Улмаар Н.Энхбаяр 2009 оны сүүлээр Б.Тулгыг АНУ руу сургуульд явуулж, 2011 онд буцаан “татсан”.

Буцаж ирсэн Б.Тулга Н.Энхбаярын “даалгавар”-аар “Ардчилал шударга ёс” МЗХ-г байгуулан ажилласан. Улмаар 2011 оны арваннэгдүгээр сард Н.Энхбаярын “туслах"-ын хувиар "хамаарал бүхий этгээд" гэгдэн баривчлагдсан. Тухайн үед Б.Тулгыг суллахыг шаардсан жагсаал хүртэл болж байв. Энэ үеэс л Б.Тулга гэгч “туслах” залуу олонд танигдсан. Ингээд харвал Б.Тулга гадагшаа явсан хоёр жилийг нь эс тооцвол Н.Энхбаяртай 17 жил хагацахгүй хамт яваа юм. 

       Тэгвэл Б.Тулга “шүдгүй арслан” Н.Энхбаярын “шүд” болж, орон шоронд ороход нь ч, олны дунд нэр хүндгүй болоход нь ч урвалгүй хамт байж, үнэнч зүтгэснийхээ шагналыг хүртэж, эрх баригч намын нарийн бичиг боллоо. УИХ-д ганцхан суудалтай намын нарийн бичиг байсан бол одоо эрх баригч намын нарийн бичиг болсон нь залуу хүнд том амбиц биз ээ.

Ямартай ч Н.Энхбаярынхнаас Б.Тулга түрүүлж “хоолондоо” орлоо. Хэдийгээр сайдын сэнтий биш боловч чамлахааргүй хэрчим “бялуу”. Магад, сайд болж “сагсалзаж” явснаас МАН-ын гал тогоонд байж байх нь өөрт нь ч, Н.Энхбаярт ч хэрэгтэй байх. Харин Н.Энхбаярт оногдсон албан тушаалын “бялуу”-ны дараагийн “хэрчим” хэнд очих бол. Э.Батшугар, Э.Эрдэнэжамъян тэргүүтнүүд ээлжээ тэсэн ядан хүлээж л буй биз.