У.ХҮРЭЛСҮХ: Нийгэмд шударга ёс тогтоохын төлөө хичээн зүтгэнэ

        Монгол Улсын зургаа дахь Ерөнхийлөгч У.Хүрэлсүх "Монгол Улсын тусгаар тогтнол, бүрэн эрхт байдал, Монголын ард түмний эрх чөлөөг эрхэмлэн хамгаалж, Үндсэн хуулийг дээдлэн сахиж Монгол Улсын Ерөнхийлөгчийн үүргийг шударгаар гүйцэтгэхээ батлан тангараглая" хэмээн өчигдөр тангараг өргөлөө.

Тэрбээр ард түмэнд хандан "Эгэл жирийн жолоочийн гэр бүлд өсч төрсөн надад Монгол төрийг тэргүүлэх их хувь заяа, өндөр итгэл хүлээлгэсэн ард түмэндээ мэхийн ёсолъё. Намайг төрүүлж өгсөн бурхны орноос харж байгаа аав ээж, өвөг дээдэстээ мэхийн ёсолъё. Ард түмний захиа даалгавар, үүрэг хариуцлага хүлээн хүлээн авч байна. Нийгэмд шударга ёс тогтоохын төлөө хууль бус хүн засагладаг төртэй болохын төлөө хичээн зүтгэнэ" гэсэн юм.

      Монгол Улсын Ерөнхийлөгч У.Хүрэлсүхийн тангараг өргөх ёслолд анхны Ерөнхийлөгч П.Очирбат, хоёр дахь Ерөнхийлөгч Н.Багабанди, гурав дахь Ерөнхийлөгч Н.Энхбаяр, дөрөв дэх Ерөнхийлөгч Ц.Элбэгдорж, тав дахь Ерөнхийлөгч Х.Баттулга нар болон УИХ, Засгийн газрын гишүүд, элчин сайдууд оролцсон билээ.

 Монгол Улсын зургаа дахь Ерөнхийлөгч У.Хүрэлсүх тангараг өргөснийхөө дараа ҮАБЗ-ийн анхны хурлаа зарласан билээ. Хуралдааны үеэр улсын төсөвт тодотгол хийж, хүүхдийн 100 мянга, цахилгаан, дулаан зэрэг халамжийн арга хэмжээг он дуустал үргэлжүүлэхээр болсон.

Төсвийн тодотголд:

• Эрүүл мэндийн салбарт 668 тэрбум төгрөгийн нэмэлт санхүүлжилт олгохоор
• Хүүхдийн 100 мянган төгрөгийн мөнгөн тэтгэмжийг 2021 оны арванхоёрдугаар сарын 31-ний өдөр хүртэл сунгахаар
• ААН, өрхийн цахилгаан дулаан, цэвэр, бохир ус, хог хаягдлын хураамжийг 2021 оны арванхоёрдугаар сарын 31-ний өдөр хүртэл сунгахаар
• Сайжруулсан шахмал түлшний үнийг 50 хувиар хөнгөлөх арга хэмжээг 2022 оны гуравдугаар сар хүртэл сунгах асуудлыг тус тус тодотголд тусгав

ЗГ: Цахим наадам тэмдэглэнэ

     Тулгар төрийн 2230, Их Монгол Улс байгуулагдсаны 815, Ардын хувьсгалын 100 жилийн ойн Үндэсний их баяр наадмыг цаг үеийн нөхцөл байдлаас шалтгаалан долдугаар сарын 11-13-ны өдөр Хүй долоон худагт үзэгчгүй, цахимаар зохион байгуулахаар болсон.

      Өмнөх жилүүдийн наадмын төсөв 2.8-аас гурван тэрбум төгрөгийн хооронд байсан. Энэ жил ч тус төсвөөс хэтрүүлэхгүй цахим наадмыг хийнэ хэмээн албаныхан мэдэгдсэн. Наадамд оролцох оролцогчдыг вакцины хоёрдугаар тунд бүрэн хамруулсан бөгөөд халдвар хамгааллын дэглэмийг чанд сахин, ариутгал, халдваргүйжүүлэлтийг цаг тухай бүрд нь хийх, оролцогчдод хэрэгтэй амин дэм, витаминаар хангаж ажиллахаар болсон.

      Харин орон нутагт наадам тэмдэглэх тухай зарим гишүүн Засгийн газар санал хүргүүлсэн.  Тэдний хүсэлтийг харгалзан үзэж, долдугаар сарын 20-с хойш улсын хэмжээнд халдвар буурвал орон нутагт наадам зохион байгуулах талаар ярилцах юм.   

Б.Хурц, Д.Дамба-Очир, Б.Галсансүх зэргийн 13 хүн суллагдсан 

     Монгол Улсын Ерөнхийлөгч асан Х.Баттулга өнгөрсөн дөрөв дэх өдөр зарлиг гаргаж, ял эдэлж буй 13 хүнд уучлал үзүүлсэн. Ерөнхийлөгч асан Х.Баттулгын зарлигаар Тагнуулын ерөнхий газрын дарга асан Б.Хурц, УИХ-ын гишүүн асан Д.Дамба-Очир, яруу найрагч Б.Галсансүх нарын 13 хүн багтсан аж. Тухайн өдөртөө Шүүхийн шийдвэр гүйцэтгэх ерөнхий газарт зарлигийг хүргүүлж, Шүүхийн шийдвэр гүйцэтгэх ерөнхий газраас 13 хүний хоригдож байгаа хорих анги руу шийдвэрээ явуулж, сулласан юм.

 Цар тахлын улмаас амиа алдсан 493 хүний ар гэрт эмгэнэл илэрхийлж, иргэд зул өргөлөө

       Цар тахлын улмаас амиа алдсан 493 иргэний ар гэрт эмгэнэл илэрхийлж, Сүхбаатарын талбайд иргэд зул өргөлөө. Сүүлийн 13 өдөр дараалан коронавируст халдвар 2000 давж, дунджаар 10 хүн нас барж байна.

Иргэд тус өдрийг гашуудлын өдөр хэмээн нэрлэсэн билээ. Тэд энэ үеэр “PCR шинжилгээг үнэгүй болгох, мөн хавдар судлалын шинэ эмнэлэг барихыг хүсэж, эрүүл мэндийн хүртээмжгүй үйлчилгээг шүүмжилж, засахыг шаардсан юм.