ЭРГЭЛТИЙН ТОЙМ: Сонгуультай, Засгийн газрын шийдвэртэй “Ковид-19”-ийн халдвар нэмэгдсэн долоо хоног

2021-06-12, 748

Эргэлт.мн мэдээллийн сайт долоо хоног бүр улс төр, нийгэм, соёл урлаг, дэлхий дахинд болж өнгөрсөн онцлох үйл явдлыг тоймлон хүргэдэг билээ. Өнгөрсөн долоо хоногт Монгол Улсын түүхэнд шинээр бичигдэх томоохон үйл явдал өрнөлөө. Тодруулбал, Монгол Улсын найм дахь удаагийн Ерөнхийлөгчийн сонгууль амжилттай болж өндөрлөсөн юм. Түүнчлэн цар тахлын халдварын тоо эрс нэмэгдэж, нас баралтын тоо өсөв. Энэ мэт улс төр нийгмийн хүрээнд болж өнгөрсөн онцлох үйл явдлыг тоймлон хүргэж байна.

Монгол Улсын зургаа дахь Ерөнхийлөгчөөр У.Хүрэлсүх сонгогдов

Монгол Улсын Ерөнхийлөгчийн ээлжит сонгуулийн санал хураалт энэ сарын 9–нд буюу өнгөрсөн лхагва гарагт боллоо. Энэ удаад Ерөнхийлөгчийг Үндсэн хуулийн нэмэлт, өөрчлөлтийн дагуу зургаан нэг удаа сонгож байгаа юм. Ерөнхийлөгчийн ээлжит сонгуульд парламентад суудалтай гурван намын нэр дэвшигч өрсөлдсөн. Тодруулбал, МАН-аас Ерөнхий сайд асан У.Хүрэлсүх, АН-аас УИХ-ын гишүүн асан С.Эрдэнэ, “Зөв хүн электорат” эвслээс Д.Энхбат нар нэр дэвшсэн. Нэр дэвшигчид хуулийн хугацаанд сонгуулийн кампанит ажлаа явуулсан ч “унтаа” дуулиан шуугиан багатай сонирхолгүй сонгууль болсон хэмээн иргэд дүгнэж буй. Угтаа бол энэ удаагийн ээлжит сонгууль өрсөлдөөгүй сонгууль болов.

Түүнчлэн Ерөнхийлөгчийн сонгуульд өрсөлдөгчид сонгуулийн сурталчилгааны сүүлийн өдөр бодлогын мэтгэлцээн зохион байгуулдаг уламжлалтай. Харин найм дахь удаагийн сонгуулиар энэ мэтгэлцээнийг явуулаагүй нь олны шүүмжлэлд өртөв. Тодруулбал, “Зөв хүн электорат” эвслээс нэр дэвшигч Д.Энхбат сонгуулийн сурталчилгааны үеэр коронавирусийн халдвар авч, улмаар МҮОНРТ-ээс нэр дэвшигчдийн тэгш оролцоог хангах боломжгүй учир мэтгэлцээн явуулахгүй гэдгээ мэдэгдсэн юм.

Монгол Улсын Ерөнхийлөгчийн найм дахь удаагийн сонгуулийг зохион байгуулахад аймаг, нийслэлийн 22 сонгуулийн хороо, сум, дүүргийн 339 сонгуулийн хороо, гадаад улсад байгаа иргэдээс санал авах ажлыг зохион байгуулах төв комисс болон 44 салбар комисс, 2087 хэсгийн хороонд нийт 22300 төрийн захиргааны болон төрийн үйлчилгээний албан хаагч, мэдээллийн технологийн 2800 албан хаагч ажилласнаас гадна, цар тахлын нөхцөл байдалтай холбоотойгоор халдвар хамгааллын дэглэм, батлагдсан журмыг мөрдүүлэх чиглэлээр онцгой байдлын болон эрүүл мэндийн байгууллагын нийт 5474 албан хаагч, сонгогчдын нэрийн жагсаалт үйлдэх, давхардлыг арилгах, нягтлан шалгах үйл ажиллагаатай холбоотойгоор 3137 иргэний бүртгэлийн итгэмжлэгдсэн ажилтан, цагдаагийн 8500 албан хаагч нийт 42211 төрийн албан хаагч ажиллалаа.

Ерөнхийлөгчийн 2021 оны ээлжит сонгуулийн дүнг нэгтгэхэд МАН нэр дэвшсэн У.Хүрэлсүх 823326 санал буюу сонгуульд оролцсон нийт сонгогчийн 67.69 хувийн санал, Ардчилсан Намаас нэр дэвшсэн С.Эрдэнэ 72832 санал буюу сонгуульд оролцсон нийт сонгогчийн 5.99 хувийн санал, “Зөв хүн электорат” эвслээс нэр дэвшсэн Д.Энхбат 246968 сонгогчийн буюу сонгуульд оролцсон нийт сонгогчийн 20.31 хувийн санал авсан байна. Ингэснээр МАН-аас нэр дэвшигч У.Хүрэлсүх олонхын санал авч Монгол Улсын дараагийн Ерөнхийлөгчөөр сонгогдлоо.

Хөл хорио тогтоохгүй, шатахууны үнэ нэмэхгүй

Засгийн газар өчигдөр буюу энэ долоо хоногийн баасан гарагт ээлжит бусаар шуурхай хуралдлаа. Хуралдаанаас цаг үеийн зарим асуудлаар шийдвэр гаргаж танилцуулав. Тодруулбал, Засгийн газраас шатахууны үнийг нэмэхгүй болон хөл хорио тогтоохгүй байх шийдвэр гаргажээ. Шатахууны үнийн асуудлаар МГТГ-ын Газрын тосны асуудал эрхэлсэн орлогч дарга Ц.Эрдэнэбаяр "Уул уурхай, хүнд үйлдвэрийн яам болон АМГТГ-т холбогдох компаниудаас шатахууны үнийг өсгөх санал бүхий албан тоот ирсэн. Олон нийтийн сүлжээнд шатахууны үнэ 600 төгрөгөөр нэмэгдэнэ гэх мэдээлэл цацагдсан. Ийм асуудал байхгүй. Яагаад гэвэл, 2021 оны гуравдугаар сарын 24-ний өдрийн Засгийн газрын 74 дүгээр тогтоолоор АИ-92 автобензиний нөөцийг 30 мянган тонноор нэмэгдүүлэх шийдвэр гарсан.

Өмнө нь Аи-92 автобензин 2800 орчим тонн нөөцтэй байсан. Үүнийг 10 гаруй хувиар нэмэгдүүлэх чиглэлээр тодорхой арга хэмжээ хэрэгжүүлж ирсэн. Мөн 2020 оны аравдугаар сараас эхлэн дэлхийн зах зээлд газрын тосны үнэ өссөн. Өнөөдрийн байдлаар брент маркийн газрын тосны үнэ нэг баррель нь 72 орчим ам.доллар хүртэл өссөн байна. АИ-92 автобензиний үнэ өнгөрсөн тавдугаар сараас өнөөдрийг хүртэл 1450 төгрөгийн үнэтэй байна. Тиймээс маргааш үнийн өсөлт үүсэхгүй" гэлээ.

Мөн иргэдийн дунд сонгуулийн дараа цар тахал нэмэгдэж буйтай холбоотой сонгуулийн дараа хөл хорио тогтооно гэсэн таамаг гарсан энэ талаар Засгийн газрын хэвлэлийн төлөөлөгч Ц.Ганзориг "Зургадугаар сарын 15-наас ирэх долдугаар сарын 1-н гэхэд халдварын тархалт буурна гэх судалгааны үр дүн хэвээрээ байгаа. Давтан тундаа хамрагдсан иргэдийн 0,5 хувь нь халдварт өртсөн байна. Хөл хөдөлгөөн 95 хувиар нэмэгдсэн. Ирэх долдугаар сарын эхээр бодит үр дүн гарна гэж эрдэмтдийн баг үзэж байгаа. Тийм учраас тайвшрах эрт байна. Засгийн газрын тэргүүн хатуу хөл хорио тогтоохгүй гэж мэдэгдсэн. Мөн долдугаар сарын 1-нээс хүүхдийн мөнгө, цахилгааны мөнгийг үргэлжлүүлэх эсэхийг ҮАБЗ шийднэ" гэх мэдэгдэл хийсэн юм.

Коронавирусийн халдварын тоо нэмэгдэв

Өнгөрсөн долоо хоногт коронавирусийн халдварын тархалт нэмэгдэж, өдөрт дунджаар 1000 дээш хүнээс халдвар илрэх болов. Нас баралтын тоо нэмэгдэж, халдвар авах иргэдийн нас залуужиж байгааг мэргэжлийнхэн санууллаа.

Өчигдөрийн байдлаар улсын хэмжээнд 24 цагийн хугацаанд 10 мянга гаруй хүнээс коронавирусийн шинжилгээ авахад 1460 хүнээс халдвар илэрлээ. Ингэснээр нийт батлагдсан тохиолдол 70 мянга давлаа. Мөн өнгөрсөн 24 цагийн хугацаанд коронавирусийн нэн хүнд хэлбэрээр 10 хүн барсан гэх харамсалтай мэдээ бий.

Гэрийн хяналтад хөнгөн хэлбэрийн оноштой 7988 хүн өрхийн эмчийн хяналт дор эмчилгээ хийлгэж байна. Эдгээр иргэн биеийн халуунаа тогтмол үзэхийг зөвлөж байгаа юм. Мөн өрхийн эмнэлгүүд нэлээд ачаалалтай ажиллаж байгаа гэдгийг Эрүүл мэндийн яамнаас мэдээллээд буй.

ЭРГЭЛТИЙН ТОЙМ: Сонгуультай, Засгийн газрын шийдвэртэй “Ковид-19”-ийн халдвар нэмэгдсэн долоо хоног

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид