Д.Энхбат   эхнэртэйгээ юу ярьж суугаа бол гэж яагаад ч юм бодогдоод байх.  Цэл залуухан наснаасаа үсээ бууралтаж, зүсээ гундтал жаргал, зовлон туулж яваа тэр хоёрын амьдралд 2021 оны Ерөнхийлөгчийн сонгууль  гэнэтийн шийдвэр, гэнэтийн өөрчлөлт авчирсан цаг үе байсан гэдэгт огт эргэлзэхгүй байна. Ерөнхийлөгчийн сонгуульд нэр дэвшээд унасан даа харамсахгүй байгаа байх.  

Сурталчилгааны үеэр  “Ковид-19”-ийн халдвар авчихсан. Одоо эмнэлгийн өрөөнд тусгаарлалтад  эхнэртэйгээ хамт   хэвтэн эмчлүүлж байгаа. Тэр хоёр сүүлийн нэг сарын хугацаанд болж өнгөрсөн үйл явдлыг дүгнэж, алдаа оноо, хүмүүсийн   итгэл найдварыг хэрхэн мэдэрсэн бэ гэдгээ ярьж суугаа байх.  Маш богино хугацаанд Монгол орноо тойрч, сонгогч нартай уулзсан.   Хөгжил, дэвшил, гуравдагч хүчин Монголд ус агаар мэт хэрэгтэй байгаа. Залуус шинэ сонголт хүсэж, мөрөөдөж, тэмүүлж байгаа гэдгийг тэр ойлгосон, бас мэдэрсэн. Тиймээс ямар ч байсан монголын ирээдүй МАН, АН-аас гадна өөр боломж руу  тэмүүлж байгаа  шүү гэдгийг тэр мэдрүүлж, шинэ салхи сэвэлзүүлж чадлаа. Гэхдээ түүнд алдаа бас олон байсан гэдгийг энэхүү бичвэрийнхээ өмнө  тодотгож хэлмээр байна.

ЕРӨНХИЙЛӨГЧИЙН СОНГУУЛЬД ШИНЭЭР ГАРЧ ИРСЭН ШИНЭ ДҮР БУЮУ Д.ЭНХБАТ

УИХ-д суудалтай гурван намаас нэр дэвшигчдээ тодруулж, Сонгуулийн ерөнхий хороо баталгаажуулснаар нэр дэвшүүлэх үйл ажиллагаа албан ёсоор эхэлсэн. Ерөнхийлөгчийн ээлжит сонгуульд нэр дэвших гурван өрсөлдөгчийг зарлах мөчид олны анхаарал татаж, сонирхол түрүүлсэн дүр нь “Зөв хүн электорат” эвслээс нэр дэвшигч Д.Энхбат байсан юм. Түүнийг олон нийт улстөрч гэхээс нь илүүтэй “Датаком” компанийг үүсгэн байгуулагч, “Нээлттэй нийгэм  форум”-ын нэвтрүүлэгч, хөтлөгч гэдгээр нь таньдаг байв.

 Харин энэ удаагийн Ерөнхийлөгчийн сонгуулиар Д.Энхбат гэдэг улс төрийн шинэ дүрийг нээв. Хэдийгээр ХҮН-ын дарга Т.Доржханд иргэдийн захиалгаар түүнийг намаа төлөөлүүлж, нэр дэвшүүлэхээр болсон хэмээн мэдэгдэж байгаа ч Ерөнхийлөгчийн сонгуульд ялалт байгуулна гэдэгт нь 100 хувь найдаагүй нь тодорхой.

Магадгүй Д.Энхбат МАН-ыг чимэх, шинэ имиж бүрдүүлэлт байсан биз. Түүний тухайд уламжлалт хэв маягаас илүүтэй орчин үеийн хандлагыг илэрхийлсэн элит гэж хэлэхүйц дүр байсан нь нэр дэвшигч У.Хүрэлсүхэд цоо шинэ сорилт болсон гэхэд хилсдэхгүй.

Харин Д.Энхбат тэдний төсөөлгүй, бодоогүйгээс хол явж, шинэ дүр болж чадлаа. Угтаа бол Д.Энхбат гэдэг хувь хүн хэн бэ гэдгээс илүүтэй иргэд өөр өнгө төрх, шинэ зүйлийг эрэлхийлж буйн тод жишээ энэ болов. Сонгуулийн кампанит ажлын хугацаанд түүнийг чимсэн гол бодлого нь даяаршил, дэлхий нийттэй хөл нийлүүлэх боломжийг залууст таниулсан явдал байв. Угтаа бол залуу үеийн төлөөлөл мэдлэг, боловсролтой элит хүнийг үнэлдэг болсны нотолгоо байлаа. Нэр дэвшигчдийн санал хураалтын дүнгээс харахад Д.Энхбатад өсвөр үеийн залуу сонгогчид, гаднын улсад суугаа олонх саналаа өгсөн гэх тоон мэдээлэл бий.

Мөн худлаа попорсон улс төрөөс илүү эрдэм мэдлэгтэй хүнд энэ нийгэм итгэл үзүүлэх цаг ойртож байгаа нь Д.Энхбатыг дэмжиж байгаа хүмүүсээс харагдаж байв. Магадгүй Д.Энхбатын сонгуулийн кампанит ажил уламжлалт сонгуулийн үйл ажиллагаанаас ондоо, шинийг эрэлхийлсэн, ирээдүй рүү чиглэсэн нь олны таашаалд нийцсэн биз ээ.

Энэ удаагийн Ерөнхийлөгчийн сонгуулиар дөрөвдөгч дүр гэж хэлж болохуйц шинэ сонголт гарсан нь “Цагаан сонголт” буюу иргэдийн сонгох эрхээ эдлэх шинэ “арга” байв. Урьдчилсан дүн мэдээгээр нийт сонгогчдын 71 мянган гаруй нь саналын хуудсанд тэмдэглэгээ хийгээгүй буюу цагаан сонголт хийжээ. Угтаа бол эдгээр сонгогч улс төрийн өнөөдрийн нөхцөл байдлаас шинэчлэл хүсэж буйгаа илэрхийлж буйн тод жишээ энэ боло