Ингээд бидний яриа тэдний үүсгэн байгуулсан "Nomadic ballet" продакшны  уран бүтээлийн сонин сайхнаас эхэлсэн юм. Тэрбээр "Бид арваннэгдүгээр сарын 27-нд “Кармен Сюит” сонгодог бүжиг, арванхоёрдугаар сарын 1-нд “Кармен” комтемпорари хувилбараараа тоглоно. Энэ нь монгол дэглээч, найруулагчийн уран бүтээл гэдгээрээ илүү онцлогтой болж байгаа. Хавар анхных нь тавигдсан бол одоо дахин тоглоно" гэж одоо болох хоёр тоглолтынхоо тухай мэдээлэл өгснөөр цааш бидний яриа үргэлжилсэн юм.

-“Nomadic ballet” продакшныг ДБЭТ-ын залуу уран бүтээлчид нэгдэн байгуулсан уу?

     -Тийм ээ. Театрын гоцлол балетчдаас бүрдсэн продакшн байгаа юм. Дуурь бүжгийн эрдмийн театрт дандаа сонгодог бүтээл тоглодог. “Nomadic ballet” продакшны хувьд илүү комтемпорари тал руугаа тоглолтыг үзүүлдэг. Комтемпорари гэдгийг модерн урсгал гэдгээр нь үзэгчид илүүтэй мэдэх байх.

-Сонгодог урлагийн үзэгчид нэг үеэ бодоход өссөн юм шиг ээ. Танай продакшны бүтээлүүдийн үзэгчид хэр байдаг вэ?

       -Үзэгчид гайгүй нэмэгдэж байгаа шүү. Хамгийн гол нь үзэгчдэд юу үзүүлэх үү, юу тоглох уу гэдэг их чухал. Түүнээсээ үүдэн үзэгчдийн тоо хэлбэлздэг.

-Таны хувьд одоо үзэгчдэд хүрэх гэж байгаа хоёр тоглолтдоо ороогүй байсан. Энэ удаад яагаад оролцсонгүй вэ?

    -Тийм ээ. Нурууны бэртэл аваад нэг хэсэг яах аргагүй гам барих хэрэгтэй болоод хоёр сар хэртэй гам барьж байна. Сэртэнгийн яс цууралттай, хугаралттай гарсан. Сүүлд энэ жилийн нээлтийн тоглолт болох “Хунт нуур” балетад бүжиглэсэн. Эхлээд нуруугаа хугарчихсан гэж бодоогүй юм, физик эмчилгээ хийлгээд явсан. Тэгсэн эдгэж өгөхгүй яваад байхаар нь дахиад үзүүлсэн чинь хугарчихсан байсан.

-Тоглолтын үеэр бэртэл гэмтэл хэр авдаг вэ?

         -Тоглолтод гараад бэртэх тохиолдол тун ховор. Балетчдын авдаг бэртэл бол ихэнх нь ер удаачихсан байдаг. Ихэнхдээ хүндэрсэн байхад мэддэг. Гэхдээ бүжигчид гэхээсээ илүү орчин нөхцлөөс хамаарах нь бий. Бүжигчид дулаахан зааланд, дулаахан тайзан дээр бүжиглэх ёстой. Гэтэл манай театр өвөлдөө хүйтэн байдаг. Үүнийг бүжигчид бүгдээрээ мэддэг. Тухайлбал, балетын тавчиктайгаа зогсоход хайрах хэмжээний хүйтэн байдаг. Тийм хүйтэн байхын хажуугаар хүн хөдөлж байгаа учир бие нь халаад, хөлс гардаг. Ингээд халуун, хүйтэнд байнга цохиулж байгаа юм. Тэгэхээр шөрмөс, булчингийн бэртэл гарах нь их байдаг.

-Тэргүүн гоцлооч болохын тулд 20 жил бэлддэг гэдэг юм билээ?

        -Арай ч 20 жил бол биш шүү дээ. Бэлтгэл ангид нэг жил сурна, Хөгжим бүжгийн коллеж буюу "Консерватори"-т долоон жил сурдаг. Мэдээж сүпер авьяас, өгөгдөлтэй биш л бол гоцлооч болох нь тун ховор л доо. Юм бүхэн багаасаа эхэлнэ шүү дээ. Тэр ч утгаар эхлээд дагалдан бүжигчин байна, дараа нь туслах дүрүүд авч эхэлнэ. Тэгж байж гол дүрүүдэд тоглож эхэлдэг дээ.

-Таны хувьд ДБЭТ-ын тайзнаа тавигдсан бүх л үндэсний болон дэлхийн сонгодог балетуудад гол дүр бүтээсэн юм билээ?

   -Тийм ээ. "Спартак"-ийн гол дүрд тоглоогүй байсан. Өнгөрсөн жил яг тоглосон.

-Дуурийн театрт шинэ уран бүтээл хэр тавигдаж байгаа бол. Ихэвчлэн бидний мэддэг "Хунт нуур", "Жизель" гээд балетуудыг жил бүр тайзнаа тоглодог шүү дээ?

    -Сүүлийн жилүүдэд, жилдээ нэг шинэ уран бүтээл хийгээд байна. Тухайлбал, өнгөрсөн жил "Хурмастын дагина"  балетыг тавьсан. Түүний өмнө жил  Д.Дашлхагва багшийн "Жизель"-ийг шинэчлэн найруулж тавьсан.

-Өвөө нь таныг урлагт хөтлөн оруулсан гэдэг. Танай удамд урлагийн хүн бий юү. Балет, ер аливаа нэгэн авьяас билиг удмаас өвлөгдөж ирсэн байх нь бий шүү дээ?

       -Манайд урлагийн удам бол байхгүй. Өвөөгийн амьдарч байх 1960-1970 онд сайн дурын уран сайханч гэдэг л байсан юм билээ. Өвөө Завханыхаа театрт дуулдаг байж байгаад "Бүх ард түмний спарткат"-д орж түрүүлж байсан юм билээ. Тэгэхэд нь одоогийн "Үндэсний урлагийн их театр"-аас бүр урилга ирж байсан гэсэн. Тухайн үед харин Завханы театраас даргаар нь ажиллах санал тавьснаар явуулаагүй гэдэг. Магадгүй дуучнаар нь явуулсан бол өвөө маань мэргэжлийн дуучин болох байсан байх. Мөн ойрын хамаатнууд дотор маань монгол уран зураг зурдаг ах, эгч хоёр байдаг.

-Танд үлгэр жишээ авдаг ямар балетчин байдаг вэ?

      -Монголоос одоо ДБЭТ-ын захирлаар ажиллаж байгаа балетчин Д.Алтанхуяг ах байна. Биднийг Хөгжим бүжигт орох үед гадны том тэмцээнээс медаль аваад, дэлхийг тойрч аялаад балетыг ид сурталчилж, таниулж байсан. Тухайн үед Хөгжим бүжиг дээр ирээд бидэнтэй хамт дасгал сургуулилалт хийдэг байсан. Дэлхийн балетчдаас гэвэл Италийн алдарт балетчин Роберто Болле. Одоо хүртэл тоглолтоо хийгээд бүжиглээд яваад байгаа. Мэдээж эдгээр балетчдын урт удаан хугацаанд ажиллаж байгаагийн шалтгаан орчин, нөхцөл, хангамжаасаа шалтгаалаад өөр байдаг.

-Та бүхэнд гадны том театруудаас ажиллах санал хэр ирдэг вэ?

         -Урилга, саналын тухайд тухайн балетчин тэмцээн, уралдаанд явахдаа өөрийгөө сайн харуулах ёстой байдаг. Үүнээс шалтгаалж боломж нээгддэг. Гэхдээ балет бол залуу насны урлаг учраас гадаадад ажиллах хүсэл сонирхолтой балетаар хичээллэж байгаа хүүхэд залуучууд аль болох эрт л явах хэрэгтэй.

-Хорь гаруй настайдаа балетын гол дүрд тоглох, 30 гаруй настай тоглох хоорондоо ялгаатай байх?

     -Би анх 21 насандаа анхны гол дүрдээ тоглож байсан. Мэдээж ялгаатай. Эхлээд бол илүү техник тал руугаа анхаардаг. Одоо харин тухайн балетаа илүү мэдэрч, дүрээ сайн гаргахын төлөө хичээдэг болсон.

-Ярилцсанд баярлалаа.

   -Баярлалаа.

           Түүний оролцсон гадны болон хүндэтгэлийн тоглолтууд:

2013 онд - Royal - Их эзэн хааны театр

2013 онд - Монгол бахархал нэгдсэн балетын гала тоглолт

2014 онд - “Best of Classics” сонгодог урлагын үдэш

2016 онд - “Best of Classics” сонгодог урлагын үдэш

2016 онд - “Night of Ballet” Олон улсын балетын гала тоглолт

2016 онд - “Sentiment” - модерн балет шоу

2016 онд - “Nomadic ballet” show

2016 онд - “Цасан гоо ба 7 одой” Балет - Corporate convention centre

2016 онд - Өвөрхангай аймагт “Sentiment” Модерн балет

2017 онд - “Кармен сют” балет

2017 онд - “H20” Модерн балет шоу

2017 онд - Төрийн хүндэтгэлийн концерт

2017 онд - “Best of classic” гала тоглолт

2017 онд - Эрчим хүчний 95 жилийн ойн тоглолт

2017 онд - Улаан-үдийн театр “Sentiment” Модерн балет шоу

2018 онд - Okinawa -д Балет үүссэж хөгжсөний 45 жилийн ойн тоглолт Хунт нуур балет

2018 онд - “Touch the feeling” Модерн балет шоу

2018 онд - “Motion Mongolia” Модерн балет

2018 онд - Төрийн хүндэтгэлийн концерт

2018 онд - “Corandeur” модерн балет шоу

2019 онд - “Бие үгүй” неоклассик балет

2019 онд - “High Feeling”- Wise ballet theatre хамтрасан модерн балет

2019 онд - Okinawa-д Хунт нуур балет

2019 онд - Seoul-д “Giselle ballet”  Wise ballet theatre хамтарсан тоглолт

2022 онд- New york-д Ajkun ballet company “Щелкунчик балет”

2023 онд - New york хот Ajkun ballet company “ First snow ballet”

2023 онд - “Energy contemporary ballet”

2023 онд - Улан-Үде хот “Бие үгүй неослассик балет”

2023 онд - Төрийн хүндэтгэлийн тоглолт “Танго балет”

2023 онд - Завхан аймаг 100 жилийн ойн тоглолт

2023 онд - ДБЭТ-ын 60 жилийн ойн “Сонгодог жаран тоглолт”

2023 онд - Нийслэлийн 384 жилийн ойн тоглолт “Хун номер”

2023 онд - Улан-Үде хотын 100 жилийн ойн гала тоглолт “ Дон кихот па де де”

2023 онд - Seoul хотын Youth ballet stars company “Щелкунчик балет”

2023 онд - Perm хот Арабеск тэмцээн партероор оролцов

2024 онд - Улан-Үде хот Байкаль балет гала тоглолт “Хунт нуур”.