Солонгос Монголын хамтарсан арга хэмжээ зохион байгуулагч энтертайнмент компани болох “Evandis Entertainment”-аас БНСУ-ын  алдарт дуучин, жүжигчин Rain Улаанбаатар хотод тоглолтоо хийнэ гэж өөрсдийн цахим хуудсаараа дамжуулан мэдээлсэн билээ. Тэгвэл манай улсад тоглолтоо хийх Rain гэж хэн болох талаар товч мэдээллийг танилцуулъя.

                Rain буюу Жун Жи Хун 1982 оны 6-р сарын 25-нд БНСУ-д төрсөн. Дуучин, ая зохиогч, бүжигчин, жүжигчин юм. Би бүх хүний дээрээс бороо мэт асгарах болно гэсэн утгаар тайзны нэрээ Rain гэж нэрлэж байжээ. Хүүхэд байхдаа урлагийн авьяастай ч  ядуу гэр бүлд төрсөн учир төдийлөн амжилт гаргаж, мэргэжлийн сургуульд сурч чадахгүй байсан гэдэг. Түүний ээж хоолны газар аяга угаагч хийж, чихрийн шижин өвчтэй байсан. Ядуу амьдралтай байсан учир ээж нь эмчлэгдэж чадахгүй харамсалтайгаар нас барсан. Ээжийгээ өөд болсны дараа Rain энэ амьдралд юу ч тулгарсан даван туулж, заавал амжилтад хүрнэ гэж өөртөө болон ээждээ амласан гэдэг. Тэр өнөөдөр мөрөөдөлдөө хүрч, дэлхийн од болжээ.

    Харин уншигч та бүхэн түүнийг “Миний байшин” олон ангит киноны дүрээр нь андахгүй мэдэх биз ээ. Her House нэртэй уг бүтээл нийт 50 ангитай бөгөөд 2001 оны наймдугаар сард Солонгост нээлтээ хийж байжээ. 

   Rain долоон цомог, 28 сингл дуу гаргаж, дэлхий даяар аялан тоглолтуудыг хийсээр байгаа билээ. Түүний гурав дахь солонгос цомог болох It's Raining (2004) цомог гайхалтай амжилтанд хүрсэн байдаг. Энэ цомог нь БНСУ-д 200 мянга гаруй хувь, Ази даяар нэг сая хувь борлогдож, Rain олон улсын хэмжээний од болж байсан юм.  Мөн Rain нь Mnet Asian Music Awards-аас зургаан удаа, Алтан дискний шагналаас гурван удаа, KBS-ийн Драмын есөн шагнал, Baeksang Arts Awards-аас хоёр удаа шагнал хүртсэн. 2008 онд тэрбээр Sports Dong-a сэтгүүлээс гаргасан Солонгосын энтертайнмент салбарын 100 тэргүүлэгчийн 3-т бичигдэж,  2006, 2011 онд Time сэтгүүлээс дэлхийн хамгийн нөлөө бүхий 100 хүний ​​нэгээр шалгарч байсан билээ.

Ингээд түүний тоглолтод дуулагдах магадлалтай дуунаас түүвэрлэн хүргэж байна.