- “Алтайн хүдэр” ХХК-ийн экспортын хоригийг хууль бусаар цуцлах “даалгавар”-ыг Үндэсний аюулгүй байдлын зөвлөлөөс Шүүхийн шийдвэр гүйцэтгэх ерөнхий газрын дэд дарга бөгөөд Шийдвэр гүйцэтгэх албаны дарга, хурандаа Ч.Оюунцэцэгт өгсөн үү-

       “Баян Базараа” болтлоо алдаршсан “Алтайн хүдэр” ХХК-ийн захирал Р.Базарын балаг барагтай л бол дуусахгүй. Компанийнхаа ажилтнуудын нийгмийн даатгалыг төлөхгүй луу унждаг, хөдөлмөрийн аюулгүй байдал алдаж, өч төчнөөн хүний амиар туг тахидаг, Монголын баялгийг цөлмөж, нөхөн сэргээлт хийдэггүй гээд орооцолдоогүй  “хэрэг” ховор гэлтэй.  

Таяны нурууг “тамлаж”, өдөр, шөнөгүй техник ажиллуулж, хэвлийг нь сүйтгэсэн “Алтайн Хүдэр” ХХК-тай холбоотой нэгэн хэрэг хууль хяналтын байгууллагад шалгагдаад эхэлжээ. Тодруулбал, Нийслэлийн шүүхийн шийдвэрийн гүйцэтгэх газрын дэд дарга С.Бямбарагчаад хахууль өгч, экспортын хоригоо цуцлуулахыг санаархсан байж болзошгүй өргөдөл, гомдол ирсэн тул шалгалтын ажиллагааг эхлүүлж байгаа гэнэ.

          Хэргийг бүр тодруулбал, Лондонгийн Олон улсын арбитрын шүүх 2017 оны дөрөвдүгээр сарын 13-нд "Алтай хүдэр" ХХК нь "Европын сэргээн босголтын Хөгжлийн банк"-нд 31.170.540.96 ам доллар, 15.736.04 евро, 1.138.549,1 англи фунтыг (тухайн үеийн ханшаар 87 тэрбум) төлөх ёстой гэж үзсэн байдаг. Арбитрын шүүхийн шийдвэрийн дагуу Нийслэлийн шийдвэр гүйцэтгэх газраас гүйцэтгэх ажиллагаа явуулж, "Сэлэнгэ эстимейт" ХХК-иар “Алтай хүдэр" ХХК-ийн хөрөнгийн үнэлгээг хийлгэсэн байдаг. Үнэлгээний компани Говь Алтай аймгийн Цээл сумын Баянгол багийн нутагт үйл ажиллагаа явуулдаг Таян нуурын баяжуулах үйлдвэрийг 2.948.450.000 төгрөгөөр, ашигт малтмалын ашиглалтын 15377 А тусгай зөвшөөрлийг 141.790.677.813 төгрөгөөр тогтоосон билээ. Хачирхалтай нь, “Алтайн хүдэр” компанийнхан үнэлгээг хууль бусаар хийж, багаа тогтоосон гэж үзээд шүүхэд хандаж байлаа. Ингээд тэр өдрөөс хойш "Алтай хүдэр" ХХК нь "Европын сэргээн босголтын Хөгжлийн банк"-нд өрөө төлж эхэлсэн байдаг. Өөрөөр хэлбэл, “Алтайн хүдэр” компани өрөө төлөх ажиллагааг 2017 оноос хойш явуулж байгаа бөгөөд өнөөдрийг хүртэл дуусаагүй байгаа. Лондонгийн Олон улсын арбитрын шүүхийн шийдвэрийн дагуу Нийслэлийн шүүхийн шийдвэр гүйцэтгэх газар ажиллагаа явуулж, энэ хүрээнд “Алтайн хүдэр” ХХК-ийн экспортод хориг тавьсан юм.  

НИЙСЛЭЛИЙН ШҮҮХИЙН ШИЙДВЭР ГҮЙЦЭТГЭХ ГАЗРЫН ДЭД ДАРГА С.БЯМБАРАГЧАА ЛОНДОНГИЙН АРБИТРИЙН ШҮҮХИЙН ЭСРЭГ АЖИЛЛАХЫГ ЗАВДСАН УУ

       Тэгвэл сүүлийн өдрүүдэд өрөө төлж дуусаагүй “Алтайн хүдэр” ХХК-ийн экспортод тавьсан хоригийг хууль бусаар цуцлахыг завдсан байж болзошгүй гэх мэдээлэл ирлээ. Нийслэлийн шүүхийн шийдвэрийн гүйцэтгэх газрын дэд дарга С.Бямбарагчаа “баян” Базараагаас хахууль авч, Лондонгийн Олон улсын арбитрын шүүхийн шийдвэрийг зөрчихөөр санаархсан байж болзошгүй гэнэ.

Эх сурвалжийн бидэнд өгсөн мэдээллээр “Нийслэлийн шүүхийн шийдвэрийн гүйцэтгэх газрын дэд дарга С.Бямбарагчаа эрх мэдэл, албан тушаалын байдлаа урвуулан ашиглаж, “Алтайн хүдэр” ХХК-ийн экспортыг хорих цуцлах албан бичиг үйлдэх даалгавар өгсөн юм билээ. Ажилтнуудаа дарамталж, дээрээс ийм даалгавар ирсэн. Айх хэрэггүй, бүгдийг нь бэлдсэн зэргээр сүрдүүлсэн байж болзошгүй. Үүнтэй холбоотой гомдол, мэдээлэл хууль хяналтын байгууллагад ирээд, шалгаж эхэлж байгаа” гэсэн юм.

НШШГГ-ЫН ДЭД ДАРГА С.БЯМБАРАГЧАА: “АЛТАЙН ХҮДЭР” ХХК-Д ДАВУУ БАЙДАЛ ОЛГООГҮЙ

Бид энэ хэргийн талаар Нийслэлийн шүүхийн шийдвэрийн гүйцэтгэх газрын дэд дарга С.Бямбарагчаагаас тодрууллаа.

Тэрбээр “Экспортын хоригтой байгаа “Алтайн хүдэр” ХХК-д давуу байдал олгож, хууль бусаар хоригийг нь цуцлахыг санаархсан зүйл байхгүй. Шаардлагатай бол албан ёсны газарт нь хандаад, энэ талаарх мэдээллийг аваарай” хэмээн эсэргүүцсэн юм.

Ямартай ч Нийслэлийн шүүхийн шийдвэрийн гүйцэтгэх газрын дэд дарга С.Бямбарагчааг хууль хяналты байгууллагаас эрх мэдэл, албан тушаалын байдлаа урвуулан ашиглаж, бусдад давуу байдал олгосон эсэхийг шалгаж тогтооно. Мөн “Алтайн хүдэр” ХХК-ийн холбогдох албан тушаалтнуудыг ч шалгаж эхлэх бололтой.

Ташрамд дурдахад, “Алтайн хүдэр” ХХК-ийн экспортын хоригийг хууль бусаар цуцлах “даалгавар”-ыг Үндэсний аюулгүй байдлын зөвлөлөөс Шүүхийн шийдвэр гүйцэтгэх ерөнхий газрын дэд дарга бөгөөд Шийдвэр гүйцэтгэх албаны дарга, хурандаа Ч.Оюунцэцэгт өгсөн байж болзошгүй ажээ.

Бид энэ талаар эргэн мэдээлэх болно.