УИХ-ын гишүүн Б.Дэлгэрсайханыг АТГ-аас шалгаж эхэлсэн гэв үү

2023-07-31, 2576

УИХ-ын гишүүн Б.Дэлгэрсайхан эрх мэдэл, албан тушаалаа урвуулан ашиглаж, өөрийн хамаарал бүхий компанид давуу эрх олгож байж болзошгүй талаар Эргэлт.мн мэдээллийн сайт цуврал сурвалжилгаараа хүргэсэн. Үүнтэй холбоотойгоор хууль, хяналтын байгууллагаас нэр бүхий албан тушаалтныг ажлаас нь чөлөөлж, цагдан хорих хүртэл арга хэмжээ авсан байдаг. Тэгвэл энэ удаад УИХ-ын гишүүн Б.Дэлгэрсайханыг эрх мэдэл, албан тушаалаа урвуулан ашигласан байж болзошгүй үндэслэлээр АТГ-аас шалгаж эхэлсэн талаар эх сурвалж мэдээллээ.

-УИХ-ЫН ГИШҮҮН Б.ДЭЛГЭРСАЙХАН ТУСЛАХ Б.БАЯРЖАРГАЛЫНХАА “ДӨРӨВДҮГЭЭР ЭМНЭЛЭГ”-ИЙГ ХӨГЖЛИЙН БАНКАНД ХУРААГДАХААС ХАМГААЛЖ БАЙГАА ЮУ-

УИХ-ын гишүүн асан М.Билэгт “Ачлал трейд” ХХК-иараа 2017 онд Хөгжлийн банкнаас 15 сая ам.долларын зээл авч, ХСҮТ-ийн хашаанд 120 ортой, 13 давхар, эмнэлгийн зориулалтай барилга ашиглалтад оруулсан. Гэвч өнгөрсөн зургаан жил зээлээ огт төлөөгүй, өдгөө өр төлбөр нь 77 тэрбум төгрөгт хүрчихээд байгаа. Өнгөрсөн хаврын өдийд Хөгжлийн банкны найдваргүй зээлдэгчдийн асуудал яригдаж эхлэхэд л М.Билэгтийн 13 давхар эмнэлгийн барилгыг өрөнд нь хурааж авах яриа гарсан, гэвч яаж шийдэгдэх нь тодорхойгүй өдий хүрч байна. Тэгвэл М.Билэгтийн 13 давхар эмнэлгийн барилгыг УИХ-ын гишүүн Б.Дэлгэрсайханы туслах, хувийн компаниудынх нь захирлаар ажилладаг Б.Баяржаргал гэгч залуу төрсөн эгч Б.Золжаргалын хамт 20 жилийн хугацаатай түрээслэхээр гэрээ байгуулжээ. Улмаар 20 орчим тэрбум төгрөгийн тоног төхөөрөмжөөр тохижуулж, “Дөрөвдүгээр эмнэлэг” нэртэйгээр үйл ажиллагаа явуулж байгаа юм. Хамгийн ноцтой нь, УИХ-ын гишүүн Б.Дэлгэрсайхан өөрөө “Дөрөвдүгээр эмнэлэг”-ийн нууц хөрөнгө оруулагч, Хөгжлийн банканд хураагдахаас нь хамгаалж буй гол хүн байж болзошгүй сэжүүрүүд байна.

УИХ-ын гишүүн Б.Дэлгэрсайханы хамаг л хар бор ажлуудыг нь хариуцдаг туслах, хувийн компанийнх нь гүйцэтгэх захирлаар ажилладаг Банзрагчийн Баяржаргал гэгч залуу бий. Эрхүүгийн Зам харилцааны Их сургуулийг 2010 онд Төмөр замын ачаа тээврийн удирдлага, төмөр замын инженер мэргэжлээр төгссөн. Төгсөж ирмэгцээ Б.Дэлгэрсайханы “Болд төмөр ерөө гол” ХХК-ийн Тээврийн газрын даргаар ажиллаж эхэлсэн. Улмаар Б.Дэлгэрсайханыг 2016 онд УИХ-ын гишүүн болмогц туслахаар нь ажиллаж эхэлсэн байдаг.

Б.Баяржаргал Б.Дэлгэрсайханы туслахаар ажиллаж байхдаа хууль бус мөнгө угаалтыг нь ч хариуцаж байсан байж болзошгүй баримт бий. Тодруулбал, 2018 онд Эрүүгийн цагдаагийн албаны мөрдөгчид тухайн үеийн “УБТЗ” ХНН-ийн дарга Д.Жигжиднямаагийн хууль бус мөнгө угаалтын мөрөөр орж, мөрдөн шалгах ажиллагаа эхлүүлснээ зарлаж байв. Мөрдлөгийн явцад “УБТЗ” ХНН-ийн дарга Д.Жигжиднямаагийн дүү Ц.Жүгдэрнямын Хонгконгод байгуулсан “Glass Trading Limited” компанийн данснаас “Скай профешнл ложистик” ХХК-ийн данс руу 7.5 сая ам.доллар шилжүүлсэн баримт илэрсэн. Улмаар 2018 оны тавдугаар сард “Скай профешнл” ХХК-ийн оффист Эрүүгийн цагдаагийн мөрдөгчид нэгжлэг хийж байв. Оффисын барилгуудын цонх угаах, өрөө тасалгаа цэвэрлэх үйлчилгээ үзүүлдэг “Скай профешнл ложистик” гэх жижигхэн компанийн данс руу оффшор бүсээс 7.5 сая ам.доллар шилжиж орж ирсэн нь тухайн үедээ л том дуулиан болж байсан юм. Тэгвэл “Скай профешнл ложистик” ХХК-ийг Б.Дэлгэрсайхан туслах Б.Баяржаргал, түүний төрсөн эгч Б.Золжаргал нар эзэмшдэг. “УБТЗ” ХНН-ийн дарга асан Д.Жигжиднямаа, “УБТЗ” ХНН-т хувийн вагонуудаа түрээслүүлдэг УИХ-ын гишүүн Б.Дэлгэрсайхан хоёрын хоршил хамтралын түүхийг бичвэл цаг, цаас их орно. Товчхондоо, Б.Дэлгэрсайхан, Д.Жигжиднямаа агсан хоёрын төмөр замын хууль бус мөнгө угаалтыг Б.Дэлгэрсайханы туслах Б.Баяржаргал хариуцаж ирсэн байж болзошгүй гэсэн үг.

Тайлбар: 2016 оны тавдугаар сар. Тухайн үеийн "УБТЗ" ХНН-ийн дарга Д.Жигжиднямаа, "Болдтөмөр ерөөгол" ХХК-ийн Тээврийн албаны дарга, Б.Дэлгэрсайханы туслах Б.Баяржаргалын нарын уулзалт

Хамгийн сүүлд, 2021 онд УИХ-ын гишүүн Б.Дэлгэрсайхан өөрийн төрсөн ах Б.Ганхуягийнхаа төрсөн хүү Г.Гантулгын нэр дээр “Монголиан транс лайн” ХХК-ийг байгуулж, гүйцэтгэх захирлаар нь туслах Б.Баяржаргалыгаа томилсон. Улмаар Б.Дэлгэрсайхан 2022 онд “Монголиан транс лайн” ХХК-ийн нэрээр Засгийн газартай концессын гэрээ байгуулж, Зүүнбаян-Ханги чиглэлийн 226.9 км төмөр замыг тус компаниар бариулж, өнгөрөгч 2022 оны арваннэгдүгээр сард нээлтээ хийсэн. Зүүнбаян-Ханги төмөр замын нээлтийн үеэр Б.Дэлгэрсайханы туслах Б.Баяржаргал нь “Монголиан транс лайн” ХХК-ийн захирлын хувиар Ерөнхий сайд Л.Оюун-Эрдэнэ, Зам, тээврийн хөгжлийн сайд С.Бямбацогт нартай хамт хүндэтгэлийн индэрт заларч, тууз хайчилж байлаа.

Тайлбар: 2022 оны арваннэгдүгээр сар. Зүүнбаян-Ханги чиглэлийн төмөр замын нээлтийн ёслол- Л.Оюун-эрдэнэ, С.Бямбацогт, Ч.Хүрэлбаатар, Б.Дэлгэрсайхан, түүний туслах Б.Баяржаргал нар

Товчхондоо, УИХ-ын гишүүн Б.Дэлгэрсайхан өнгөрсөн хугацаанд Б.Баяржаргал гэх залууг хувийн туслахаараа ажиллуулж, хууль бус мөнгө угаалт гэх мэтийн хар бор ажлуудаа хариуцуулж, төртэй холбоотой төмөр замын бизнесээ ч түүнд даатгаж ирсэн нь дээрх баримтуудаас тодорхой харагдана. Сонирхуулахад, УИХ-ын гишүүн Б.Дэлгэрсайханы төрсөн хүү нь түүний туслах Б.Баяржаргалтай нас ойролцоо. Өдгөө хотын төв, Зайсан орчимд таван салбартай кофе шоп ажиллуулдаг. Харин хамтрагч нь Дорноговь дахь асар том нүүрсний орд руу хөтөлдөг юм билээ. Энэ тухай дараагийн дугаарт дэлгэрүүлнэ.

Тэгвэл Б.Дэлгэрсайханы туслах, төмөр замын компанийг нь хариуцдаг Б.Баяржаргал нь 2021 онд төрсөн эгч Б.Золжаргалтайгаа хамтран “Дөрөвдүгээр эмнэлэг” ХХК-ийг байгуулжээ. Улмаар УИХ-ын гишүүн асан М.Билэгтийн Хөгжлийн банкны зээлээр барьсан 13 давхар эмнэлгийн зориулалттай барилгыг нь 20 жилийн хугацаатай түрээслэх түрээсийн гэрээ байгуулжээ. Ингээд 20 орчим тэрбум төгрөгийн хөрөнгө оруулалт хийж, эмнэлгийн тоног төхөөрөмжөөр иж бүрэн тохижуулж, өнгөрөгч 2022 оны нэгдүгээр сараас “Дөрөвдүгээр эмнэлэг” нэртэйгээр үйл ажиллагаа явуулж эхэлсэн байна. Төрийн түшээгийн туслах ажилтай, төмөр замын инженер мэргэжилтэй Б.Баяржаргал цагаан халад өмсөж, эмчийн дүрд орчихсон “Дөрөвдүгээр эмнэлэг”-ийн Төлөөлөн удирдах зөвлөлийн даргаар ажиллаж байгаа ажээ. Төрсөн эгч Б.Золжаргал нь ч эрүүл мэндийн салбараас тэс хөндий, маркетингийн менежер мэргэжилтэй боловч “Дөрөвдүгээр эмнэлэг”-ийн Гүйцэтгэх захирлаар ажиллаж байгаа. Сонирхуулахад, Б.Золжаргалын нөхөр Д.Одгэрэл нь БШУЯ-ны Инноваци, технологийн газрын даргаар ажилладаг юм билээ.

Тайлбар: "Дөрөвдүгээр эмнэлэг"-ийн ТУЗ-ийн дарга Б.Баяржаргал, түүний төрсөн эгч, Гүйцэтгэх захирал Б.Золжаргал нар

Хамгийн ноцтой нь, УИХ-ын гишүүн Б.Дэлгэрсайханы туслах Б.Баяржаргал, түүний төрсөн эгч Б.Золжаргал нар яаж М.Билэгтийн 13 давхар барилгыг 20 жилээр түрээсэлж, 20 тэрбум төгрөгөөр тоног төхөөрөмж авсан бэ гэдэг асуудал. Баримтаар бол, Б.Баяржаргал, Б.Золжаргал нар “Дөрөвдүгээр эмнэлэг”-ийг байгуулахаасаа ердөө жилийн өмнө буюу 2020 онд дээр дурдсан цэвэрлэгээний “Скай профешнл холдинг” ХХК-ийнхаа ажилчдын нийгмийн даатгалын 57 сая төгрөгийн ч төлөх санхүүгийн чадамжгүй байжээ. Тухайлбал, Чингэлтэй дүүргийн Нийгмийн даатгалын хэлтсээс 2020 онд Б.Баяржаргал, Б.Золжаргал нарын “Скай профешнл холдинг” ХХК-аас нийгмийн даатгалын өр 36.6 сая төгрөг, алданги 11.7 сая төгрөг буюу нийт 57.9 сая төгрөг нэхэмжилж шүүхэд хандаж байжээ. Харин Б.Баяржаргал, Б.Золжаргал нар шүүхэд “Манай “Скай профешнл холдинг” ХХК нь санхүүгийн хүнд байдалд орж, огт орлогогүй болсон. Тиймээс ажилчдынхаа нийгмийн даатгалын шимтгэлийг төлөх боломж олдоогүй. Гэхдээ бид нийгмийн даатгалын шимтгэлийн өр болох 36.6 сая төгрөгийг 2020 онд төлөхөөр хичээж байгаа. Харин алданги 11.7 сая төгрөгийн төлөх санхүүгийн боломж байхгүй” гэсэн тайлбар хийж байжээ. Улмаар Сүхбаатар дүүргийн Иргэний хэргийн анхан шатны шүүхээс 2020 оны нэгдүгээр сарын 9-нд “Скай профешнл холдинг” ХХК-аас санхүүгийн чадамжгүй байдлыг нь үл харгалзан нийгмийн даатгалын өр, алданги 57.9 сая төгрөгийг гаргуулж, Чингэлтэй дүүргийн Нийгмийн даатгалын хэлтэст олгуулахаар шийдвэрлэж байсан аж.

Тэгэхээр Б.Золжаргал, Б.Баяржаргалын нар 2020 онд ажилчдынхаа нийгмийн даатгалын шимтгэлийн 57 сая төгрөгийг ч төлөх чадамжгүй байжээ гэсэн үг. Гэтэл ердөө жилийн дараа 2021 онд яаж “Дөрөвдүгээр эмнэлэг” ХХК-ийг байгуулж, УИХ-ын гишүүн асан М.Билэгтээс 13 давхар барилгыг нь 20 жилээр түрээсэлж, 20 тэрбум төгрөгийн тоног төхөөрөмжөөр тохижуулсан байж таарах вэ.

Өөрөөр хэлбэл, УИХ-ын гишүүн Б.Дэлгэрсайхан хувийн туслахаар нь ажиллаж, хамаг ажлыг нь хариуцаж ирсэн Б.Баяржаргалдаа “Дөрөвдүгээр эмнэлэг”-ийг байгуулахад нь санхүүжилт өгсөн байж болзошгүй гэсэн үг. Туслахыг нь хийж, төмөр замын компанийг нь удирдаж ирснийх нь хариу бэлэг ч байж болно. Энэ өнцгөөс харвал, УИХ-ын гишүүн асан М.Билэгтийн Хөгжлийн банкны 77 тэрбум төгрөгийн өрийн асуудал нэг тийш шийдэгдэхгүй, 13 давхар барилгыг нь өрөнд нь хураах эсэх асуудал ч төрийн түвшинд гацчихаад байгаагийн цаана УИХ-ын гишүүн Б.Дэлгэрсайхан байж болзошгүй буюу туслах Б.Баяржаргалынхаа “Дөрөвдүгээр эмнэлэг”-ийг хамгаалж байгаа дүр зураг харагдаж байгаа юм.

УИХ-ЫН ГИШҮҮН Б.ДЭЛГЭРСАЙХАНЫ ТАВИУЛ, “ШИВЭЭ ОВОО” ХК-ИЙН ГҮЙЦЭТГЭХ ЗАХИРАЛ Ц.ЭНХТҮВШИНГИЙН ТЕНДЕР ТҮҮЖ, ТӨСӨВ ХОНХОЙЛГОДОГ НОЦТОЙ БАРИМТ

Төрийн өмчит “Эрдэнэс Монгол” ХХК-ийн харьяа, 33 жилийн түүхтэй “Шивээ овоо” ХК-ийн Гүйцэтгэх захирлаар Завхан аймгийн уугуул Цэдэндамбын Энхтүвшин гэгчийг 2017 оны тавдугаар сард томилсон. Анх томилогдохдоо л “УИХ-ын гишүүн Б.Дэлгэрсайханы шахааны хүн” гэх хаягтай, шошготой очиж байв, “Шивээ овоо” ХК-д. Судлаад үзвэл, УИХ-ын гишүүн Б.Дэлгэрсайхан, “Шивээ овоо” ХК-ийн гүйцэтгэх захирал Ц.Энхтүвшин хоёр үнэхээр л эртний найзууд ажээ. Тодруулбал, Б.Дэлгэрсайхан, Ц.Энхтүвшин хоёр 1987 онд НАХЯ-ны дэргэдэх Цэргийн дээд сургууль буюу одоогийн Хууль сахиулах их сургуулийг хуульч мэргэжлээр хамт төгсжээ. Улмаар 1987 ондоо Б.Дэлгэрсайхан нь Дорноговь аймгийн Цагдаагийн хэлтэст мөрдөн байцаагчаар, Ц.Энхтүвшин нь Завхан аймгийн Цагдаагийн хэлтэст эрүүгийн төлөөлөгчөөр тус тус томилогдож очсон байгаа юм. Тэдний нөхөрлөл үргэлжилсээр, 2016 онд УИХ-ын гишүүн болсон Б.Дэлгэрсайхан Ц.Энхтүвшинг Замын-Үүдийн Гаалийн газарт албаны даргаар түр томилуулж, улмаар 2017 оны тавдугаар сард “Шивээ овоо” ХК-ийн Гүйцэтгэх захирал болгож дэвшүүлсэн ажээ. Хариуд нь Ц.Энхтүвшин 2020 оны УИХ-ын сонгуулиар Б.Дэлгэрсайханы Ерөнхий менежерээр ажиллаж, хүн хүч, хөрөнгө мөнгийг нь хариуцаж байжээ.

Хамгийн ноцтой нь, Ц.Энхтүвшинг “Шивээ овоо” ХК-ийн Гүйцэтгэх захирал болсноос хойш тус компани туж алдагдалтай, өртэй ажиллаж байгаа. 2021 онд л гэхэд Шивээ овоо” ХК 8.0 тэрбум төгрөгийн алдагдалтай ажиллаж, татварт 11 тэрбум төгрөгийн өртэй гарсан. Гэтэл удирдаж буй төрийн компани нь ийнхүү дампуурлаа зарлах хэмжээнд хасахтай ажиллаж байхад Ц.Энхтүвшингийн хувийн компани нь тендер түүж, төсөв хонхойлж, түүхэнд байгаагүйгээрээ ашигтай ажиллаж буй ажээ.

Тодруулбал, “Шивээ овоо” ХК-ийн гүйцэтгэх захирал Ц.Энхтүвшин 2020 оны нэгдүгээр сард өөрийн эхнэр О.Оюун-Ундрахыг төрсөн дүү нар болох Ц.Энхтөр, Ц.Энхтайван нарынхаа үүсгэн байгуулсан “Мон Тиско” ХХК-ийн хувьцаа эзэмшигч болгожээ. Энэ компани анх 2014 онд байгуулагдсан боловч үйл ажиллагаа явуулдаггүй, “X” тайлан өгдөг, “цүнхний” компани байсан аж. Гэтэл “Мон тиско” ХХК 2020 оны нэгдүгээр сард “Шивээ овоо” ХК-ийн гүйцэтгэх захирал Ц.Энхтүвшингийн эхнэр О.Оюун-Ундрахын мэдэлд ирмэгцээ “Багануур” ХК, “Монголросцветмет” ТӨҮГ, “Шивээ овоо” ХК, “Эрдэнэс тавантолгой” ХК, “Эрдэнэт үйлдвэр” ТӨҮГ-ын тендерүүдэд тасралтгүй оролцож, төвөшгүй шалгарч эхэлсэн байна. Тухайлбал,

“Багануур” ХК-ийн “Дугуй САТ/27.00R49/” нийлүүлэх 2.2 тэрбум төгрөгийн тендер,
“САТ-777 дугуй” нийлүүлэх 1.3 тэрбум төгрөгийн тендер,
“Дугуйт ачигчийн дугуй” нийлүүлэх 208 сая төгрөгийн тендер,
“Нүүрс тээвэр болон туслах тоног төхөөрөмжийн дугуй” нийлүүлэх 486 сая төгрөгийн тендер,
“Эрдэнэс тавантолгой” ХК-ийн “Хүнд машин механизмын дугуй засвар”-ын 74.3 сая төгрөгийн тендер
“Дугуй засварын үйлчилгээнд шаардлагатай материал”-ын 41.8 сая төгрөгийн тендер зэрэгт тус тус шалгарчээ.

Тайлбар: "Мон Тиско" ХХК-ийг Ц.Энхтүвшингийн төрсөн дүү Ц.Энхтөр, Ц.Энхтайван болон эхнэр О.Оюун-Ундрах эзэмшдэг баримт, УБЕГ

Тайлбар: "Багануур" ХК-ийн 2.2 тэрбум төгрөгийн тендерт Ц.Энхтүвшингийн "Мон Тиско" ХХК шалгарсан баримт

Тайлбар: "Эрдэнэс тавантолгой" ХК-ийн "Дугуй засварын үйлчилгээнд шаардлагатай материал нийлүүлэх" тендерт "Мон Тиско" ХХК шалгарч, гэрээ байгуулсан баримт

Мөн Ц.Энхтүвшин өнгөрөгч 2022 оны хоёрдугаар сард өөрийн удирдаж буй “Шивээ овоо” ХК-ийнхаа “Технологийн автомашины дугуй” нийлүүлэх 1.0 тэрбум төгрөгийн тендерт төрсөн дүү нар болон эхнэрийнхээ “Мон Тиско” ХХК-ийг оролцуулаад амжжээ.

АТГ-ын ХОМ-ээс шүүж үзвэл, Ц.Энхтүвшин 2017 онд “Шивээ овоо” ХК-ийн гүйцэтгэх захирлаар томилогдох үедээ жилд 64 сая төгрөгийн орлоготой, 71 сая төгрөгийн хадгаламжтай хэмээн мэдүүлж байжээ. Гэтэл эхнэр, дүү нарынхаа нэр дээрх “Мон Тиско” ХХК-аараа төрийн тендерүүдийг түүж эхэлснээсээ хойш орлого, хадгаламж нь огцом өсөж, 2020 оны ХОМ-тээ жилд 567 сая төгрөгийн орлогтой, 384 сая төгрөгийн хадгаламжтай, 523 сая төгрөгийн авлагатай хэмээн мэдүүлжээ. Өөрөөр хэлбэл, “Шивээ овоо” ХК-ийн гүйцэтгэх захирал Ц.Энхтүвшингийн жилийн орлого нь найм дахин, хадгаламж нь тав дахин нэмэгдэж, түүгээр зогсохгүй бусдаас хагас тэрбумын авлагатай болтлоо хөлжиж, хөрөнгөжжээ.

УИХ-ын гишүүн Б.Дэлгэрсайханыг АТГ-аас шалгаж эхэлсэн гэв үү

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 6

Сэтгэгдэл үлдээсэн: 2023-08-01 09:32:29

bayarlallaal: delgersaikhan Dornogobi aimgiin buh business bulaaj bga, 1 shalgaad shiidsen dr bhaa
Сэтгэгдэл үлдээсэн: 2023-07-31 23:08:32

Зочин : МАН-д шудрага хөдөлмөр хийж баяжсан хүн даанч байхгүй юм даа. дандаа хогийн хулгайч луйварчид.
Сэтгэгдэл үлдээсэн: 2023-07-31 21:53:45

Иргэн: Дэлгэрсайхан гэгч луйварчинг шалгаж нүглмйн үүрүүлэх цаг нь болсондоо
Сэтгэгдэл үлдээсэн: 2023-07-31 14:22:32

Иргэн: Ташаа мэдээлэл байна. Ачлалтрейд компани нь ХБанкнаас 15 сая$ тухайн үеийн ханшаар 36.8тэрбум₮ зээлж, 5-н жилийн хугацаанд 75тэрбум₮ болгож төлж байгаагийнхаа 34.8тэрбум₮ -ийг буюу нийт эргэн төлөх дүнгийнхээ 48%-ийг нь төлчихөөд байгаа тухайн мэдээлэл хэвлэлд өнөөдөр мэдээ байна лээ шүү. Билэгт гуай ХБанкнаас зээл авч ОСууц барьж худэлдаагүй, эмнэлэг барьж ашиглалтад оруулаад одоо Дөрөвдүгээр эмнэлэгт 300 гаруй эмч эмнэлгийн ажилтан шинэ ажлын байраар хангагдан ажиллаж байгаа.
Сэтгэгдэл үлдээсэн: 2023-07-31 09:50:18

Төөгөө: Дэндүү тодорхой юм байна шүү дээ шоронд нь явуулаач.
Сэтгэгдэл үлдээсэн: 2023-07-31 09:48:17

Алтангэрэл: Яаж шийдэхийг нь нүд цавчилгүй харж л байя

Шинэ мэдээ

Нийтлэлчид