...Дөрвөн улирлын дэлгэр өдрүүдийг өртөөлөн түүчээлсээр бидний байгуулсан Эргэлт.мн мэдээллийн сайт уншигч тантай хамт таван нас хүрлээ. Өдийгөөс таван жилийн өмнө Монголын сэтгүүл зүй гэх их айлд өрх тусгаарлаж, дөрөө нийлүүлэн байхдаа өнөөдрийн Эргэлтийг бүтээх юм сан гэж бид яарч, догдолж, сандарч, адгахын хэрээр мөрөөдөж байлаа. Учир нь, бидэнд мэдээллийн сайт гэх ертөнцөд шинэ цагийн салхи сэвэлзүүлж, жишиг тогтоох мэргэжлийн амбиц тэртээх өдрүүдээс л дүрэлзэж байсан билээ.

    Эргэлт.мн мэдээллийн сайтын хамт олон нь сэтгүүл зүйн шилдэг бүтээлд олгодог “Балдорж” сангийн шилдэг төслийн уралдаанд “Ковид-19” ба монголчуудын амьдрал” төслөөрөө шалгарч, Монголын “Балдорж” шагналт анхны редакц болсон билээ. Түүнчлэн тус сайтын хамт олон нь 2021 оны шилдэг мэдээллийн сайтаар шалгарч, МСНЭ-ийн “Ган үзэг” шагналт редакц болсон юм. Мөн манай сэтгүүлч Б.Цогтбаяр, Д.Чанцалдулам, Б.Бадралмаа, Б.Гүнжид, Д.Бямбасүрэн, М.Бат-Эрдэнэ, О.Эрдэнэтунгалаг, Б.Хонгорзул нар сэтгүүл зүйн даацтай, чансаа өндөр уралдаануудад оролцож, тэргүүн байрт ээлж дараалан шалгарч ирлээ.  

Мөн Эргэлт.мн мэдээллийн сайт сэтгүүлч, уран бүтээлчдийнхээ шилдгийн шилдэг бүтээлүүдийг 2021 онд эмхэтгэн “ЭРГЭЛТИЙН НОМЫН САН” цуврал 10 ном бүтээж, уншигчдын хүртээл болгосон. Уг цуврал нь нийтлэл, ярилцлага, хөрөг, тэмдэглэл, сурвалжилга тэргүүтэй сэтгүүл зүйн бичлэгийн бүх төрлөөр бичсэн бүтээлүүдийг цогцоор нь багтаан гаргаснаараа онцлог. Тиймээс энэхүү “ЭРГЭЛТИЙН НОМЫН САН” цуврал нь нэг редакцаас “төрсөн” бүтээлүүдийн цуврал гэдгээрээ Монголын сэтгүүл зүйн салбарт анхдагч болсон юм.

       Үүгээр ч зогсохгүй эргэлтийнхэн таван жилийн хугацаанд сэтгүүл зүйн бүтээлүүдийг баринтагласан “Эргэлт” эрэн сурвалжлах сэтгүүлийн дөрвөн дугаарыг уншигчдын хүртээл болгоод байна. Бидний бүтээсэн “Эргэлт” сэтгүүл Монголын уншигчдын таашаалд нийцэхийн сацуу МСНЭ-ийн “Ган үзэг” шагналыг хүртсэн амжилттайгаар таван жилийн ойгоо угтаж байна.

 Бүтээлээс бүтээлийн хооронд дүүлж, жигүүрлэж явахдаа он цагийн урсгалд гэрч болон үлдэх “Монголын шилдэг нийтлэл” 108 ботийн 74 дүгээр ботид Ерөнхий эрхлэгч Э.Хүрэлбаатарын эрэн сурвалжлах бүтээлүүд багтсан бол 88 дугаар ботийн нэг, хоёрдугаарт Эргэлт.мн мэдээллийн сайтын сэтгүүлч, уран бүтээлчдийн оргил бүтээлүүд багтан уншигчдын хүртээл болоод байна.

       Хэзээ ч уншсан амь халуунаараа орших сэтгүүл зүйн даацтай бүтээлүүдээс гадна Эргэлт.мн мэдээллийн сайтын сэтгүүлч, яруу найрагчид хамтран “Дөрвөн өөр намар” шүлгийн түүврийг ч уншигч танд хүргэжээ. Гэрэлт залуу нас, гэнэн өдрүүд, гэгээн дурсамж бүхнээ он цагийн түүхээр өртөөлүүлээд, номын шаргал хуудсанд үүрд үлдээлээ. Түүнчлэн сэтгүүл зүйн бичлэгийн бүх төрлийг багтаасан 40 нүүртэй “Эргэлт” сонин уншигч таны гарт хүрээд хэдийнэ 700 гаруй өдрийг үджээ.

Тэртээх өдрүүдээс өнөөдрийг хүртэл хамт байсан, ирээдүйн гэрэлт өдрүүдэд ч хамтдаа байх Эргэлт.мн мэдээллийн сайтын оюунлаг уншигч танд таван жилийн ойн баярын мэнд хүргэе.

Эргэлт.мн мэдээллийн сайтын хамт олон

Оюунлаг ирээдүйн төлөө