Монгол Улсын өсөх идэр харцага Бадрахын аав Ганцогт Хэнтий нутгийн бөхчүүдийн төлөө амьдралынхаа 20 гаруй жилийг зориулж яваа нэгэн. Тэртээ 2003 онд Батширээт сумын Үндэсний бөхийн холбоог үүсгэн байгуулж, Хэнтий нутгийн хойд сумдаас зүлэг ногоон дэвжээний хойморьт гараад дэвдэг, дэвээд давдаг улсын цолтой бөхтэй болох мөрөөдөл өвөртлөөд саяхныг хүртэл залбирч, зангирч явсан эгэл жирийн аав. Тэрсхэн хоёр хүүгээ өөдөсхөн байхаас нь бөхийн спортод шамдуулах гэж тэр залуухан байхаасаа зүтгэсэн. Сумандаа сонин, хэвлэл захиалж, тэр болгоныгоо хөвгүүддээ ярьж, зааж сургасаар л байлаа. Зүтгэл нь ч талаар өнгөрөөгүй. Том хүү Бадрал авто спортоор хичээллэж, бага хүү Бадрах нь “Хэнтий аймгийн Батширээт сумын харьяат, Монголын Улсын өсөх идэр харцага Ганцогтын Бадрах” гэж зарлуулах болжээ.  Түүний энэ л 20 гаруй жилийн мөрөөдөл, хүсэл бүхнийг нь биелүүлэх хүчтэн Батширээт сумаас нь, Буриад зон олон дундаас нь төрөн гараад зогсохгүй, хүү Бадрах нь байсан нь хэчнээн бахархалтай байсан бол..  

Тулгар төрийн 2234 жил, Их Монгол Улсын 819 жил, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ой, Үндэсний их баяр наадамд зориулан Эргэлт.мн мэдээллийн сайтын “Бөхийн аав” нэвтрүүлэгийнхээ  хойморт Монгол Улсын өсөх идэр харцага Бадрахын аав Гантөмөрийн Ганцогтыг урьж оролцууллаа.

Г.Ганцогт ах жил жилийн наадмаар хүүгийнхээ захыг мушгиад, сумынхаа тахилгатай овооны энгэрт сан багиулаад сууж байдаг юм билээ. Одоо ч тэр Батширээт овооныхоо энгэр бэлд наадмын чимээ чагнаад, хүүгийнхээ захыг мушгиад, сэвшээ салхин дунд сэтгэл нь тогтохгүй сууж байгаа биз ээ. Хүүтэйгээ наадмын дэвжээн дээр хамт давж, хамт унаж, сэтгэл догдлуулсан олон барилдааны гэрч болох ерөөл өргөе.  “Гараараа барилддаг Ганцогтын Бадрах” гэх хүчтэний хөдөлмөр, үндэсний бөхөд ухаангүй хайртай аавынх нь мөрөөдөл, зүтгэл хоёр улсын өндөр даваанд олон огтолцоно гэдэг огтхон ч эргэлзэхгүй байна.