Монголын анхны “Балдорж” шагналт редакц, МСНЭ-ийн “Ган үзэг” шагналт Эргэлт.мн мэдээллийн сайтын редакцаас эрхлэн гаргадаг “Эргэлт” сэтгүүлийн шинэ дугаар хэвлэлтээс гарлаа. Дэлхийн хэвлэлийн эрх чөлөөний өдөртэй зэрэгцэн уншигч таны гарт хүрч буй “Эргэлт” сэтгүүл нь сэтгүүл зүйн бичвэрийн бүх төрлийг багтаасан бөгөөд “Эргэлт.мн мэдээллийн сайтын дэргэдэх Эрэн сурвалжлах нэгдэл”, “Монголчуудын амьдрал”, “Эрэл баримт”, “Соёл урлаг”, “Дэлхийд”, “Спорт”, “Тэмдэглэл”, “Монголын гэрэлт ирээдүй”, “Залуус” гэсэн 10 орчим бүлгээс бүрдлээ. “Оюунлаг ирээдүйн төлөө” уриатай Эргэлт.мн мэдээллийн сайт нь “Эргэлт” сэтгүүлээ гурван жилийн өмнө өлгийдөж, уншигчдадаа хүргэж байлаа. Бид анхны дугаараа сэтгүүл зүйн нийтлэл, ярилцлага, хөрөг, тэмдэглэл, сурвалжилга тэргүүтэй 116 бүтээлийг цогцоор нь 342 хуудаст баринтаглаж, баримт, гэрэл зураг хавсаргаж, уншигч таны гарт хүргэж байсан билээ. Хоёр дахь дугаараа 449 хуудастайгаар, гурав дахь дугаараа 333 хуудастайгаар хэвлүүлж, уншигчдын гарт хүргээд байгаа. Харин таван жилийн ойдоо зориулсан дөрөв дэх дугаараа 650 хуудаст баринтаглаж уншигч таны хаврын өдрүүдэд “хань” болгохоор бид бүтээлээ.

    “Эргэлт” сэтгүүлийн шинэ дугаарт Монгол Улсын парламентын анхны 126 гишүүнийг улс төр бизнесийн бүлэглэлийн холбоо хамаарлаар нь нэг бүрчлэн задалж, хуудуутай, хууль бус баримтыг нь чухалчилан “ухаж”, иргэдийн боломжийг хумсалсан бараан түүхүүдийг нь хараат бусаар ил болгохыг зорьлоо. Манай сэтгүүлч, уран бүтээлчдийн сар, өдрүүдийг умартан хөдөлмөрлөж, улстөрчдийн өөрөөсөө нуусан баримтыг уншигч таны өмнө “өнгөт”-өөр хүргэхээр зорьсон зорилго ийн биеллээ олж байгааг дуулгахад таатай байна.  

      Монгол орны хойд хил дээр өглөө нарнаас үдшийн бүрий болтол хилээ хамгаалж, шинэхэн нарны бүлээн элчинд духныхаа хөлсийг сэврээж, амсхийх ч завгүй өргөсөн тангарагтаа үнэнчээр зүтгэх Минжийн хангайн хамгаалагч хилчдийг сурвалжлан тэмдэглэж, үүрийн гэгээнээс өөрийгөө умартан зүтгэх монголчуудын амьдралыг онцлохыг хичээлээ. Хотын төвөөс хоёр км-ийн цаахна талд амьдрахын төлөө шоргоолж шиг ажиллах монголчууд, хорвоо эргэхийн хэрээр түүх болон үлдэж буй хүмүүсийн амьдрал, ховор, сонин бүхнийг нэгэн зэрэг уншигч танд хүргэхээр манай сэтгүүлчид хичээн, хичээн ажилласныг цохон тэмдэглэн хэлж байгаадаа бид баяртай байна.

Гэрэл нь унтардаггүй “Ардын эрх”-ийн шар байшингийн гурван давхарт байрлах Эргэлт.мн мэдээллийн сайтын редакцаас монголчуудын хамгийн хайртай эрхэм зочдыг сорчлон хүргэхээс гадна, амьдралынхаа нэгэн жарныг Монгол хүний төлөө зориулсан Хамба Б.Чойжамцыг онцолсон нь учиртай.

     Мөн монголчуудыг төдийгүй япончуудыг уйлуулж, одоо ч дурсагдсаар байгаа Пүүжээ охины үнэн түүхийг, хөгжмийн нүргээн дундаас “мэндчилэх” Монголын сор болсон урлагийн авьяастнуудыг, одоо ч хайрлагдаж, үгүйлэгдсээр суугаа суутны үргэлжлэлийг “Эргэлт” сэтгүүлээс уншаарай. Монголын ирээдүй ямархан гэгээтэй, яруухан байгааг, залуусын мөрөөдөл хэрхэн өөрчлөгдөж байгааг уншигч та уншиж, догдлоорой.

Дэлхийн хэвлэлийн эрх чөлөөний өдрийн мэндийг “Эргэлт” сэтгүүлтэй хамт хүргэе. Эргэлт.мн мэдээллийн сайтын таван жилийн ойн мэндийг бидэнтэй үргэлж хамтдаа байдаг уншигч танд онцгойлон хүргэж, одоо ч бидэнд итгэсээр суугаад тань талархаж байгаагаа хэлье.