Онцгой байдлын нисдэг тэрэг Булган аймаг руу сайдуудыг зөөж байх хойгуур улсын хэмжээнд хэд хэдэн удаагийн түймэр гарч, аврагчид түймрийн голомт руу алхаж явсан гэх мэдээлэл цацагдаад байна.

Энэ талаар ОБЕГ-ын дарга Б.Ариунбуянгаас тодрууллаа.

-Булган аймаг руу ниссэн Онцгой байдлын нисдэг тэргийг аль яамны сайд түрээсэлж явсан юм бэ?

            -Манай байгууллагын нисдэг тэргийг ямар ч сайд хөлөглөж, түрээсэлж яваагүй. Ор үндэслэлгүй ташаа мэдээлэл байна.

            -Онцгойгийн зургаан хүний суудалтай нисдэг тэрэг Булган аймагт газардсан байгаа зураг хэвлэлээр цацагдаад байна. Хойд бүсийн чуулга уулзалт руу Б.Дэлгэрсайхан сайд түрээсэлж яваагүй юм уу?

            -Тийм зүйл байхгүй. Энэ нөхцөл байдалд нисдэг тэргээ түрээслэх боломжгүй. Булганд газардаад байгаа нисдэг тэрэг нь Хушаат суманд гарсан түймрийг агаараас ажиглаж байгаа багийнхан яваа. Түймрийн голомтод агаараас ажиглалт хийгээд ажиллаж байгаа гэсэн үг. Хүч хэрэгслээ хаана байрлуулах зэргээ агаараас хянаж байгаа юм. Шаардлагатай гэвэл хүнсний хангалт зөөвөрлөж, түймрийн голомтод хүрч ажиллахаар нисдэг тэрэг ашиглаж байгаа. Булган аймагт шатахуунаа цэнэглэх гээд буусан байж магадгүй. Шатахуунаа байнга цэнэглэнэ.

            -Өнөөдөр ниссэн юм уу?

            -Өчигдрөөс ажиллаж эхэлсэн. Бид түймрийн голомт руу бүс нутгийн бүрэлдэхүүнээ татаж, төвлөрүүлээд, тархалт байгаа хэсэгт байрлуулсан байгаа. Одоо бол асуудал байхгүй. Өнөөдөр 05:00 цагт Үндэсний аврах бригадаас 30 хүний бүрэлдэхүүнтэй бүлэг явуулсан. Одоо Дархан дөхөж байгаа байх. Бүрэлдэхүүн Хушаат суманд байрлаж, түймрийг унтраахаар бэлтгэлтэй байна.