“Хоёр настай хүүхдээ орхиод хотод ирсэн. Энд гацаад сар гаран болж байна. Хүүхэдтэйгээ утасаар ярихаас өөр арга алга” хэмээн нүдэндээ нулимс цийлэгнүүлэн ярих эмэгтэй шинжилгээнийх нь хариу гарахгүй удаж, хүлээгдэж байгаагийн улмаас арга ядан халдвартай бүс болох ХӨСҮТ-ийн гадна даарч, хөрөн зогсож байв. Ганцхан энэ эмэгтэй зогссонгүй. “Эгч нь нь хөгжлийн бэрхшээлтэй, сар гаран гэртээ очихгүй байна гэдэг ямар байх вэ, би хавар намрын хувцастай хөлдөж үхэх гээд байж байна”, “Нэг настай хүүхдээ айлд орхичихсон”, “Нэр шивэлт буруу хийчихээд шинжилгээний хариу алдаатай гээд гаргахгүй байна”, “Арванхоёрдугаар сарын 5-нд шинжилгээ өгсөн. Одоо болтол хариу нь гараагүй байна” гэх зэрэг маш олон асуудал, хүндрэлтэй иргэд аргаа баран халдвартай бүсэд цугларсныг бид сурвалжилсан юм.

УОК-оос энэ сарын 1-нээс өнөөдрийг хүртэлх хугацаанд орон нутгаас нийслэлд ирээд гацсан иргэдийг хотоос гаргах шийдвэр гаргасан. Гэтэл шинжилгээнийх нь хариу гарахгүй удаж, олон хоногоор хүлээгдэж байгаа иргэд нийтийн тээврээр зорчиж, орон нутагтаа очих боломжгүй байдалд хүрээд байна. Тэд замын унаа, таксигаар явъя гэвч өртөг нь тэнгэрт хаджээ. Тухайлбал, Дархан-Уул аймаг руу суудлын автомашин 100 мянган төгрөгөөр явж байгаа аж. Ажил орлого нь тасарч, айлд толгой хоргодож буй тэдний хувьд энэ өртгийг даах чадалгүй болоод байгаа юм. Бид орон нутгаас нийслэлд ирээд гацсан иргэдэд тулгамдаж асуудал болон байр суурийг нь тодрууллаа.