“Бүтээх агшин” булангийнхаа энэ удаагийн “хоймор”-т бид Монголын урчуудын эвлэлийн гишүүн, Соёлын тэргүүний ажилтан, модерн, абстракт чиглэлээр уран бүтээлээ туурвигч, залуу зураач Б.Батжинг урилаа.

Монголын дүрслэх урлагийн залгамж халаа тэрбээр өнөөдөр буюу энэ сарын 22-нд “Монгол арт” галерейд "Sound of leaves" уран зургийн бие даасан цахим үзэсгэлэнгээ дэлгээд буй бөгөөд үзэсгэлэндээ зориулсан бүтээлээ манай үзэгчдэд зурж үзүүлсэн нь энэ. Өнгөний олон шийдэл, өөрийнх нь толгойд эргэлдэх бодлууд түүний бүтээлд дүрээ олдог. Тиймээс ч тэрбээр “Хийсвэр сэтгэлгээний буюу абстракт уран зургууд нь хэзээ ч дахин давтах боломжгүй, цор ганц бүтээлүүд байдгаараа онцлог” хэмээн  ярьсан.

Б.Батжин 2012 онд СУИС-ийн Дүрслэх урлагийн дээд сургууль төгсөж, АНУ-ын Миссури мужийн их сургууль, Чикаго хотын BIR сургуульд мэргэжил дээшлүүлжээ. Америк, Герман, Швейцарь, Монголд нийт 10 орчим үзэсгэлэн гаргасан бөгөөд энэ удаагийнх нь түүний эх орондоо гаргаж байгаа тав дахь үзэсгэлэн юм.