“Баярлалаа” булангийн энэ удаагийн дугаарт Бүгд найрамдах Өмнөд Судан Улсад энхийг сахиулж буй Зэвсэгт хүчний 013 дугаар ангийн ахлагч Б.Бат-Эрдэнэ алс холоос оролцлоо. Тэрбээр 2019 оны аравдугаар сарын 5-нд эх орондоо тангараг өргөсөн эр цэргийн ёсоор нялх биетэй эхнэр, хоёр сар гаруйхантай хүүгээ үлдээгээд алс холын Африк тивд орших Өмнөд Судан Улсад үүрэг гүйцэтгэхээр зорьсон юм. Түүнээс хойш жил гаруйн хугацаа буюу 375 хоног өнгөрөөд байна. Энэ хугацаанд энхрий үр, халамжит ханьтайгаа цахим сүлжээгээр хааяа холбогдож, эр цэргийн үүргээ амжилттай гүйцэтгэж байгаагаа дуулгадаг ч сэтгэлийн үгээ хэлэх боломж тэр бүр олддоггүй гэдгээ хэлж байсан юм. Тиймээс манай редакцын  “Баярлалаа” булангийн зочноор оролцож, гэргий А.Жавзмаадаа сэтгэлийн үгээ уламжиллаа.