Энэ удаагийн "Баярлалаа" нэвтрүүлэгт Г.Сэр-Одын нэрэмжит шагналт яруу найрагч Э.Эрдэнэдалай оролцож байна. Тэрбээр өөрийн талархаж явдаг хүндээ баярласан сэтгэлээ манай "Баярлалаа" нэвтрүүлгээр дамжуулан хүргэхийг хүссэн юм. Дорнын говийн нэгэн аглагхан сууринд аж төрж, зохиол бүтээлээ туурвидаг Э.Эрдэнэдалай тэр бүр уулзаж чаддаггүй номын ах Төрийн шагналт зохиолч Р.Чойномын "Өд" сангийн тэргүүн, хэл шинжлэлийн ухааны доктор Д.Ганболд ахдаа чин сэтгэлийн мэндчилгээ дэвшүүлснийг эзэнд нь хүргэлээ. 

Тэдний хамтарч хийсэн хамгийн том бүтээл бол “Тан улсын шүлэг гурван зуун бадаг”, “Сүн улсын дуулал зуун бадаг” хэмээх хоёр боть юм.

            Ном бүтсэн түүхээс: Яруу найрагч А.Эрдэнэ-Очир 2009 оны өвөл яруу найрагч Э.Эрдэнэдалайг Монголын Зохиолчдын Эвлэлийн төв хэвлэл “Цог” сэтгүүлийн өрөөндөө дуудан ирүүлж, “Сүн улсын дуулал зуун бадаг” номыг Ломбын Нямаа ах (Монгол Улсын Соёлын гавьяат зүтгэлтэн, яруу найрагч, багш) авчирч өглөө. Даруйхан шинэ үсэгт буулгавал эрхлэн хэвлүүлэх талаар бодъё гэснээс хойш арваад жил улиран өнгөрчээ. Хэдийгээр энэ их үйлийг санаачилсан А.Эрдэнэ-Очир тэнгэрийн оронд заларсан ч түүний үйл хэргийг Э.Эрдэнэдалай, Д.Ганболд нар хичээнгүйлэн гүйцэлдүүлжээ.