Хөл  хорионы өдрүүдэд  нийслэлээс гарах болон орох тээврийн хэрэгсэл, иргэний зорчих хөдөлгөөнд Нийслэлийн мэргэжлийн хяналт, Онцгой байдал, Замын цагдаа, Нийслэлийн эрүүл мэндийн газрын мэргэжилтнүүд хяналт тавин ажиллаж байна. Авто тээврийн шалган нэвтрүүлэх товчоодоор зөвхөн үл хязгаарлалтад багтсан аж ахуй нэгж болон шинжилгээнд хамрагдсан хөдөө орон нутгийн иргэд нэвтэрч байгаа. Өнгөрсөн 24 цагийн хугацаанд  шалган нэвтрүүлэх товчоодоор албан ажил, эмнэлэг, эрүүл мэнд, ахуйн гачигдал, оршин суух гэрийн хаягаар, хүнс, шатахуун тээвэрлэлт хийж буй гэсэн шалтгаантай 1460 тээврийн хэрэгслээр 3056 зорчигч хот руу нэвтэрчээ. Харин  2088 тээврийн хэрэгслээр 7719 зорчигч хотоос гарсан байна. Нийт 10775 зорчигчид эрүүл мэндийн хяналт тавьж ажиллахад сэжигтэй тохиолдол илрээгүй байна.

Хэдийгээр Улаанбаатар хотын авто тээврийн товчоодоор нэвтэрч байгаа иргэдээс коронавирус илрээгүй сайн мэдээтэй байгаа ч иргэдийг шалгах нэрээр хүйтэнд удаан хүлээлгэж байгаа, орон нутгийн иргэдээс нэмэлт шинжилгээний хуудас шаардсан, оочер дараалал ихтэй зэрэг саар мэдээлэл, гомдол, шүүмжлэлүүд гарсаар байна. Өчигдөр л гэхэд Архангай аймгаас Улаанбаатар хот руу нэвтрэхээр "22-ын товчоо"-ны цаана хүлээж байсан 58 настай эмэгтэй О бие нь муудаж, түргэн тусламж авч чадалгүй нас барсан харамсалтай хэрэг гарсан юм. 

Иймд Ergelt.mn мэдээллийн сайт "22-ын товчоо"-нд иргэдийн зорчих хөдөлгөөн, хяналт шалгалт, нөхцөл байдал ямар байгаа талаар ФОТО СУРВАЛЖИЛГА бэлтгэлээ.