Алдахаас айдаггүй, залуу насандаа их зүйл туршиж, түүнээсээ суралцаж яваа 22 настай захирал, кино найруулагч, СУИС-ийн Кино найруулагчийн ангийн төгсөх курсийн оюутан, “Modernize entertainment”-ийн захирал Э.Наранболдтой хэрхэн өөрийгөө нээж, энтертайнмент үүсгэн байгуулсан түүх, ирээдүйн зорилгынх нь талаар ярилцлаа. 

 -Хэзээнээс кино урлагт дурлаж энэ мэргэжлээр суралцахаар шийдэж байв?

            -Би багадаа урлагаас хол хөндий гэртээ ном уншаад л сууж байдаг даруухан, чимээгүй хүүхэд байлаа. Манай гэр бүл Тэрэлжид амралтын газар ажиллуулдаг байсан юм. Зуны амралтаар Тэрэлжид байхдаа хэсэг хүмүүс зураг авалт хийж байхыг хараад, сонирхолтой санагдаад очиж байсан. Тухайн үед зураг авалтад оролцох боломж олдсон нь одоо хамт ажиллаж байгаа найзууд, дүү нартайгаа танилцах завшаан болсон. Тэр цагаас эхлэн кино урлагт дурлаж, суралцаж эхэлсэн.  

-“Modernize entertainment” хэзээ үүсгэн байгуулсан юм бэ. Анх санааг нь хэн гаргаж, хэрхэн нэгдэж байсан түүхээсээ манай уншигчидтай хуваалцахгүй юу?

           -Бид анх “Төгс хөгжил продакшн”-д Ж.Буянтөгс багшийн удирдлага дор жүжгийн дугуйланд суралцаж байхдаа нэгдэж байсан. Тэгээд 2016 онд  одоогийн “Modernize entertainment”-ийг байгуулсан залуус нийлээд тусдаа “Youtube” суваг, “Facebook” хуудас нээж,  богино хэмжээний бичлэгүүд хийж эхэлсэн. Анх бид нэгнийхээ гэрт юм уу, гадуур уулзаж бичлэгийнхээ санааг ярилцаж байгаад "Iphone-5" маркийн утсаар бичлэгээ хийгээд, түүн дээрээ засварлаж, янзлаад оруулдаг байлаа. Албан ёсоор компани болоод одоо хоёр жил болж байна даа.

-Таны кино компанийн “Modernize” гэх нэрэнд гүн утга бий юу?

            -Анх нэрээ өгөхдөө толь бичиг эргүүлээд, олон дахин бодож байж өгч байсан. Манай нэрийн хувьд “modernization” гэх үгээс гаралтай. Байнга зогсошгүй шинэчлэгдэж байх гэсэн утга санааг агуулдаг.

-22 настай залуу 10 гаруй хүн удирдаад, энтертайнмент байгуулахад их олон хүндрэл тулгарч байсан байх?
            -Туршлага дутах, санхүү, бичиг баримтын асуудал, яаж тамга тэмдэг авч, улсын бүртгэлтэй болох уу, хаана оффисоо тохижуулах уу гээд л ар араасаа олон шийдэх ёстой асуудал гарч ирсэн. Тэр болгонд шантарч болих бодол огт төрөөгүй. Харин ч тэр бүхнээсээ суралцаад мэддэг мэргэжлийн хүмүүсээс нь зөвлөгөө аваад л явсан. За тэгээд бичиг баримт, оффис гээд л бүх юмаа зохицуулчихсан байж байтал коронавирус хурдтай тархаад, бүх нийтээрээ хөл хорионд орчихсон доо. Тэгээд бид хэд хааяа гадуур цуглаад л аль болох бичлэгээ тасралтгүй хийгээд л явахыг хичээж байсан.

-Одоогийн байдлаар нийт хэдэн уран бүтээл дээр ажиллаад байна вэ?

            -Бид өөрсдийгөө залуу туршлагагүй гэж голохгүйгээр өөрсдийнхөө хэмжээнд уран бүтээлүүдээ хийгээд л явж байна даа. Мэдээж мэдэхгүй юм гарч ирнэ. Нэг бүтээл дээр ажиллаж дуусаад, дараа нь бөөнөөрөө сууж үзээд юу алдсан, юу оносон, ямар зүйлсээ сайжруулах талаараа ярилцдаг. Миний хувьд залуу насандаа алдахаас айлгүй хүссэн бүх санаагаа туршиж үзэн, түүнээсээ тасралтгүй суралцахыг л хүсдэг дээ. Одоогоор “Бидэн дунд”, “Төөрөгдөл”, “Цензурь” зэрэг таван кино хийсэн байна. Энэ бүтээлүүдээ мэргэжлийн түвшний уран бүтээл гэж хэлэхгүй ч өөрсдийнхөө хэмжээнд сайн хийсэн гэж боддог.

-Уран бүтээлээрээ дамжуулан юу илэрхийлэхийг хүсдэг вэ?

            -Манай  үзэгчдийн дийлэнх хувийг өсвөр насны хүүхдүүд эзэлдэг. Тэр ч утгаараа хариуцлагатай байхыг хичээдэг. Бичлэг болгон дээрээ аль болох  хөнгөн хөгжилтэй байдлаар ухаарал, үнэ цэн агуулсан мессеж өгөхийг зорьж, зохиолоо бичдэг дээ.

-Анх өөрийн гэсэн киногоо хийгээд түүнийгээ үзэгчдийн хүртээл болгох мэдрэмж гайхалтай байсан байх даа?

            -2020 онд “Цензурь” уран сайхны киног 20 настай байхдаа IPTV-д кино өгч үзэхээр шийдээд хийж байлаа. Тухайн үедээ ашиг олоогүй ч их зүйл сурч авсан даа.  Анхны  уран бүтээл гэдэг их нандин дурсамжтай байдаг юм билээ. Мөн цаашид ажиллах зүг чигээ олоход тусалсан гэх үү дээ. Нас залуу болохоор надад туршлага, бусдыг удирдах чадвар дутмаг байсан ч баг хамт олонтойгоо жоохон хүүхэд байхаасаа хамтдаа байсан болохоор нэгнээ ойлгож, дэмжиж ажиллаж чадсан. Биднийг мөрөөдөл маань нэгтгэдэг болохоор “Modernize entertainment” оршин тогтнож, өдөр ирэх тусам хөгжсөөр байгаа байх. Одоо нэг хэсэгтээ кино хийхгүй уран чадвараа сайжруулах бодолтой байгаа. Хүүхэд багачуудад зориулсан бичлэгүүд дээрээ анхаарч ажиллана даа.

-Нууц биш бол ирээдүйн зорилго, зорилтоосоо манай уншигчидтай хуваалцаач?         

   -Бид  үргэлж дээд үеэсээ суралцдаг. Тэд бидэнд урагш алхах зүг чиг, жимийг зааж өгдөг юм шиг санагддаг. Би Монголын кино урлагийг дүгнэх хэмжээний хүн биш л дээ. Гэхдээ миний бодлоор манай кино урлаг өдөр ирэх тусам хөгжиж байгаа гэж боддог. Монголын кино урлаг дэлхийд гарахад тун ойрхон байгаа байх. Миний хувьд хийсвэр ертөнцийн талаар мэргэжлийн кино хийхийг хүсдэг. Хэрвээ сүнс, эрлэгийн элч зэрэг зүйл байдаг бол ямар байх бол гэдгийг харуулмаар байна. Манай “Бидэн дунд” кинон дээр нас барсан хүмүүсийн сүнснүүд суугаад ярилцдаг. Мөн “Сүнстэй байшин” цуврал бичлэг маань “Youtube” дээр хандалт өндөр авсан байдаг. Яг  иймэрхүү төрлийн уран бүтээлээрээ тодорч гарч ирэхийг  мөрөөддөг. Түүнийхээ төлөө ч алгуурхан урагшилсаар л байна.

-“Modernize entertainment”ын бэлтгэж байгаа дүү нартаа юуг илүүтэй зааж сургахыг зорьдог вэ?

            -Одоогийн байдлаар манай сургалтад давхардсан тоогоо 200 гаруй хүүхэд суралцсан байна. Байнгын суралцаж бичлэг, уран бүтээлүүд дээр оролцоод явдаг 30 гаруй хүүхэд бий. Мэргэжлийн сургуулийн багш нараар жүжиглэх ур чадвар, бүжиг зэрэг хичээлүүдийг заалгаж, өөрсдөө контент хийх тал дээр зааж өгдөг. Өөрсдийнхөө туршлагаас хэлж өгч, аль болох зөв үлгэр дуурайлал болохыг хичээдэг дээ.  Ихэнх дүү нар маань тусдаа бие даасан бичлэг хийгээд, бид нараас чадахгүй зүйлээ асуугаад л явж байгаа. Тэдний нэг болох “Baby crush tv”-гийн дүү нар маань “Солгой Сони” гэх дүрээр цахим орчимд хандалт өндөртэй байдаг.