ЭЕШ-ДАА 800 ОНОО АВАХЫГ ХҮССЭН СУРАГЧДАД ӨГӨХ ЗӨВЛӨГӨӨ

О. Эрдэнэтунгалаг:
Монголчуудын амьдрал- Өдрийн сурвалжилга

2024-07-03, 2096

Жиргэх Хуваалцах

2024 оны ЭЕШ долдугаар сарын 4-нд түүхийн хичээлээр эхэлж, долдугаар сарын 7-нд монгол хэлний хичээлээр дуусна. ЭЕШ өгөх сурагчид шалгалтын байранд цагийн өмнө очиж, анги тэнхимд 10 минутын орж, суудлаа эзэлсэн байх хэрэгтэй. Дурдсан хугацаанаас хоцорсон тохиолдолд шалгалтын танхимд оруулахгүй.

Шалгалтад ирэхдээ дараах материалуудыг бүрдүүлж, заавал биедээ авч ирэх хэрэгтэй. Үүнд

Бүртгэлийн хуудас/ https://eyesh.eec.mn холбоосоор дамжуулан өөрийн бүртгэлийн дугаар, нууц үгээ ашиглан “Шалгуулагчийн булан”-аар нэвтэрч хэвлэж авна/.
Энэ онд ЕБС-ийг төгсөж буй шалгуулагчид бүртгэлийн хуудас дээрээ сургуулийнхаа захирлаар гарын үсэг зуруулан, тамга даруулж баталгаажуулна.
2024 оноос өмнө ЕБС-ийг төгссөн шалгуулагчдын бүртгэлийн хуудас нь QR кодоор баталгаажсан байна.
Суудлын хуваарь / https://eyesh.eec.mn холбоосоор дамжуулан өөрийн бүртгэлийн дугаар, нууц үгээ ашиглан “Шалгуулагчийн булан”-аар нэвтэрч хэвлэж авна/
Бүрэн дунд боловсрол болон түүнээс дээш боловсрол эзэмшсэнийг гэрчлэх баримт бичиг
Иргэний үнэмлэх /Хэрэв иргэний үнэмлэх байхгүй бол e-mongolia -ийн лавлагаа, жолооны үнэмлэх, гадаад паспорт зэргийг орлуулах баримт бичиг байж болно/

Шалгалтаа амжилттай өгөхийг хүссэн сурагчдад зориулсан зөвлөгөө

Тайван бай.
Чадахгүй байгаа дээрээ цаг алдах бус, амархнаас нь эхэлж цагаа хэмнэ
Асуултаа сайн уншиж, ойлгож хий
Ямар материал ашиглахаа тодорхойл.
Төлөвлөгөө гарга.
Суралцах арга барилаа олж мэд..
Эргэлзээтэй зүйлсээ багш, ном судлагдахуунаас мэдэх
Аль чадахаараа цээжил.
Давтах.
Өөрийгөө урамшуул.
Хувийн зохион байгуулалтаа сайжруул.

Ингээд ЭЕШ-даа 800 оноо авахад туслах зарим зөвлөгөөг хүргэе. Энэ хэсэгтээ өндөр оноо авсан сурагч, шалгалтад бэлдсэн багш, сургуулийн сэтгэл зүйчийн зөвлөгөөг хүргэж байна.

-ӨӨРТӨӨ БҮРЭН ИТГЭЛТЭЙ БОЛОХ ХҮРТЛЭЭ ШАЛГАЛТДАА БЭЛДЭХ ХЭРЭГТЭЙ-

Физикийн хичээлээр 800, математик 725, англи хэл 756 оноо авсан ШУТИС-ийн Эрчим хүчний сургуулийн оюутан Тогтохын Эмүжин “Шалгалтад бэлдэхдээ өмнөх онуудын ЭЕШ-ын материал дээр их ажиллаж, блюпринтэд орсон сэдвүүдээ түлхүү бэлдсэн мөн шалгалтад бэлдэх зориулалттай апплейкшин ашигласан. Орчин үетэйгээ хөл нийлүүлэн алхана гэдэг чухал шүү дээ. Дасгалын ном том учраас гар утсан дээр бэлдсэн хувилбарууд амар санагдсан. Манай сургалтын төв долоо хоног бүр бүрэн хэмжээний өнгөрсөн жилүүдийн шалгалтын жишгүүдээр яг ЭЕШ дээр байгаа юм шиг шалгалт авдаг байсан нь сэтгэл зүйгээ бэлдэхэд их тус болсон. Ер нь бие дааж шалгалтдаа бэлдэж байгаа хүүхдүүд ч гэсэн цаг тавиад номоос харалгүйгээр “шалгалт өгч байна” гэж төсөөлөөд бэлдэх нь яг шалгалтын үед цагаа зөв тооцоолоход тусалдаг юм билээ. Миний хувьд физикийн хичээлдээ итгэлтэй байсан учраас шалгалт өгч байхдаа сандраагүй. Харин математикийн хичээлдээ бага зэрэг санаа зовж байсан болохоор шалгалт дээрээ жаахан сандарсан. Тэгэхээр сэтгэл зүйгээ бэлдэхийн тулд бас өөртөө хангалттай гэж бодох хэмжээндээ хүртэл тухайн хичээлээ бэлдэх чухал санагдсан. Шалгалтад орохдоо сандарна гэдэг маш харамсмаар, мэддэг, хийж чаддаг зүйлээ сандарснаасаа болоод мартчихдаг юм. Манай гэрийнхэн надад хичээлээ хийхийг шаардаж тулгаж байгаагүй нь намайг ямар нэгэн дарамтгүйгээр сурахад дэм болсон байх. Харин ч эцэг эхийнхээ мөнгөөр сургалт давтлагад явж байгаа, мөн өөртөө тавьсан зорилго байсан учраас аль болох л өндөр оноо авахыг хүсэж хичээсэн. Одоо шалгалт өгөх гэж байгаа сурагчдыг тайван, өөртөө итгэлтэй шалгалтад орохоос гадна заавал бугуйн цаг зүүгээрэй” гэж хэлсэн юм. Цаг зүүж шалгалтад орсноор өөртөө цагийн хуваарилалт хийх боломжийг олгодог ажээ.

-АМЬДРАЛ ОЙРХОН БОДИТ ЖИШЭЭГЭЭР ХҮҮХДҮҮДЭД ХИЧЭЭЛЭЭ ЗААЖ ӨГДӨГ-

“Eduzone” сургалтын төвийн багш Д. Алтаншагай “Нэгдүгээрт сэдвийн хоцрогдол дээр ажилладаг. VI ангиас нь хойш XII анги хүртэлх бүх сэдвүүдийг нэгийг нь ч орхилгүй үздэг. Ингэхдээ эхлээд физикт дуртай болгохыг хичээдэг. Тэгэхийн тулд амьдрал дээрх бодит жишээ авч ярих эсвэл сонирхолтой баримт хуваалцах замаар зааж өгдөг. Хичээлдээ дуртай болсон байхад хүүхдүүд цаашаа хичээлээ урамтай үздэг. Хоёрдугаарт сэтгэлзүйтэй нь ажилладаг. Шалгалтыг энгийн сорил авч байгаа юм шиг өгдөг болгохын тулд байнга давтамжтайгаар сорил авдаг. Ер нь шалгалт өгөх сурагчтай 6-12 сарын хичээлийг нь бэлдүүлж хамтран ажилладаг” гэв.

Боловсролын сэтгэл зүйч Г.Нацаг-Юн “Элсэлтийн ерөнхий шалгалт өгөх сурагч бүр шалгалтын түгшүүртэй байгаа. Тухайн түгшүүр, айдсыг хүн бүрийн өөрийн онцлогоор даван туулдаг. Шалгалтаа өгч байж л тухайн түгшүүр арилна. Хүүхдүүд шалгалтад бэлдэхийг зөвхөн хичээлээ сайн хийхийг л хэлдэг гэж боддог. Гэхдээ анхнаасаа сурах чадвар, сэтгэл зүй, зөв амьдралын хэмнэл гурвыг зэрэгцүүлэн бэлдэх ёстой. Ингэснээр тухайн сурагчийн шалгалт амжилттай болоход нөлөөлдөг. Зөв амьдралын хэмнэл нь нойроо зөв авч, эрүүл хүнс хэрэглэхээс гадна өөрийгөө ядраалгүй чанартай тогтсон хугацаанд хичээлээ давтах явдал юм. Мөн өөрийн сэтгэл зүйн айдас түгшүүрийг яаж даван туулдаг талаараа мэдлэгтэй болох хэрэгтэй. Хүүхэд бүр өөр. Зарим нь сандарч байхад огт айдаггүй хүүхэд ч байна. Мөн шалгалт өгөх гэж байгаа хүүхдийн гэр бүл тухайн хүүхдийг сайн нойр авах, чанартай хоол унд идэх болон тайван хичээлээ бэлдэх нөхцөлийг нь бүрдүүлж өгөх ёстой. Орхигдуулж болохгүй зүйл гэвэл угаасаа эцэг эхийн дэмжлэг, урам хамгаас чухал. Шалгалт аваад онц авах нь чухал бус тухайн хүүхэд өөрийн хүссэн мөрөөдөл зорилго руу явж байна уу гэдэгт анхаарч, шалгалт бол зүгээр давах ёстой нэг даваа гэдгийг ойлгуулж хамт бэлдэх чухал. Багш нарын хувьд хүүхэд бүрийн сурах арга барилыг олох хэрэгтэй 40 хүүхдэд нэг арга техникээр хичээл заахад хүлээж авах хүний тоо цөөн байдаг. Миний хувьд шалгалт өгөх гэж байгаа сурагчдадаа өөрсдийнх нь хувьд хичээл давахад хамгийн тухай орчныг олж, богино хугацаанд чанартай хичээлээ бэдэхийг санал болгож зөвлөсөн”

ЭЕШ-ДАА 800 ОНОО АВАХЫГ ХҮССЭН СУРАГЧДАД ӨГӨХ ЗӨВЛӨГӨӨ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.