-“НАЙМАН ШАРГА” ЗАХАД ОРОСУУД “АРЗГАНАЖ” БАЙНА-

Бүсэлхийгээрээ том хар паск зүүсэн хар саравчтай малгай, цувтай орос эр ярьж байсан утсаа ченжид өгөв. Ченж ч утсыг нь авч чихэн дээрээ бариад “За тэгье тэгье. Чи дахиад 90-ээр авах хүн байвал надад хэлээрэй” гээд барьж байсан жижиг хар ууттай мөнгөө өнөө орос эрт өгч байгаа харагдав. Тэгснээ өнөө хууз сахалтай өндөр орос эргэснээ өмднийхөө арын халааснаас задгай рубль гаргаж ирэн ченжийн зүг бариад “Тугрики тугрики” гээд 20 мянгатын хэдэн дэвсгэрт аваад түрийвчиндээ хийгээд гарч явлаа.

“Найман шарга”-ын гадаа оросууд зургаа, долоогоороо бөөгнөрч зогсжээ. Зарим ганцаараа явж байгаа орос байшингийн сүүдэр бараадаж, буланд гахай цүнхээ тавиад дээр нь суух. Ганц, нэгээрээ суугаа оросыг гараас гарт дамын наймаачид зүгээр суулгадаггүй юм байна. Наймаачид оросууд дээр очоод “Доллара США авах уу”, “Бас евро байгаа” гээд л шалаад зогсох аж. Нөгөө хэд ч шууд ойлгож чадахгүй хэсэг гар хуруугаараа үзүүлж, харуулж байж биенээ ойлгоно. Тэгмэгцээ намаачид “Мони мони”, “Рубль” гээд л өөдөөс нь хуруугаа имрээд олноороо зогсоо, амарч суугаа оросуудыг “үргээчихэв”.

Зарим орос ч гар, хуруу зааж, ойлгож чадахгүй гэсэндээ орчуулагч хөлслөөд явж байна. Орчуулагчтайгаа хамт “Найман шарга”-ын ченжүүдээр орж яваад залхдаг бололтой оросоор хэдэн үг хэлээд гадаа гарч, зогсоод тамхи асаах. Ард хоцорсон орчуулагч нь ч бараг ченж болгон дээр очоод “Ам.доллароо хэдээр зарах юм”, “Хэр их байгаа юм”, “Өөр гадаад валютаар соливол болох юм уу” гээд л хэдэн лангуу дамжин гүйхээрээ явлаа.

-ИХ ХЭМЖЭЭНИЙ АМ.ДОЛЛАР, ЕВРО ХУДАЛДАН АВЧ НӨӨЦЛӨӨД ГАДНЫН ВАЛЮТ ЗАРЖ БАЙНА ГЭВ-

“Найман шарга” захын голын доош орсон төвийн лангуу бүрд хэд хэдэн орос хөхрөлдөөд зогсож байна. Зарим нь ч их чухал юм ярьж байгаа бололтой нухацтай царай гаргасан харагдах. Хэсэг ярьж хөхрөлдөж зогссон орос нөгөө хэдээсээ салаад үүргэвчээ урдаа гаргаад 6-7 боодол 50 мянгатын дэвсгэртээр вон гаргаж ирлээ. Ченж ч өнөө боодолтой воныг ээлж ээлжээр нь мөнгөний машинд хийж тоолмогцоо арын сейфээ ухсанаа хэд хэдэн боодол 100-тын дэвсгэртээр ам.доллар гаргаж ирээд өмнөөс сарвайв. Үүргэвчээ урдаа тэвэрсэн орос эр тоолох ч үгүй мөнгөө авч, цүнхэндээ хийгээд толгойгоо дохилоо.

Тус захын хамгийн баруун хойд төвийн хаалгаар ч олон хүн орж, гарч байна. Яваад очтол ид бужигнаж байсан хүмүүс тарж явахтай нь таарав. Тэр дундаас нь нэг нь мөнгөө солиулахаар үлдэж булангийн ченж дээр явж очлоо. Араас нь дагаад очтол цайвар өнгийн хүрэмтэй махлаг орос эр тоосон ч шинжгүй барьж явсан уутаа ченжийн задалж байна. Орос эрийн хар уутан дотор дан юань 100-тын дэвсгэртээр 10-аад боодол байх нь тэр. Өнөө эр ч ченж рүү толгой гэдийлгээд “Доллара” гэв. Тэгсэн ченж ч их сандарсан бололтой намайг “Юм авч, өгөхгүй бол хурдан гар” гээд “хөөх” шахуу гаргаад орос эртэй хамт үлдсэн юм.

ЧЕНЖ: АМ.ДОЛЛАР ДУУССАН. ОРОСУУД БҮГДИЙГ НЬ АВЧИХСАН

Сүүлийн хэдэн өдөр “Найман шарга”-ын ченжүүд “борви бохис хийх” завгүй ажиллаж байгаа гэнэ. Хэдэн өдрийн өмнө ирсэн гэх зарим орос ам.доллар, евро худалдан авч, хэдэн өдөр дараалан тус захад өнжиж байгаа юм байна. Энэ талаар “Найман шарга” захын гадаад валютын ченж Г “Оросууд хэдэн өдрийн өмнөөс ирж эхлээд, одоо бүр салахаа байлаа. Нэг ирэхээрээ л авчирсан хамаг ам.доллар, евро аваад явчих юм. Яг одоо бол ам.доллар алга. Евро бий. Маргаашнаас дахиж жаахан ам.доллароо аваад ирэх санаа байна” гэж ярив. Ченж Г-тэй яриад удаагүй “Найман шарга”-ыг тойрч явтал нэг махлаг хичээл насны ченж эр “Юу сонирхож яваа юм. Ам.доллар, евро зарах юм уу. Яах юм” гэж байна. Харин өөрөөс нь ам.доллар, евро зарж байгаа тухай асуутал “Надад ч жаахан юм байна аа. Чи монгол хүн юм чинь чамд 60-аар өгье. Энэ оросууд чинь хэдэн өдрийн өмнөөс л 70, 80 байхад нь аваад, онгироод байгаа юм” гэв.

ДАМ: 10 МЯНГАН АМ.ДОЛЛАР БЭЛЭН БАЙНА. НАДААС АВНА ГЭЖ ЯРЬСАН ХЭДЭЭС ӨМНӨ АВЪЯ ГЭВЭЛ 65-Д АВ

“Найман шарга”-ын гаднах оросууд цөөрөх нь бүү хэл нар буух тусам улам л нэмэгдээд байх. Ганц, хоёрын сайн ажвал гадаад валютын захаас холгүйхэн автомашинаа тавьчихаад ирэн буцан байгаа юм байна. Орос залуус хэд хэдээрээ бөөгнөрсөн газраар паск үүрч, гартаа бэлэн мөнгө барьсан дамын наймаачид гэх хэдэн хүн эргэлдэх аж. Хажууханд нь очоод ам.долларын ханш хэдтэй байгаа, зарах тухай нь асуутал “Чамд гэж хэлэхэд 10 мянган ногоон бэлэн байна. Өглөө хэдэн орос надаас авъя гэж ярьсан юм. Орой ирнэ гэсэн. Чи тэднээс өмнө авъя гэвэл 65-д авбал ав. Чамайг монгол хүн гэсэндээ арай бага үнэ хэлж байгаа шүү” гэлээ.

-АМ.ДОЛЛАР, ЕВРОГИЙН ХАНШИД ХӨӨРӨГДӨЛ ҮҮСЭЖ БАЙНА ГЭВ-

Монголбанкны есдүгээр сарын 21-ний өдрийн буюу өнгөрсөн долоо хоногийн лхагва гарагийн хаалтын ханшаар ам.доллар 3,268.24, евро 3,239.15, рубль 53.69 төгрөгийн үнэтэй байсан. Тэгвэл өчигдрийн Монголбанкны хаалтын ханшаар ам.доллар 3,285.81, евро 3,211.88, рубль 55.86 төгрөг буюу ам.доллар ханш өсөж, еврогийн ханш буурч, рублийн ханш өссөн үзүүлэлттэй байгаа юм.

Харин “Найман шарга” захад Монголбанкны ханш төдийлөн нөлөөлөхөө “больжээ”. Лангуунуудын арын самбар дээр ам.доллар 3240, рубль 50 төгрөг гэж байгаа ч оросуудад ам.доллароо 3280 хүртэл, рублиэ 80 төгрөг хүртэл өсгөж зарж байна. Энэ тухай тус захад ажилладаг гэх М “Оросууд үзэгдсэнээс хойш “Найман шарга” ч валютын үнээ барихаа болилоо. Оросуудад үнэтэй шахна. Сүүлдээ монголчууддаа үнэ өгч байна. Хүнд өгөх гээд рубль солиулах гэсэн 80 төгрөг гэж шалсаар байгаад надад 75 төгрөгөөр зарсан” гэлээ.