• Өнөөдөр 2024-03-29

Эмнэлгийн өрөөнд тарчлах коронавирустэй хүүхдүүдийн шаналан ба ЭХЭМҮТ-ийн нэг өдөр

2021-06-15,   2585

-Хүүхдүүд тоглоомын талбай, цахилгаан шат, ар гэрийнхнээсээ ковидын халдвар авч, бусдадаа халдварлуулж байна-

       Коронавирусийн халдварыг хяналтаас алдаж, өдөрт 400-500 хүүхэд өвчилж байна. Халуурсан, суулгасан, таталт өгсөн хүүхдээ тэвэрч, сандарсан эцэг, эхчүүд дүүргийн болон ЭХЭМҮТ-ийн үүдээр дүүрчээ. Бид ЭХЭМҮТ-өөс өчигдөр дараах сурвалжилгыг бэлтгэсэн юм.

         Хүүхдүүд тоглоомын талбай, шат, ар гэрийнхнээсээ ковидын халдвар авч, бусдадаа халдварлуулж, халдвар тээгч болж байна. ЭХЭМҮТ өнгөрсөн дөрөвдүгээр сард коронавирусийн халдвартай хүүхэд хүлээж авах тасаг нээжээ. Тодруулбал, энгийн тасагт 40, эрчимт эмчилгээний тасагт найм, нийтдээ 48 хүүхэд хүлээж авахаар төлөвлөж, ор бэлдсэн гэнэ. Мөн жирэмсэн 35 эх хүлээж авахаар тасаг гаргасан байна. Өчигдрийн байдлаар тус эмнэлгийн коронавирусийн халдвартай хүүхэд хүлээж авах тасагт 45, эрчимд эмчилгээнд нэг хүүхэд хэвтэн эмчлүүлж байлаа.  Өөрөөр хэлбэл, тус эмнэлгийн бэлдсэн тасгийн 40 ор хэдийн дүүрч, хүүхдүүдийг шахаж зургаан ор нэмж дэлгэсэн байна. Харин эрчимт эмчилгээний тасгийн найман орны нэг нь хүнтэй. Хэрэв хүүхдүүд хүндэрч, сэхээний тасаг руу шилжвэл долоон ор байгаа гэсэн үг. Харин жирэмсэн эх хүлээж авах 35 ор хэдийн дүүрч, нэмж найман ор дэлгэж, нийт 43 эх одоогийн байдлаар эмчлүүлж байгаа гэнэ.

      Биднийг өчигдөр очих үеэр хүүхдээ тэвэрч, дагуулсан эцэг, эхийн хөл хөдөлгөөн их байлаа. Тэд тус эмнэлгийн Хүүхдийн яаралтай түргэн тусламжийн хаалгаар орж, халуунаа үзүүлж, оношоо хэлж байв. Хэрэв хүүхэд нь халуурсан, таталт өгсөн, суулгасан тохиолдолд сувилагч нар эрэмбэлж, аль тасаг руу явуулах эсэх нь тодорхой болно. Халуурч, шинж тэмдэг илэрч байгаа хүүхдүүдээс түргэвчилсэн оношлуураар шинжилгээ авч байгаа гэнэ. Хэрэв  эерэг гарсан тохиолдолд тусгаарлах өрөөнд тусгаарлаж, PCR шинжилгээ хийх юм байна. Хүүхдүүд шинжилгээний хариугаа 12-15 цаг хүлээж, хариу батлагдсан тохиолдолд тасаг руу шилжинэ. Хэрэв халдвар илрээгүй тохиолдолд дүүргийн эмнэлэг рүү нь буцааж байгаа аж. Гэхдээ халдвартай хүүхэд бүрийг ЭХЭМҮТ хүлээж авахгүй. Эрэмбэлж, хүнд, нэн хүнд хүүхдүүдийг л хүлээж авч байгаа гэнэ.

“Хоёр хоногийн өмнөөс суулгаж, халуурч эхэлсэн”

Тус эмнэлэгт 0-16 насны хүүхдүүд эмчлүүлж байгаа аж. 0-3 насны хүүхдүүдэд ихэвчлэн суулгах, бөөлжих, халуурах шинж тэмдэг илэрч байгаа гэнэ. Дөрөв орчим насны хүүгээ дагуулсан эмэгтэй халдвартай хүүхэд хүлээж авах тасгийн үүдэнд хүлээж сууж байгаа харагдана. Хүү гэдэс нь өвдөж байгаа бололтой байн байн ээжтэйгээ ариун цэврийн өрөө орж байлаа. Харин эсрэг талд нь долоо орчим насны охин халуурч байгаа бололтой нүүр нь час улаан болж, сульдсан байдалтай эмч дуудахыг хүлээж байв. Мөн үүнээс гадна 3-8 настай хүүхдүүдээ дагуулсан хэд хэдэн эцэг, эх хүлээлгийн сандал дээр хүлээж байлаа.

Дөрвөн настай хүүгээ тэвэрсэн ээжээс хүүгийнх биеийн талаар тодруулахад “Хоёр хоногийн өмнөөс бүлээрч, суулгаж эхэлсэн. Хоолой нь өвдсөн юм болов уу гэж бодтол гүйлгэх нь ихсэж, өчигдөр (уржигдар) шөнө өндөр халуурлаа. Дүүргийн эмнэлэг хүүхэд ихтэй байгаа учраас шууд энд хүрээд ирлээ. Хүү минь хэд хоног тоглоомын талбайд гарч тоглосон. Аав, ээж хоёр нь гадуур яваагүй учраас халдвар аваагүй байх гэж бодож байна. Хэрэв халдвар авсан бол тоглоомын талбайгаас л авсан байх. Би болон манай нөхрийн шинжилгээний хариу одоогийн байдлаар сөрөг гараад байна. Эмчид үзүүлээд түргэвчилсэн шинжилгээ эерэг гарвал эмнэлэгт хэвтэх нь тодорхой боллоо. Халуурч байгаа учраас амьсгаа ихтэй, сульдсан, гүйлгэсэн л зовиуртай байна. Энд ирж байгаа хүүхдүүдийн олонх нь ийм оноштой байна” гэлээ.

“Аав нь ажлаасаа халдвар авч, гурван хүүхэд маань өвдчихлөө”

Харин нэг эмэгтэй “Нөхөр маань ээлжийн ажил хийдэг. Манайх 5-16 насны гурван хүүхэдтэй. Нөхрийн маань шинжилгээний хариу хэд хоногийн өмнө эерэг гарч, хэвтэн эмчлүүлж байгаа. Бид дөрөв тухайн үед нь ойрын хавьтал гээд шинжилгээ өгсөн ч сөрөг гарсан. Гэтэл аав нь өвдсөнөөс зургаан хоногийн дараагаас бага хүүхэд маань суулгаж, халуурч, уйлагнаж, бие нь тавгүйтэж эхэллээ. Харин том хүүхэд маань толгой нь маш их өвдөж байна. Халдвартай байх вий гэсэн дээ бага хүүхдээ дагуулаад яараад хүрээд ирлээ. Өрхийн эмнэлэгтээ хэлсэн ч ачаалал ихтэй учраас удах юм билээ. Хэрэв хүүхэд минь халдвар авсан байвал гэртээ бид яг ямар арга хэмжээ авах эсэх нь тодорхойгүй байна. Эрүүл мэндийн яамны шуурхай утаснаас лавлахад өрхийн эмнэлэгтээ ханд л гэж хэлнэ лээ. Яг үнэндээ өрхийн эмнэлэг хүлээж суувал хүүхэд минь хүндэрч магадгүй байна. Гэрээр ямар дархлаа дэмжих бүтээгдэхүүн уулгах гээд мэдээлэл муу байна” гэлээ.

 Эцэг, эхчүүдийн хэлж буйгаар хүүхэд нь өвдөж, тусламж авах гэхээр утсаа авах газар олдохгүй, олигтой зөвлөгөө өгөхгүй байгаа тул арга буюу ЭХЭМҮТ-д өөрсдөө ирж байгаа гэнэ. Мөн эцэг, эхчүүдийн хэлж байгаагаар халуурсан, шинж тэмдэг илэрсэн хүүхдүүд нүд, чих болон бусад өөр эрхтэн нь өвдсөн хүүхдүүдэд халдвар тараах эрсдэлтэй байгааг хэлж байлаа.

0-8 насны хүүхэд сахиуртай, 9-16 насны хүүхэд ганцаараа хэвтэн эмчлүүлнэ

        Халдвартай нь батлагдаж, биеийн байдал хүнд байгаа тохиолдолд тус эмнэлэгт хүлээж авч байгаа аж. Ингэхдээ 0-8 настай хүүхдийг сахиуртай оруулж байгаа бөгөөд 9-16 насны хүүхдүүд ганцаараа хэвтэж байгаа гэнэ. Халдвартай ес, арван настай хүүхдүүд өндөр халуурч, гүйлгэж, бөөлжиж, эцэг, эхээсээ хол ганцаараа хүнд байдалтай байгаа гэнэ. Харин хөнгөн, хүндэвтэр байгаа тохиолдолд хүүхдүүдийг дүүргийн эмнэлэг хүлээн авч эмчлэх аж. Мөн хөнгөн байгаа үед гэрээр эмчилгээ хийж байгаа юм байна. Хүүхдүүдэд тохирсон дархлаа дэмжих, вирусийн эсрэг эмчилгээ хийж байгаа аж.

Эрчимт эмчилгээний тасагт 15 настай хүүхдийн байдал маш хүнд байна

       Өчигдөр биднийг очих үеэр Сүхбаатар дүүргийн Нэгдсэн эмнэлгээс халдвартай дөрвөн сартай нярайгийн биеийн байдал маш хүнд хүргэгдэн ирэв. Нярайг тус эмнэлгийн Эрчим эмчилгээний тасаг руу шилжүүлж байсан юм. Харин албаны хүмүүсийн хэлснээр 15 настай хүүхдийн биеийн байдал хүнд Эрчимт эмчилгээний тасагт хэвтэн эмчлүүлж байгаа гэнэ. Тэрбээр хавсарсан суурь өвчтэй хүүхэд гэдгийг албаныхан онцоллоо.

Хавсарсан суурь өвчингүй найман настай хүүхэд ЭХЭМҮТ-д ирээд 13 цагийн дараа нас баржээ

       Хэдхэн хоногийн өмнө коронавирусийн халдвараар найман настай хүүхэд амиа алдсан хэрэг гарсан. Талийгаач  амьсгаа ихтэй, хатгаатай байсан тул дүүргийнхээ эмнэлэгт хэвтжээ. Хоёр хоног эмчилгээ хийлгэсэн ч бие нь муудаж, ЭХЭМҮТ-ийн Эрчимт эмчилгээний тасагт шилжсэн байна. Харамсалтай нь, охин ЭХЭМҮТ-ийн сэхээнд 13 цаг амьдраад бурхан болсон гэнэ. Талийгаач хавсарсан суурь өвчингүй эрүүл байжээ. Тэрээр халдвар авч, бие нь маш хурдан хугацаанд муудсан байна. Эл хэрэг гарснаас хойш буюу 14 хоногийн өмнөөс хүүхдүүдийн халдвар нэмэгдэж, эмнэлгийн ачаалал ихэссэн гэнэ. Мөн жирэмсэн эхчүүд ч халдвар авах нь нэмэгджээ.

 


Эмнэлгийн өрөөнд тарчлах коронавирустэй хүүхдүүдийн шаналан ба ЭХЭМҮТ-ийн нэг өдөр
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 11
  • Сэтгэгдэл үлдээсэн: 2021-06-15 22:12:22
    КОРОНА ТУССАН ХҮҮХЭД: БАЙДАЛ ИЙМ БАЙХАД ТӨР ЗАСАГ 10 ТЭРБУМААР НААДАМ ХИЙНЭ ГЭНЭ. НАЙР НААДАМ ХИЙХГҮЙ БОЛ МОНГОЛ УЛС СӨНӨХ ГЭНЭ.
  • Сэтгэгдэл үлдээсэн: 2021-06-15 22:12:21
    КОРОНА ТУССАН ХҮҮХЭД: БАЙДАЛ ИЙМ БАЙХАД ТӨР ЗАСАГ 10 ТЭРБУМААР НААДАМ ХИЙНЭ ГЭНЭ. НАЙР НААДАМ ХИЙХГҮЙ БОЛ МОНГОЛ УЛС СӨНӨХ ГЭНЭ.
  • Сэтгэгдэл үлдээсэн: 2021-06-15 22:12:21
    КОРОНА ТУССАН ХҮҮХЭД: БАЙДАЛ ИЙМ БАЙХАД ТӨР ЗАСАГ 10 ТЭРБУМААР НААДАМ ХИЙНЭ ГЭНЭ. НАЙР НААДАМ ХИЙХГҮЙ БОЛ МОНГОЛ УЛС СӨНӨХ ГЭНЭ.
  • Сэтгэгдэл үлдээсэн: 2021-06-15 22:12:21
    КОРОНА ТУССАН ХҮҮХЭД: БАЙДАЛ ИЙМ БАЙХАД ТӨР ЗАСАГ 10 ТЭРБУМААР НААДАМ ХИЙНЭ ГЭНЭ. НАЙР НААДАМ ХИЙХГҮЙ БОЛ МОНГОЛ УЛС СӨНӨХ ГЭНЭ.
  • Сэтгэгдэл үлдээсэн: 2021-06-15 22:12:21
    КОРОНА ТУССАН ХҮҮХЭД: БАЙДАЛ ИЙМ БАЙХАД ТӨР ЗАСАГ 10 ТЭРБУМААР НААДАМ ХИЙНЭ ГЭНЭ. НАЙР НААДАМ ХИЙХГҮЙ БОЛ МОНГОЛ УЛС СӨНӨХ ГЭНЭ.
  • Сэтгэгдэл үлдээсэн: 2021-06-15 17:57:15
    M: UNEHEER ULSAA SAMARCH BNA DAA ENE ULS TURCHID
  • Сэтгэгдэл үлдээсэн: 2021-06-15 13:17:12
    зочин: үнэхээр сэтгэл өвдөж байна. Төрийн өндөрлөгт байгаа сандал суудлын төлөө буруу шийдвэр гаргаж байгаа хүмүүс үнэхээр ард олнно үгүй хийхийг хүсээд байгаа юм уу л гэж хэлмээр байна. Амарсайхан ОюунЭрдэнэ. Сумъяабазар нар нэн тэргүүнд ард түмнээ бодмоор юм даа. үнэхээр л төрийн эмгэнэл.
  • Сэтгэгдэл үлдээсэн: 2021-06-15 11:56:06
    zochin: Huuhduud ovdood, mongolchuud bid tsoohuulee shuu dee.
  • Сэтгэгдэл үлдээсэн: 2021-06-15 11:51:34
    бат: ямар хэцүү юм бэ. энэ улс төрчид үнэхээр улс орныг алах юмаа
  • Сэтгэгдэл үлдээсэн: 2021-06-15 11:34:38
    эмс: 15с халдвар буурна гэж эрүүл мэндийн сайд хэлсэн, гэтэл юу болж байнаа, яагаад худлаа хэлээд байдын
  • Сэтгэгдэл үлдээсэн: 2021-06-15 10:31:31
    K: Balai yumaa huuhduud ovdono gedeg uneheer hetsuu..,
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188