Төмөр замын дээд сургуулийн захирал У.Мягмарсүрэнг эрх мэдэл, албан тушаалаа урвуулан ашиглаж, 54 оюутнаас их хэмжээний хахууль авч, хууль бусаар элсүүлсэн гэх мэдээлэл гарсан. Түүнийг дээрх гомдол, мэдээллийн дагуу АТГ-аас шалгаж байгаа талаар эх сурвалж мэдээлсэн юм. Энэ талаар Төмөр замын дээд сургуулийн захирал У.Мягмарсүрэнгээс тодрууллаа.

-Таныг 54 оюутнаас их хэмжээний хахууль авч, хууль бусаар сургуульд элсүүлсэн гэх мэдээлэл байна. Таныг энэ асуудлаар АТГ-аас шалгаж байгаа юу?

       -Би нэг ч оюутнаас хахууль авч, сургуульд элсүүлээгүй. Манайх Орос-Монголын хувь нийлүүлсэн нийгэмлэгийн сургууль учраас бид удирдлагын өгсөн үүрэг, даалгаврын дагуу ажилладаг. Ийм худал гомдол, мэдээлэл гаргасанд гайхаж байна. Өчигдөр АТГ-аас над руу ярьсан. Тэгэхдээ “Таныг эрх мэдэл, албан тушаалын байдлаа урвуулан ашиглаж 54 оюутнаас их хэмжээний хахууль авсан гэх гомдол ирсэн байна. Үүнтэй холбоотойгоор Улаанбаатар төмөр замын Аудитын газар руу бичиг явуулна. Танай дотоод хяналт, шалгалтын дүгнэлтээс шалтгаалж, таныг шалгах эсэхийг шийднэ”  гэсэн. Уг нь би Улаанбаатар төмөр замын Аудитынхан шалгаж, дүгнэлтээ гаргачихсан. Нийслэлийн боловсролын мэргэжлийн хяналт, Ерөнхий боловсролын мэргэжлийн хяналт шалгалт хийсэн гэдгийг хэлсэн. Шалгалтын бүх баримт бий.

-Таны авлига авсан гэх оюутны тоо тодорхой байна. Та өөрийгөө шалгуулахад бэлэн үү?

         -Энэ хэргээр АТГ-т шалгуулахад бэлэн байна. Би авлига авдаг хүн биш. Харин авлигын эсрэг байр суурьтай ажилладаг.

-Ямар хүн таны талаар дээрх гомдлыг гаргасан гэж бодож байна вэ. Танд таамаглаж байгаа хүн байна уу?

        -АТГ-аас холбогдсон хүн манайд эдийн засагчаар ажиллаж байсан Шижир гэх залуугийн талаар цухаж дурдсан учир түүнийг мэдээлэл өгсөн байж магадгүй гэж таамаглаж байна. Тэр Хөдөлмөрийн хууль зөрчиж, гэнэт ажлаас гарч, хийх ёстой үүрэг, даалгавраа биелүүлээгүй учир тойрох хуудас дээр нь гарын үсэг зураагүй. Амралтын мөнгийг нь олгоогүй байж байгаад сүүлд нь нөхөж олгосон. Тэр асуудлаас болсон болов уу. Би хүнтэй муудаад байдаг хүн биш.Тиймээс нэр төрөө сэргээж, гомдол гаргах бодолтой байгаа.