• Өнөөдөр 2024-03-29

Г.ЖАРГАЛСАЙХАН: Баянзүрх дүүрэгт шинжилгээний сорьц дуусаагүй, нөөц хүрэлцээтэй байгаа

2021-02-22,   1626

-Нэг айлаас 2-3 хүн шинжилгээ өгч буй тохиолдол их гарч байна-

 “Нэг хаалга-Нэг шинжилгээ” аяны хүрээнд Баянзүрх дүүргийн иргэд шинжилгээ өгөхөөр очтол сорьц дууссан гэх шалтгаанаар шинжилгээ авахгүй байна гэх мэдээлэл гарсан. Үүнийг Баянзүрх дүүргийн Засаг даргын орлогч Г. Жаргалсайханаас тодрууллаа.

-“Нэг хаалга-Нэг шинжилгээ” аян өнөөдөр танай дүүрэгт үргэлжилж байгаа. Зарим хорооны иргэд шинжилгээ өгөхөөр очтол сорьц дууссан гэх шалтгаанаар шинжилгээ авсангүй гэж байна?

-Манай дүүрэгт 104 мянган өрх байгаагаас энэ сарын 21, 22-нд 45800 иргэнийг шинжилгээнд хамруулах шаардлагатай байгаа. Энэ сарын 8, 9, 10-ны өдөр дүүргийн орон нутагт амьдардаг 6341 төрийн албан хаагчдаас шинжилгээ авсан. Мөн 11, 12, 13-нд түүврийн аргаар 30481 хүнийг шинжилгээнд хамрууллаа. 14, 15, 16, 17-нд үйл ажиллагаа явуулахыг зөвшөөрсөн зарим байгууллагын 22141 иргэнийг шинжилгээнд хамруулсан юм. Өчигдөр 30 мянга орчим хүнээс шинжилгээ авах байсан ч 51 мянга гаруй иргэнээс авсан. Үүнээс харахад  дүүргийн иргэд 100 хувь шинжилгээнд хамрагдсан мэт боловч хамрагдаагүй өрх олон бий.

Учир нь нэг айлаас 2-3 хүн шинжилгээ өгч буй тохиолдол их гарч байна. Иргэд үүнийг буруу ойлгож “Би шинжилгээ өгөх гэтэл сорьцгүй гээд авахгүй байна” хэмээн ярьж байна. Үүнээс шалтгаалан зарим айл хамрагдахгүй үлдэж байгаа. Өнөөдөр 10 мянган иргэнийг шинжилгээнд хамруулахаар төлөвлөсөн. Бүх хороон дээр жигд хувиарлан гаргасан. Сорьц, бээлий, хамгаалах хувцас дууссан асуудал байхгүй. Нөөц  хүрэлцээтэй бий.

Тухайн багийг шинжилгээ авах ажилд гарахад  нь “200, 300 хүнээс шинжилгээ аваарай” гэж хуваарилж гаргадаг. Шинжилгээ авах норм дууссан багийнхан “Манай багийн шинжилгээ авах норм дуусчихлаа. Тийм учраас өөр цэгт очиж өгөх боломжтой. Эсвэл маргааш шинжилгээнд хамрагдаж болно” гэх тайлбар өгдөг. Иргэд үүнийг буруу ойлгож “Би шинжилгээ өгөх гэтэл сорьцгүй гээд авахгүй байна” хэмээн ярьж байна.

-Дүүрэг дээр “Нэг хаалга-Нэг шинжилгээ” хэзээ хүртэл үргэлжлэх вэ?

-Хөл хорио маргааш өглөөний 06:00 цагт дуусна. “Нэг хаалга-Нэг шинжилгээ” аян дүүргийн өрх бүр хамрагдаж дуустал үргэлжилнэ. Хорооны өрхийн эрүүл мэндийн ажилчид шинжилгээнд хамрагдаагүй айлын хаалга тогшиж, шинжилгээнд хамрагдахыг зөвлөж, ажлыг үргэлжлүүлж байгаа.

-Танай дүүрэгт өнөөдөр шинжилгээ авах хэчнээн баг ажиллаж байна вэ?

-Өнөөдөр 40 гаруй баг ажиллаж байна. 23 дугаар хорооны 87 дугаар сургууль дээр суурин шинжилгээ авах цэг ажиллаж байгаа. Мөн явуулын баг ажиллаж байна. Тэд автобус болон орцонд шинжилгээ авч байна.  Лаборатори өдөрт 40 мянга сорьц шинжлэх  хүчин чадалтай. Түүнд захирагдан өчигдөр 14:00 цагаас шинжилгээ авах ажлаа зогсоосон.

 

 


Г.ЖАРГАЛСАЙХАН: Баянзүрх дүүрэгт шинжилгээний сорьц дуусаагүй, нөөц хүрэлцээтэй байгаа
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188