Нийслэлийн Хан-Уул дүүрэгт орших Зайсан толгой буюу Зөвлөлтийн дайчдын дурсгалын цогцолборын хажууд газар ухаж байгаа тухай мэдээлэл цахим орчинд тархсан. Үүнтэй холбоотойгоор Байгаль орчин, аялал жуулчлалын яамны Тусгай хамгаалалттай бүс нутгийн удирдлагын газрын ашиглалтын мэдээллийн сан хариуцсан мэргэжилтэн Б.Мөнхтөртэй холбогдож тодруулсан юм.

Тэрбээр “Зайсан толгой орчмын газрын ухаж байхад нь Богдхан уулын дархан цаазат газрын хамгаалалтын захиргааны албанаас өнөө өглөө очиж, шалгалтын ажиллагаа явуулж, үйл ажиллагааг нь зогсоосон”  гэлээ.

Энэ талаар Богдхан уулын дархан цаазат газрын хамгаалалтын захиргааны Газрын асуудал хариуцсан мэргэжилтэн Г.Мөрөнтэй холбогдож тодруулахад

          “Зайсан толгой орчмын газарт үйл ажиллагаа явуулах бичиг баримтын бүрдэлт дутуу байсан учир үйл ажиллагааг нь зогсоосон. Одоогоор Мэргэжил хяналтын албанаас шалгалтын ажиллагаа явуулж байгаа.

          Тус газарт үйл ажиллагаа явуулах гэрчилгээг иргэн О.Одсүрэн авсан ч, үйл ажиллагаа явуулахын тулд Нийслэл, Богдхан уулын дархан цаазат газрын хамгаалалтын захиргаанаас зөвшөөрөл авах ёстой.Одоогийн байдлаар гүйцэтгэгч компанийн нэр тодорхойгүй байна” гэв.

Хан-Уул дүүрэгт орших Зайсан толгой нь улсын тусгай хамгаалалттай газарт багтдаг. Тусгай хамгаалалттай газарт үйл ажиллагаа явуулах зөвшөөрлийг Байгаль орчин, аялал жуулчлалын сайдын тушаалаар олгодог. Зайсан толгойд ухалт хийж байсан газар нь иргэн О.Одсүрэнгийн эзэмшилд байдаг бөгөөд Байгаль орчин, аялал жуулчлалын сайд асан Н.Цэрэнбатын 2019 оны А-158 дугаар тушаалаар иргэн О.Одсүрэнд  2.041 га газар олгосон байна.