"Фантастик" продакшны жүжигчин Э.Одбаярын төрсөн өдөр өнөөдөр тохиож байна. Тэрбээр Кино урлагийн сургуулийг жүжигчин мэргэжлээр төгсөж, "Шинэ үе" продакшнд ажиллаж байгаад,өдгөө "Фантастик" продакшнд харьяалагдаж буй. Тэрбээр “Маш нууц” киноны Түвдэн цэрэг, “Байтагбогд” киноны улсын баатар хилчин Тэгшээ, “Зүрхний хилэн” киноны Гарам, “Параллель ертөнц” киноны хөгжилтэй Анар, “18 нас би чамд хайртай” киноны холимог тулаанч Хүлэг, “Зура” киноны хамгаалалтын ажилтан гээд олон сайхан дүрийг бүтээсэн. Хамгийн сүүлд Зура III "Цэвэрлэгээ" киноны тагнуулын газрын ажилтан Хуягийн дүрд амжилттай тоглосон юм.  

      Тоглосон дүрээс нь ганцхан жишээ дурдахад, “Маш нууц” киноны Түвдэнг санаж байгаа биз дээ. Ганцаараа амьд үлддэг. Нэг хүн ч болов амьд үлдээсэй гэж хүсэж байсан үзэгчдийн хүслийг тэр биелүүлж, уснаас гарч ирээд кино төгсдөг. Тэр төгсгөл, эл дүр үзэгчдэд их тод. Зарим үзэгч түүнийг “Энэ чинь өнөө “Маш нууц” киноны амьд үлддэг нөхөр байна” гэж ярих нь ч бий. Түүнд төрсөн өдрийн мэнд хүргэе.