МУГТ С.Мөнхзулын нэрэмжит “Классик” пауэрлифтингийн  XI удаагийн УАШТ Дорноговь аймагт болж өндөрлөсөн билээ. Тус УАШТ-ий залуучуудын ангиллын  эмэгтэйчүүдийн 66 кг-ын жинд нийлбэр дүнгээр түрүүлсэн, Ганболдын Наранзултай ярилцлаа. Тэрбээр Монгол Улсын залуучуудын улсын аварга шалгаруулах тэмцээнээс гурван алт, таван мөнгө, хоёр хүрэл медаль хүртээд байгаа.

-Пауэрлифтингийн 2026 оны улсын аварга болсонд баяр хүргэе.

       -Танд их баярлалаа.

–Хэдэн насны ангилалд, хэдэн төрөлд оролцож алтан медаль хүртсэн бэ?

      -Залуучуудын ангиллын  эмэгтэйчүүдийн 66 кг-ын жинд нийлбэр дүнгээр түрүүлсэн. Би энэ жил анх удаа өсвөр үеэс, залуучуудын ангилалд шилжин орсон.

-Миний дүү өөрийгөө манай уншигчдад танилцуулахгүй юу?

     -Намайг Ганболдын Наранзул гэдэг.  Би доороо таван дүүтэй. Айлын том охин.

-Аль аймаг, хотод төрсөн хүүхэд вэ?

         -Би Төв аймгийн Жаргалант суманд төрж, өссөн.

-Одоо хэдэн настай вэ?

      -Одоо би19 настай хүрч байгаа.

-Миний дүү дунд сургуулийн сурагч уу, оюутан уу?

     -Би Олон улсын “Улаанбаатар” их сургуулийн Хууль зүйн сургуулийн 1-р дамжааны оюутан.

-Пауэрлифтингийн өөр спортын төрлөөр хичээллэж байсан уу?

      -Анх ерөнхий боловсролын дунд сургуулийн 5-р ангид байхдаа Э. Алтанцоож, П. Мөнхсум багш нарын удирдлага дор чөлөөт бөхийн спортоор хичээллэж эхэлсэн. Чөлөөт бөхөөр 11-р анги хүртлээ хичээллэсэн. Түүний дараа пауэрлифтингийн спортоор хичээллэсэн.

-Одоо ямар клубт, хэн багшийн удирдлага дор бэлтгэл, сургуулилалтаа хийж байгаа вэ?

       -Одоогоор “Strong” клубт хамрагдан, бэлтгэл сургуулилалтаа тогтмол хийж байна.

 –Пауэрлифтингийн спортоор хэд жилдээ хичээллэж байгаа вэ?

       -Пауэрлифтингийн спортыг сонирхож  хичээллээд хоёр дахь жилдээ явж байгаа.

-Спортын ямар зэрэг, цолтой тамирчин бэ?

      -Пауэрлифтингийн спортын дэд мастер цолтой. Харин чөлөөт бөхийн спортын хоёрдугаар зэрэг хүртсэн

–Анх яагаад пауэрлифтингийн спортыг сонгож хичээллэх болсон бэ?

      -Чөлөөт бөхөөр хичээллэдэг байх үед хүчний гурван төрөлтийн зааланд бэлтгэл хийхээр очсон юм. Тухайн үед би чөлөөт бөхийн спортоор хичээллэхээ болихоор шийдчихсэн байсан үе л дээ. Манай сумын пауэрлифтингийн тамирчид аймгийн аварга шалгаруулах тэмцээнд явах гэж байлаа. Тэр үед пауэрлифтингээр хичээллэдэг найз маань надаас “Чи бидэнтэй хамт явах уу” гэсэн санал тавьсан. Би нэлээн гайхаж, эргэлзэж байгаад найзыгаа дагаад Төв аймгийн аварга шалгаруулах пауэрлифтингийн тэмцээнд оролцохоор явсан.

     Аймгийн аваргад очоод, өөрийн өргөж чадах хэмжээнд захилга өгөөд,  өргөөд, өрсөлдөөд байсан чинь дөрвөн мөнгөн медаль хүртчихдэг байгаа. Тэр медалиас маш их урам, хүч авсан. Ер нь надад  пауэрлифтингийн спорт үнэхээр тохирох юм байна. Пауэрлифтингийн спортоор хичээллэж үзээгүй байж ийм амжилт гаргаж байгаа юм чинь тогтмол хичээллээд явах юм бол үүнээс илүү өндөр амжилт гаргах боломж байгаа юм байна гэсэн бодол төрсөн.

–Пауэрлифтингийн спортыг анх сонгох үед аав, ээж, гэр орныхон нь эсэргүүцэж байсан уу?

      -Пауэрлифтингийн спортоор хичээллэж эхлэх үед аав, ээж хоёр маань дурамжхан байсан. Тэгээд  намайг тэмцээнд ороод амжилт гаргаад байсан болохоор яах ч арга байхгүй ээ байх. Сүүлдээ эсэргүйцэж, хориглохоо больж, харин ч их дэмждэг болсон.

 –Пауэрлифтингийн спортоор хичээллэсэн үеэс хойш ямар эерэг өөрчлөлтүүд гарсан бэ?

       -Пауэрлифтингийн спортоор хичээллэж эхэлснээс хойш амжилт ахиж, танилын хүрээ маань өргөжин, олон шинэ найз нөхөд, ах, эгч нартай болсон. Мөн биеийн ерөнхий хүч маань мэдэгдэхүйц нэмэгдэж, олон шинэ зүйл сурч авсан.

–Пауэрлифтингийн спортоор хичээллэсэн үеэс хойших томоохон амжилтаасаа сонирхуулахгүй юу?

      -Улсын аварга болсон. Залуучуудын улсын аварга шалгаруулах тэмцээнээс гурван алт, таван мөнгө, хоёр хүрэл медаль хүртсэн.

–Улсын рекорд, дээд амжилтыг тогтоож байсан уу?

      -Би энэ жил 19 нас хүрч, өсвөр үеийн ангиллаас хасагдан. Залуучуудын ангилалд анх удаа орж байгаа болохоор одоогоор Монгол Улсын  рекорд, дээд амжилтыг тогтоож, амжаагүй л явна.

 -Чөлөөт цагаараа пауэрлифтингийн гадна өөр юу хийх дуртай вэ?

       -Чөлөөт цагаараа ном уншихыг боддог. Агаар, салхинд алхах, хичээлээ хийх, гэр бүлийнхэнтэйгээ цагийг өнгөрөөх дуртай.

 –Сэтгэлд тань хоногшин үлдсэн хамгийн сайхан дурсамж үлдээсэн ямар тэмцээн байдаг вэ?

       -Пауэрлифтингийн тэмцээнүүдээс хамгийн дурсамжтай нь гэвэл спортын дэд мастерийн болзол хангаж байсан тэмцээн юм. Тус тэмцээн Сайншанд хотод зохион байгуулагдсан бөгөөд. Багийнхантайгаа амжилттай оролцсон. Хамрын хийд, Хүслийн уул зэрэг газруудаар хамтдаа аялсан нь хамгийн сайхан дурсамж болсон.

-Одоо дараагийн оролцох ямар тэмцээнүүд хүлээж байгаа вэ?

      -Одоогоор хамгийн ойрын тэмцээн гэвэл ирэх тавдугаар сарын 3-ны өдөр болох “Equipped” пауэрлифтингийн улсын аварга шалгаруулах тэмцээнд бэлтгэж байна.