“Москва-1980” олимпын наадмын мөнгөн медальт, Монгол Улсын гавьяат тамирчин,  Ж.Даваажав агсны нэрэмжит бөхийн чөлөөт барилдааны 2026 оны насанд хүрэгчдийн  УАШТ нэгдүгээр сарын 9-11-ний өдрүүдэд явагдаж өндөрлөв. Насан үрэгчдийн УАШТ-ий эмэгтэйчүүдийн 53 кг-ын жинд барилдаж хүрэл медаль хүртсэн, “Дархан Хасу” клубийн тамирчин, спортын мастер, Ганхуягийн Цовоотой ярилцлаа. Тэрбээр 2021онд өсвөр үеийн улсын аварга болж байсан.  2023 онд насан хүрэгчдийн УАШТ-ээс хүрэл медаль хүртсэн. 2024 онд залуучуудын улсын аваргад түрүүлсэн. 2025 онд Монголын бүх ард түмний спартакиадаас мөнгөн медаль хүртэж байлаа.

-2026 оны насанд хүрэгчдийн УАШТ-ээс хүрэл медаль хүртсэнд баяр хүргэе.                      

      -Сайн байна уу. Танд их баярлалаа.

-УАШТ-ий хүрэл медалийн төлөө Б.Халиунтай ямар тактикаар барилдаж ялалт байгуулав?

      -УАШТ-ий хүрэл медалийн төлөөх барилдаанд өрсөлдөгч Б.Халиун бэртлийн улмаас дэвжээнд гарч ирээгүй. Тийм болохоор барилдалгүй шууд ялалт авч хүрэл медаль хүртсэн.

-Эмэгтэйчүүдийн 53 кг-ын жингийн тойргийн барилдаанд хэдэн бөхтэй барилдаж, хэдэн ялалт авч хүрэл медаль хүртэв?

        -Манай жинд зургаан тамирчин барилдсан.  Хоёр зоонд хуваагдан, нэг зоонд гурван бөх барилдсан байгаа. Би зоондоо нэг барилдаан хийж Б.Халиунд ялагдаж зооноосоо хоёроор гарч, нөгөө зооноос нэгээр гарсан 53 кг жинд алтан медаль хүртсэн Баянмөнхийн Отгонтуяа эгчтэйгээ барилдаж 11:1-ийн харьцаагаар ялагсан.

-Дарханаас ДАШТ-ий мөнгөн медаль, МУГТ Д.Отгонцэцэг, ОУХМ Ц.Намуунцэцэг нар эмэгтэй хөнгөн жинд тив, дэлхийд барилдаж байлаа. Сая УАШТ дээр клубийнхээ эгч ОУХМ Ц.Намуунцэцэгтай ямар барилдаан хийсэн бэ?

      -Энэ жилийн УАШТ-д ОУХМ Ц.Намуунцэцэг эгчтэйгээ таарч барилдаагүй. Намуунаа эгч манай жингийн нөгөө хэсэгт орж барилдсан байгаа.

-Насанд хүрэгчдийн УАШТ-д урьд өмнөх жилүүдэд барилдаж байсан уу?

      -Насанд хүрэгчдийн улсын аварга шалгаруулах тэмцээнд нийтдээ дөрвөн дэх удаагаа барилдаж байна.

-Миний дүү өөрийгөө танилцуулахгүй юу?

        -Намайг Ганхуягийн Цовоо гэдэг. Би 2004 оны дөрөвдүгээр сарын 9-ний өдөр Улаабаатар хотод төрсөн.

 -Одоо хэдэн настай вэ?

         -Одоо ирэх дөрөвдүгээр сарын 9-ний өдөр 22 нас хүрнэ.

-Ямар сургуульд сурдаг вэ?

          -Би Үндэсний биеийн тамирын дээд сургуульд суралцдаг.

-Чөлөөт бөхөөс өмнө өөр спортын төрлөөр хичээллэж байсан уу?

           -Чөлөөт бөхөөс өөр спортын төрлөөр хичээллэж байгаагүй.

-Чөлөөт бөхийн спортыг сонгож хичээллэх болсон шалтгаан юу байв?

            -Аав маань аймгийн заан цолтой хүн байдаг. Тийм болохоор багаасаа л аавынхаа барилдахыг харж, өссөн. Аав маань надтай их барилддаг байж билээ. Дандаа надад худал унаж өгдөг байсан. Жаахан байсан болохоор аавыгаа унагачихлаа гэж баярлаж, урам авдаг байв. Тэр бүхэн миний бөхийн спортыг сонгож, хичээллэх шалтгаан байсан юм болов уу.

–Дарханы МУГД Ц.Баярсайхан, ОУХМ Ё.Батдархан, Баярхүү, Ж.Ганболд, Оюунбаяр нарын хэн нь чиний анхны багш вэ?

         -ОУХМ Шураагийн Баянмөнх миний анхны багш байгаа. Харин одоо МУГД Цэндийн Баярсайхан багш дээр бэлтгэл сургуулилалтаа хийж байгаа.

-Чөлөөт бөхөөр хэд жилдээ хичээллэж байгаа вэ?

         -2019 оноос хойш тууштайгаар хичээллэж байна.

 -Спортын ямар зэрэг, цолтой вэ?

         -Чөлөөт бөхийн спортын мастер цолтой.

–“Дархан Хасу”, “Дархан-Эрхэт”-ийн аль клубийн тамирчин бэ?

          -“Дархан Хасу” клубийн тамирчин.

 -Чөлөөт бөхөөр хичээллэсэн үеэс хойших томоохон амжилтаасаа сонирхуулахгүй юу?

         -2021онд өсвөр үеийн улсын аварга болж байсан.  2023 онд насан хүрэгчдийн УАШТ-ээс хүрэл медаль хүртсэн. 2024 онд залуучуудын улсын аваргад түрүүлсэн. 2025 онд Монгол бүх ард түмний спартакиадаас мөнгөн медаль хүртэж байлаа.

-Сэтгэлд тань хоногшин үлдсэн хамгийн сайхан дурсамж үлдээсэн ямар барилдаан байдаг вэ?

        -Би анх удаа 2024 онд залуучуудын Азийн аварга шалгаруулах тэмцээнд оролцож үзсэн.  Гадаадын тэмцээнд оролцсон хамгийн том тэмцээн маань энэ тэр байлаа.  Азийн аваргын эхний тойргийн барилдаанд ялагдсан. Тэр Азийн аваргын тэмцээнээс маш их зүйлийг ойлгож,  их зүйлийг сурсан.

-Чөлөөт цагаараа юу хийх дуртай вэ?

        -Чөлөөт цагаараа найзууд гэр бүлтэйгээ цагийг өнгөрөөх дуртай.

-Цаашдын зорилго, зорилго гэвэл?

        -Энэ спортоороо ДАШТ-ий мөнгөн медаль МУГТ Д.Отгонцэцэг ОУХМ Ц.Намуунцэцэг эгч нарынхах залгамж халаа болж дэлхийн медальтай таиирчин болох том зорилго бий.