“Токио-2025” жүдо бөхийн “Гранд слам”-аар энэ жилийн Олон улсын  жүдо бөхийн холбоо, “IJF”-ийн цуврал тэмцээнүүд  өндөрлөж байна. 2026 оны эхний цуврал нь “Парис-2026” жүдо бөхийн “Гранд слам” тэмцээн байх болно.  Япончууд арванхоёрдугаар сарын 6-7-ны өдрүүдэд нутаг дээрээ зохион байгуулсан “Токио-2025” тэмцээнд бүрэн  “Ноёрхож” чадлаа. “Их дуулга”-ын  гурван жингийн алтан медалийг алдаж бусад 11 жинд алтан медаль авсан юм. Манай жүдочид нэг хүрэл, нэг тавдугаар байр, дөрвөн тамирчин долдугаар байрт шалгарсан амжилтаар багийн дүнгээр 41 орноос VIII  байрт шалгарлаа. Багийн дүнгээр Японы тамирчид 11 алт, 11 мөнгө, 15 хүрэл медальтайгаар тэргүүлсэн. Удаах байрт ОХУ-ын баг нэг алт, нэг мөнгө, гурван хүрэл медальтайгаар, Өмнөд Солонгос нэг алт, нэг мөнгө, нэг хүрэл медалтайгаар гуравдугаар байрт шалгарсан юм. Харин хүчирхэг Франц Улсын баг, манай багийн нэг хүрэл, гурван тавдугаар, нэг долдугаар байрын амжилтаар Монгол Улсын өмнө долдугаар байрт орлоо.

О.УРАНБАЯР “ТОКИО ИХ ДУУЛГА”-ЫН ХҮРЭЛ МЕДАЛИЙН ЭЗЭН БОЛОВ

    Эрэгтэйчүүдийн 73 кг-ын жинд 24 жүдочин барилдсан. Манай улсаас ДАШТ-ий хүрэл медальт, ОУХМ Лавжаргалын Анхзаяа, “Улаанбаатар-2025 Гранд слам”-ын аварга, ОУХМ Одгэрэлийн Уранбаяр нар өрсөлдсөн юм. ОУХМ О.Уранбаяр  “В” хэсгийг толгойлон барилдсан. Тэрбээр нэгдүгээр тойрогт гоц мөргөн ялалт авсан байгаа. Хоёрдугаар тойрогт Бахрейны  Mukhamed ALOEV-ыг ялсан юм. Улмаар “В” хэсгийн аваргын төлөөх барилдааныг Японы Shusuke UCHIMURA-д хожигдсон.

    Дагах тойргийн барилдаанд АНУ-ын Jack YONEZUKA-г ялж, финалын барилдааныг Yudai TANAKA-тай хийж буулган авсанаар “Токио-2025”, “Их дуулга”-аас Монголын тамирчдын цорын ганц хүрэл медалийг хүртсэн. О.Уранбаяр Японы тамирчныг нутгийн татами дээр нь тонгорч, уран гоё барилдаан үзүүлсэн нь гайхалтай байв.

    Харин ДАШТ-ий хүрэл медальт, ОУХМ Лавжаргалын Анхзаяа “D” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт АНУ-ын Cole CHANDLER-ыг ялсан. Улмаар “D” хэсгийн аваргын төлөөх барилдааныг Японы Yudai TANAKA-д хожигдсон. Улмаар дагах тойргийн барилдаанд олимп, дэлхийн аварга, Гүржийн Lasha SHAVDATUASHVILI аваргад хожигдож долдугаар байраар тэмцээнээ өндөрлүүлсэн.

Ж. АНУДАРЬ МЕДАЛЬД ИХ ОЙРХОН БАЙЛАА

     Эмэгтэйчүүдийн 48 кг-ын жинд өсвөр үеийн дэлхийн аварга, “Душанбе-2025 Гранд слам”-ын аварга, 18 настай залуу тамирчин, Жамсрангийн Анударь барилдлаа. Тэрбээр “D” хэсгийн нэгдүгээр тойрогт Өмнөд Солонгосын хашир туршлага тамирчин PARK Eunlee-г, хоёрдугаар тойрогт, хэсгийн аваргын төлөөх барилдаанд амаргүй өрсөлдөгч Чилийн Mary Dee VARGAS LEY-г ялж, “D” хэсгийн аварга болсон. Улмаар шөвгийн дөрөвт шалгарч үлдэн, Японы Wakana KOGA-д хожигдсон юм.

      Харин Кога “Их  дуулга”-д түрүүлсэн. Ж.Анударь хүрэл медалийн төлөөх барилдааныг Тайванийн LIN Chen-Hao-той хийсэн. Үндсэн барилдааны цагт Ж.Анударь санаачилга гарган барилдаж, олон мэх хийсэн хэдий Тайванийн тамирчинг шүүгч торгохгүй байлаа. Манай бөхийн мэхэнд  LIN Chen-Hao унахдаа өгзөгөөрөө сууж, алгаараа тулсан байхад дүрмийн дагуу үнэлгээг нь өгөхгүй байсаар нэмэлт цаг руу оруулсан юм. Нэмэлт цагт мөн л Ж.Анударь санаачилгатай барилдсан хэдий ч, LIN Chen-Hao-г бас л торгохгүй байв. Тийм болохоор манай бөх, түүнийг торгуулиар ялахын тулд жаахан яарч дутуу мэх хийх үед  алдааг нь ашиглан давж, эргээд  LIN Chen-Hao ялалтыг авсан. Манай залуу тамирчин, Ж.Анударь, М.Нандин-Эрдэнэ нар үнэхээр сайн барилдлаа. Японы жүдочдоос дутаад байх зүйл алга, мэхээ даацтай хийж, хэвтээ барилдаанаа сайжруулах юм бол дэлхийн томчуудыг айлгах хэмжээний сайн тамирчид болжээ.

МАНАЙ БУСАД ЖҮДОЧИД АМЖИЛТТАЙ БАРИЛДАЖ ЧАДСАНГҮЙ

     Эрэгтэйчүүдийн 60 кг-ын жинд 21 жүдочин барилдсан. Манай тамирчин, ДАШТ-ий хүрэл медальт ОУХМ К.Ёолк  “А” хэсгийн нэгдүгээр тойрогт Израилийн 18 настай залуу тамирчин Izhak  ASHPIZ-д хожигдсон. ОУХМ Б.Сүхбат “D” хэсгийн нэгдүгээр тойрогт Польшийн  Ksawery IGNASIAK-тэй барилдаж ялагдал хүлээв.

     Эрэгтэйчүүдийн 66 кг-ын жинд 29  жүдочин барилдсан. ОУХМ Б.Эрхэмбаяр “D” хэсгийн нэгдүгээр тойрогт Киргизстаны Baibol SALAMAT UULU-г ялсан. оёрдугаар тойрогт Японы  Kairi KENTOKU-д ялсан байгаа. Эрэгтэйчүүдийн 81 кг-д Нэргүйн Жангарай, Тажикстаны бөхөд, 90 кг-д Цэрэндуламын Дагвадорж, Тайванийн тамирчныг ялаад, Японы Goki TAJIMA-д хожигдлоо. +100 кг-ын жинд ОУХМ Батхуягийн Гончигсүрэн, Гүржийн  Irakli DEMETRASHVILI-д, ОУХМ О.Цэцэнцэнгэл дагах тойргийн барилдаанд дэлхийн аварга, Өмнөд Солонгосын KIM Minjong-д хожигдож долдугаар байраар тэмцээнээ өндөрлөв.

Эмэгтэйчүүдийн 52 кг-ын жинд  хэсгийн аваргын төлөөх барилдаанд өсвөрийн дэлхийн аваргын хүрэл медальт Мягмарсүрэнгийн Нандин-Эрдэнэ, олимп, дэлхийн аварга, Японы Ута Абэ-д, Дагах тойргийн барилдаанд Бразилын Larissa PIMENTA нарт хожигдож шагналт долдугаар байрт орсон.

Эмэгтэйчүүдийн 57 кг-ын жинд өсвөрийн дэлхийн аварга, “Токио-2024 Гранд слам”-ын хүрэл медальт, ОУХМ Тэрбишийн Ариунзаяа, Японы Akari OMORI-д хожигдсон. Залуучуудын дэлхийн аварга, ОУХМ Лхагвасүрэнгийн Сосорбарам, Гүржийн Nino LOLADZE-г барсангүй.

Эмэгтэйчүүдийн 63 кг-ын жингийн дагах тойргийн барилдаанд ДАШТ-ий хошой хүрэл медальт, МУГТ Лхагватогоогийн Энхрийлэн дагах тойргийн барилдаанд Чехийн Renata  ZACHOVA-д хожигдож шагналт долдугаар байраар тэмцээнээ өндөрлүүлсэн.

Тус жингийн “D” хэсгийн нэгдүгээр тойрогт, залуу тамирчин Хөхөөсүрэнгийн Ариунтунгалаг, Өмнөд Солонгосын KIM Jisu-д хожигдсон. Эмэгтэйчүүдийн -78 кг-ын жинд ОУХМ Отгонбаярын Хүслэн, Тайванийн Shu Huei HSU WANG-д хожигдсон байгаа.