Олон улсын таеквондо-гийн Монголын холбооны "Мөнх хөх сүлд" клубээс уламжлал болгон зохион байгуулдаг “Сүлд цом –2025” нээлттэй тэмцээн арваннэгдүгээр сарын 29-30-ны өдрүүдэд амжилттай зохион байгуулагдаж өндөрлөсөн билээ. Тус тэмцээнээс хоёр алт, нэг мөнгөн медаль хүртэж, “Шилдэг эмэгтэй тамирчин”-ын шагналыг хүртсэн Золбоогийн Мөнххүсэлтэй ярилцлаа. Тэрбээр таеквондо-гийн спортын мастер, олон улсын хар бүс нэгдүгээр дантай. Нийслэлийн 67-р сургуулийн сурагч, “Мөнх хөх сүлд” клубийн тамирчин юм.

-Олон улсын таеквондо-гийн “Мөнх хөх сүлд” клубийн нэрэмжит “Сүлд цом-2025” нээлттэй тэмцээний “Шилдэг эмэгтэй тамирчин”-ын шагналыг хүртсэнд баяр хүргэе.

     -Баярлалаа. Би энэ шагналыг хүртсэндээ маш их баяртай байгаа.

-“Сүлд цом-2025” нээлттэй тэмцээнд хэдэн төрөл ангилалд өрсөлдөж хэдэн медаль хүртсэн бэ?

      -“Мөнх хөх сүлд” клубийн нэрэмжит “Сүлд цом-2025” нээлттэй тэмцээнд тулаан, түль, хосен суль гэсэн гурван төрлөөр оролцож хоёр алт, нэг цом, нэг мөнгөн медаль хүртсэн.

Тус тэмцээний тулааны төрөлд алт, түль буюу хөдөлгөөнт тоот дасгалын төрөлд мөн алтан медаль, хосен суль буюу зохиомол тулааны төрөлд цом, мөнгөн медаль хүртсэн байгаа.

      Мөн Нийслэлийн гэр бүл, хүүхэд залуучуудын хөгжлийн газраас “Шилдэг хүүхэд” алтан медаль, Монголын мастеруудын холбооны “Ирээдүйтэй уран түльчин” алтан медаль, мөнгөн шагнал, “Сүлд цом-2025” тэмцээний “Шилдэг эмэгтэй тамирчин”-аар шалгарч цом, алтан медалиар тус тус шагнуулсан. Тус тэмцээний үеэр “Спортын мастер”-ын цол, тэмдгээ гардан авсандаа маш их баяртай байгаа.

-Миний дүү өөрийгөө танилцуулахгүй юу?

     -Намайг Золбоогийн Мөнххүслэн гэдэг.  Таеквондо-гийн “Мөнх хөх сүлд” клубийн тамирчин.

-Аль аймаг хотод төрсөн хүүхэд вэ?

     -Би Улаанбаатар хотод төрсөн.

-Бага нас нь хаана өнгөрсөн бэ?

    -Миний бага нас Улаанбаатар хот өнгөрсөн. Өвөө, эмээ, аав, ээжийн хамтаар  амьдарч, цэцэрлэгээр хүмүүжиж өнгөрөөсөн.

-Одоо ямар сургуульд сурдаг вэ?

     -Нийслэлийн ерөнхий боловсролын 67 дугаар дунд сургуулийн Ө.Бямбасайхан багштай 8-ын “Г” ангийн сурагч байгаа.

-Гэр бүлд нь спортоор хичээллэдэг хүн бий юу?

     -Тиймээ, байгаа. Манай дүүг З.Энххүслэн гэдэг. Одоо зургаан настай. Дүү таван настайгаасаа “Мөнх хөх сүлд” клуб дээр хичээллэж эхэлсэн.

   2025 оны Монгол Улсын аварга шалгаруулах тэмцээнээс алтан медаль, нэрэмжит тэмцээнүүдээс гурван алт, нэг хүрэл медаль хүртэж байсан. Сая болсон “Сүлд цом-2025” тэмцээнд амжилттай оролцож алтан медаль хүртсэн.

-Гэр бүлээ танилцуулахгүй юу?

     -Манай аавыг Ц.Золбоо, ээжийг Б.Мөнхгэрэл гэдэг. Харин дүүг маань З.Энххүслэн гэдэг юм. Манайх ам бүл дөрвүүлээ амьдардаг.

-Яагаад таеквондогийн спортыг сонгож хичээллэх болсон юм бэ?

      -Таеквондо-гоор анх биеэ хамгаалж сурах зорилготойгоор хичээллэх гэж бодоод орж байлаа. Тэгээд “Мөнх хөх сүлд” клуб дээр бэлтгэл сургуулилалтаа хийгээд тэмцээн уралдаанд оролцож, олон, олон амжилт гаргаад улам их сонирхож хичээллэх болсон.

-Таеквондогийн анхны багш нь хэн бэ?

    -Надад таеквондо-гийн спортыг заасан анхны багш ОУХМ, “Биеийн тамир, спортын тэргүүний ажилтан”,  “Хөдөлмөрийн хүндэт медальтан”, Монгол Улсын таеквондо-гийн Үндэсний шигшээ багийн дасгалжуулагч “Мөнх хөх сүлд” клубийн үүсгэн байгуулагч Д.Аюурзана багш байгаа юм. 

-Одоо бэлтгэл сургуулилалтаа хаана ямар клуб дээр хэн багшийн удирдлага доор хийж байгаа вэ?

      -Би “Мөнх хөх сүлд” клуб дээрээ Д.Аюурзана багшийнхаа удирдлага дор бэлтгэл сургуулилалтаа хийж байгаа.

-Таеквондо-гоос өмнө өөр спортын төрлүүдээр хичээллэж байсан уу?

     -Тийм ээ, би 4-10 нас хүртлээ оюун ухааны спорт “Toya” соробан сампингаар хичээллэдэг байсан. Тэгээд л түүний дараа аав, ээж хоёрынхоо зөвлөсний дагуу эрүүл мэнд, бие бялдрын хөгжилдөө анхаарч, гэнэтийн довтолгооноос биеэ найдвартай хамгаалж сурах шаардлагатай юм байна гэдгийг ойлгоод тулааны спортоор сонирхож хичээллэсэн.

-Таеквондо-гийн спортоор хэд дэх жилдээ хичээллэж байгаа вэ?

      -Таеквондо-гоор 2022 оны гуравдугаар сараас эхэлсэн гэхээр одоо гурван жил гаруй хугацаанд хичээллэж байна.

-Одоо таеквондо-гийн спортын ямар зэрэг цолтой вэ?

   -Би таеквондо-гийн спортын мастер цолтой. Олон улсын хар бүс, нэгдүгээр дантай.

-Таеквондогийн спортоор хичээллэсэн үеэс хойших томоохон амжилтаасаа сонирхуулахгүй юу?

     -Таеквондо-гоор гаргасан томоохон амжилт гэвэл 2024 онд Узбекистан Улсын Ташкент хотод зохион байгуулагдсан дэлхийн цомын аварга шалгаруулах тэмцээнд тулаан, түль гэсэн хоёр төрлөөр оролцож хоёр мөнгөн медаль хүртсэн. Мөн 2024 онд Энэтхэг Улсын Банглор хотод зохион байгуулагдсан Ази тивийн аварга шалгаруулах тэмцээнээс тулаан, түлийн хоёр төрөлд оролцож, тулаанд алт, түлийн төрөлд хүрэл медаль хүртэж байлаа.

2024. онд ОХУ-ын Улан-Үд хотод зохион байгуулагдсан олон улсын тэмцээнээс нэг алт, хоёр хүрэл медаль хүртсэн.  2022-2025 онд Монгол Улсын аварга шалгаруулах тэмцээний таван алт, хоёр мөнгө, хоёр  хүрэл медальтай. 2023 онд Улаанбаатар хотын аварга  шалгаруулах тэмцээнээс алт, хүрэл медаль авч байсан. Нэрэмжит тэмцээнүүдээс 15 алт, дөрвөн мөнгө, зургаан хүрэл медалиудыг тус тус хүртэж байсан.

-Тулааны үед гол төлөв ямар хөл, гарын цохилтыг хамгийн сайн хийж үнэлгээ авдаг вэ?

     -Тулаан дээр гол төлөв доли чаги хөлийн цохилтыг хийдэг. Мөн гүйлтэн дунд гарын цохилт хийнэ. Эргэлттэй өшиглөлт, үсрээд гарын цохилт гэх мэтийг хийдэг.

-Чөлөөт цагаараа юу хийх дуртай вэ?

      -Чөлөөт цаг гарвал Д.Аюурзана багшийнхаа бэлтгэл сургуулилалтан дээр заасан шинэ зүйлсийг давтдаг. Мөн аяллаар явах дуртай.

-Цаашдын зорилго, хүсэл мөрөөдөл гэвэл?

      -Дэлхийн аварга болоод, Монгол Улсынхаа төрийн дууллыг эгшиглүүлж, аавынхаа нэрийг дуудуулах хүсэл мөрөөдөлтэй.