Волейболын үндэсний дээд лигийн 2025–2026 оны улирлын нэгдүгээр тойргийн сүүлийн тоглолт болж өндөрлөсөн билээ. Тус лигийн “Хөвсгөл Долоон-Од” багийн тоглогч ОУХМ Ганболдын Цэцэгжаргалтай ярилцлаа. Тэрбээр волейболын үндэсний дээд лигийн 11 удаагийн аварга юм. Волейболыг үндэсний дээд лигийн 11 алт, хоёр мөнгө, нэг хүрэл медаль хүртэж байсан. 2008 онд олон улсын тэмцээнээс хүрэл медаль, Зүүн Азийн аварга шалгаруулах тэмцээнээс хүрэл медаль хүртсэн. 2009 оны Азийн оюутны аварга шалгаруулах тэмцээнээс хүрэл медальтай. Тус тэмцээний “Үнэ цэнтэй тоглогч”-ийн шагналыг хүртэж байв. 2012 онд мөн Азийн оюутны аварга шалгаруулах тэмцээнээс мөнгөн медаль хүртэж байсан.

-Волейболын үндэсний дээд лигийн тэмцээнд энэ жил тоглож байгаа юу?

     -Энэ жил 2025-2026 оны улиралд волейболын үндэсний дээд лигтээ тоглож байгаа. Манай баг одоогоор 7:1-ийн харьцаатайгаар лигийг тэргүүлэгч багийн эгнээнд яваа.

 -Одоо үндэсний дээд лигийн ямар багт тоглож байна вэ?

      -Миний тоглож байсан хуучин “Хөвсгөл-Эрчим” баг маань энэ жил нэрээ өрчлөн, шинэчилсэн. Одоо “Хөвсгөл Долоон- Од” гэсэн нэртэй болсон байгаа.

-Дасгалжуулагчийн ажилд шилжсэн гэсэн ямар багийн дасгалжуулагчаар ажиллаж байгаа вэ?

      -Одоогоор өсвөр үеийн 7-17 насны хүүхдүүдтэй ажиллаж байгаа. Мөн насанд хүрэгчдийн “Эрдэнэс” багийн дасгалжуулагчаар ажиллаж байна.

-Миний дүү өөрийгөө манай уншигчдад танилцуулахгүй юу?

      -Намайг Ганболдын Цэцэгжаргал гэдэг. Волейболын спортын Олон улсын хэмжээний мастер цолтой.

-Аль аймаг, хотод төрсөн хүүхэд вэ?

      -Би Улаанбаатар хотод төрсөн. Харин аав маань Хөвсгөл аймгийн харьяат. Тийм болохоор аавынхаа төрсөн газар Хөвсгөл аймгаар овоглох дуртай.

-Айлын хэд дэх хүүхэд вэ?

      -Би айлын бага, отгон хүүхэд байгаа юм.  Дээрээ нэг эгчтэй.

-Бага нас нь хаана өнгөрөв?

       -Миний бага нас маань Улаанбаатар хотод өнгөрсөн. Би  Бага тойрогт өссөн.

-Багадаа хэр хөдөлгөөнтэй охин байсан бэ?

       -Ер нь бага байх үедээ байрныхаа эрэгтэй хүүхдүүдтэй тоглож өссөн. Дугуй, ролик унасан нэлээдгүй эршүүд талдаа охин байсан шүү. Дунд ангиас хойш охидуудтай найзлах болсон.

-Баянгол дүүргийн “Ган зам” 20-р дунд сургуулийн волейболын сонгоны ангийг төгссөн үү?

      -Ер нь бол анх волейболын спортын гараагаа ерөнхий боловсролын “Ган зам” 20-р дунд сургуулиас эхэлсэн. Тэр үед манай “Ган зам” 20-р сургуульд волейболын сонгоны анги байгаагүй. Харин намайг дунд сургуулиа төгсөх үед нээгдсэн юм.

-Волейболын анхны багш нь МУГД Д.Солонго багш уу?

     -Тэгэлгүй яах вэ. Миний анхны багш МУГД Д.Солонго гээд маш мундаг хүн байдаг. Волейболын спортын үндсэн суурийг Д.Солонго багш маань маш зөв сайн тавьж өгсөн. Надад өөрийн мэдэж, чадах бүх зүйлийг харамжгүй зааж өгсөн ачтан байгаа юм.

-Волейболын спортоор хэд дэх жилдээ хичээллэж байгаа вэ?

      -Би одоо волейболын спортоор тасралтгүй хичээллээд 23 жил болж байна.

-Яагаад бусад спортоос илүүтэйгээр волейболын спортоор сонирхон хичээллэх болсон бэ?

       -Аав маань волейбол тоглодог байсан юм. Аав намайг бага байхаас эхлэн дагуулж яваад волейболын лигийн тэмцээн үздэг байлаа. Аавыгаа дагаж лигийн тэмцээн үздэг болсон тэр үеэс л эхэлж, волейболын спортыг сонирхох болсон.

-Волейболын спортын чухам юу нь өөрт чинь илүүтэйгээр таалагдсан бэ?

       -Хамгийн гоё зүйл нь ямар ч кантакт байхгүй цэвэрхэн, багийн спорт шиг санагдсан. Тэгээд багаар нэгдэж, ажиллах нь илүү сонирхолтой байлаа. Волейболын би биш, бид гэсэн зорилго нь амьдралд ч гэсэн чухал.

-Волейболоор хичээллэж байхад тань шантарч, мохох үе гарч байсан уу?

       -Анх жаахан хүүхэд “Эрчим” клубт тамирчин болж орсон. Өөрийн хүндэтгэж явдаг мундаг волейболчин эгч нартай нэг баг болсон. Тэдний дунд юу ч чадахгүй, айлын эрх хүүхэд ороод, ачаалал өндөртэй бэлтгэл хийх амаргүй санагдсан.

Тэр үед мэдэхгүй, чадахгүй олон зүйлтэй тулгарсан. Тэр бүхэнд их шантарч, нэлээдгүй уйлдаг байсан шүү, хэ хэ хэ. Одоо эргээд бодоход миний хамгийн аз жаргалтай, дурсамжтай сайхан мөчүүд байсан юм шиг санагддаг.

-Волейболын спортоор хичээллэсэн үеэс хойших томоохон амжилтууддаа сонирхуулахгүй юу?

      -Томоохон амжилт гэвэл Монгол Улсын волейболын үндэсний дээд лигийн 11 удаагийн аварга. Мөн хоёр мөнгө, нэг хүрэл медаль хүртэж байсан. Хамгийн анх олон улсын тэмцээнээс 2008 онд медаль хүртэж байлаа.

Зүүн Азийн аварга шалгаруулах тэмцээнээс хүрэл медаль хүртсэн тэр үеийг хэзээ ч мартахгүй байх. 2009 онд Азийн оюутны аварга шалгаруулах тэмцээнээс хүрэл медаль хүртсэн. Тус тэмцээний “Үнэ цэнтэй тоглогч”-ийн шагналыг хүртсэн. 2012 онд мөн Азийн оюутны аварга шалгаруулах тэмцээнээс мөнгөн медаль хүртэж байсан.

-Сэтгэлд тань хоногшин үлдсэн хамгийн өрсөлдөөнтэй, дурсамж үлдээсэн тоглолтыг хэзээ хийж байв?

       -Сэтгэлд хоногшин үлдсэн хамгийн өрсөлдөөнтэй, дурсамж үлдээсэн олон сайхан тоглолт бий. Түүн дотроос 2008 оны Зүүн Азийн аварга шалгаруулах тэмцээний хүрэл медалийн төлөөх тоглолт илүү дурсамж үлдээсэн юм шиг санагддаг шүү.

-Монголын спорт тоглоомын төрлөөс сагсан бөмбөгийн спортын хөгжил Ази болон дэлхийн хэмжээнд хүрчихлээ. Харин волейболын спорт тив, дэлхийд өрсөлдөх хэмжээнд хүрэхэд чухам юу дутагдаад байна вэ?

     -Волейболын спортоор тив, дэлхийд өрсөлдөхөд дэмжлэг их чухал. Одоо тамирчид бэлтгэл сургуулилалтын хажуугаар, амьдралаа авч явахын тулд бүгд л ажил хийгээд явдаг. Хангалттай хангамж, цалин хөлс өндөр байвал зөвхөн спорттоо анхаараад явна. Манай волейболын баг, тамирчид Ази тивдээ өрсөлдөх боломж их ойрхон санагддаг. Одоо сүүлийн үеийн хүүхэд, залуус их өндөр нуруулаг болсон. Волейболын спортоор хичээллэж байгаа олон сайхан ур чадвартай дүү нар байгаа. Тэднийг болон волейболын спортоо дэмжээд хөгжүүлэх хэрэгтэй юм шиг санагдаг шүү. Цаашдаа өсвөр үе, залуучууд, насанд хүрэгчдийн гээд нас, насны ангилалд улсын шигшээ багийг барьж ажиллавал их чухал байх. Баг, тамирчдыг олон улсын тэмцээнд олон оролцуулж байж л амжилт, ур чадвар, тоглолтын тактик илүү сайжирна.

–Олон жил волейбол тоглож байна. Таны цаашдын зорилго, зорилт юунд чиглэгдэж байгаа вэ?

     -Цаашдаа өөрийгөө илүү их хөгжүүлж, өөрийнхөө чаддаг зүйлээ бусдад түгээж олон, олон хөөрхөн шавь нартай болно доо.