Завхан аймгийн Улиастай сумын таеквондогийн “Цэцэн шонхор” клубийн тамирчин охин Авирмэдийн Анударьтай ярилцлаа.  Тэрбээр “ITF” олон улсын таеквондогийн хар бүс 2-р дантай, Монгол Улсын спортын мастер цолтой. Улсын аварга шалгаруулах тэмцээний дөрвөн удаагийн аварга тамирчин юм.

–Миний дүү өөрийгөө танилцуулахгүй юу?

         -Намайг Авирмэдийн Анударь гэдэг.

-Завхан аймагт төрсөн хүүхэд үү?

         -Тийм ээ, би Завхан аймгийн Алдархаан суманд төрж, өссөн.

-Бага нас нь хөдөө өнгөрсөн үү?

       -Тэгэлгүй яах вэ. Миний бага нас хөдөө суман дээр өнгөрсөн.

-Одоо хэдэн настай вэ?

         -Би одоо 16 настай.

-Чухам яагаад таеквондогийн спортыг сонгож хичээллэх болсон бэ?

          -Таеквондо бусад спортоос илүүтэйгээр миний сонирхлыг татсан. Тэгээд л өөрийн л хүсэл, сонирхол, мөрөөдөлдөө хөтлөгдөн таеквондогоор хичээллэж эхэлсэн.

-Одоо хэд дэх жилдээ таеквондогоор хичээллэж байгаа вэ?

          -Анх 2019 онд секцэнд орж байлаа. Түүнээс хойш өнөөдрийг хүртэл зургаа дахь жилдээ Олон улсын таеквондогийн спортоор хичээллэж байна.

–Анх таэквондо заасан багш нь Ө.Ядамсүрэн,С.Будхүү хоёрын хэн нь вэ?

          -Би анх ОУХМ С.Будхүү болон ОУХМ Б.Нэргүй багш нарын удирдлага дор олон улсын таеквондогоор хичээллэж эхэлсэн.

-Таеквондогийн спортын ямар зэрэг цолтой тамирчин бэ?

         -Олон улсын таеквондогийн спортын Монгол Улсын спортын мастер цолтой. “ITF” холбооны олон улсын хар бүс, хоёрдугаар дантай тамирчин байгаа.

 –Одоо аль сургууль, ямар клубийн тамирчин бэ?

          -Би Завхан аймгийн олон улсын таеквондогийн “Цэцэн шонхор” клубийн тамирчин.  Одоо Завхан аймгийн Улиастай сумийн  Ж.Алтангэрэлийн нэрэмжит ерөнхий боловсролын Гуравдугаар дунд сургуулийн 12-ын “Б” ангид сурдаг.

-Таеквондогоос өмнө өөр спортын төрлөөр хичээллэж байсан уу?

           -Таеквондогоос өөр спортын төрлөөр хичээллэж байгаагүй. Миний анх сонгосон спортын төрөл л таеквондо байсан.

–Таеквондогоор өөрийнхөө гаргасан амжилтуудыг танилцуулахгүй юу?

           -“ITF” таеквондогийн УАШТ-ий тулааны төрөлд 2019, 2022, 2024, 2025 онуудад алтан медаль хүртэж байсан. Олон улсын таеквондогийн Монгол Улсын дөрвөн удаагийн аварга байгаа.  УАШТ-ий хоёрдугаар даны түль буюу тоот дасгалын төрлөөс нэг алт, болзолт тулаан буюу хосен сүлийн төрөлд О.Мөнххүслэн, Н.Цагаадай нарын хамт нэг удаа  оролцож алтан медаль авч байсан. УАШТ-ээс нийт зургаан алтан медаль хүртсэн.

-Сэтгэлд тань хоногшин хамгийн сайхан дурсамж үлдээсэн ямар тэмцээн байсан бэ?

         -Миний сэтгэлд хоногшин үлдсэн хамгийн их дурсамж үлдээсэн  тэмцээн гэвэл 2019 онд анх удаа оролцсон  улсын аварга шалгаруулах тэмцээн байгаа.

-Таэквондогоос өөр тулааны спортын тэмцээнд ордог уу?

           -Таеквондогоос өөр тулааны спортын тэмцээнд орж үзээгүй.

 -Одоо болох ирэх аравдугаар сард Итали Улсын Жесоло хотод болох  таэквондогийн дэлхийн аваргад өрсөлдөх үү?

          -Тийм ээ, 2025 оны дэлхийн аварга шалгаруулах тэмцээнд 2-р даны түль буюу хөдөлгөөн дасгалын төрөл, мөн эмэгтэйчүүдийн тулааны 64 кг-ыг жинд өрсөлдөнө.