Чөлөөт бөхийн насанд хүрэгчдийн 2025 оны ДАШТ есдүгээр сарын 13-21-ний өдрүүдэд Хорват Улсын Загреб хотод зохион байгуулагдах билээ. Тус ДАШТ-д оролцох тамирчдыг сонгон шалгаруулах сорил тэмцээн өнгөрсөн долдугаар сарын 24-25-ны өдрүүдэд Спортын төв ордонд амжилттай явагдаж өндөрлөсөн. ДАШТ-ий эрэгтэйчүүдийн 65 кг-ын жинд барилдах эрх хүртсэн “Тэх Мөнх” клубийн тамирчин Батбаатарын Гантулгатай ярилцлаа.

-Хорват Улсын Загреб хотод болох чөлөөт бөхийн 2025 оны ДАШТ-ий 65 кг-д жинд барилдах эрх  хүртсэнд баяр хүргэе.

      -Баярлалаа.

-Миний дүү өөрийгөө танилцуулахгүй юу?

        -Намайг Батбаатарын Гантулга гэдэг.

-Аль аймаг, хотод төрсөн хүүхэд вэ?

        -Би Увс аймгийн Түргэн суманд төрж, өссөн хүүхэд байгаа. 

 -Одоо хэдэн настай вэ?

        -Би одоо 23 настай.

-Одоо сурдаг уу, ажил хийж байгаа юу?

          -ОБЕГ-ын Гамшгаас хамгаалах 116 дугаар ангийн сургалтын төв ажилладаг.

 -Чөлөөт бөхөөс өмнө өөр спортын төрлөөр хичээллэж байсан уу?

        -Чөлөөт бөхөөс гадна үндэсний бөхийн спортод их дур сонирхолтой. Миний ах аймгийн арслан цолтой бөх байдаг. Энэ жил Говьсүмбэр аймагт түрүүлсэн байгаа. Ахыгаа дагаад үндэсний бөхөөр бас барилддаг.

-Чөлөөт бөхийн спортыг сонгож хичээллэх болсон шалтгаан юу байв?

        -Би багадаа их хөдөлгөөнтэй, нэлээн хор, шартай хүүхэд байсан. Хүүхэд нас минь хөдөө өнгөрсөн. Тийм болохоор багаасаа л барилдаж, ноцолдон өссөн. Тэр бүхэн чөлөөт бөхийн спортыг сонгоход надад дөхөм болсон. Миний хобби бол яах аргагүй чөлөөт бөх байгаа юм.

 –Анхны багш нь хэн бэ?

         -Надад бөхийн эрдэм зааж, сургаж, үндсэн суурийг тавьж өгсөн анхны багш гэвэл Увс аймгийн. Зүүнговь сумын харьяат Т.Буянт гэдэг хүн бий.

-Чөлөөт бөхөөр хэд жилдээ хичээллэж байгаа вэ?

         -Чөлөөт бөхөөр арав дахь жилдээ хичээллэж байгаа.

-Спортын ямар зэрэг, цолтой вэ?

         -Одоогоор чөлөөт бөхийн спортын мастер цолтой.

 -“Тэх Мөнх” клубийн тамирчин болоод хэдэн жил болж байна вэ?

          -2019 онд Б.Жаргалсайхан багш маань “Тэх Мөнх” дэвжээнд Шураагийн Баянмөнх багшийн шавь болгон оруулан өгч байлаа. Тэр үеэс хойш зургаан жилийн хугацаа өнгөрсөн байна.

    -2025 оны ДАШТ-ий сонгон шалгаруулах сорил тэмцээнд хэдэн барилдаан хийв. Хэн, хэнийг ялж ДАШТ-ий эрхээ авсан бэ?

          -ДАШТ-ий сонгон шалгаруулах  тэмцээний  эхний өдөр дэвжээнийхээ дүү Б.Зэнээмэдэртэй барилдсан. Түүний дараа Р. Баттулга ахтай барилдсан. Сорил барилдааны хоёр дахь өдөр “Баянгол аваргууд академи”-ийн  Д.Төрбаяртай барилдаж ДАШТ-д оролцож, өрсөлдөх эрх авсан байгаа.

-Насанд хүрэгчдийн УАШТ-д барилдаж байсан уу?

         -Чөлөөт бөхийн насанд хүрэгчдийн УАШТ-д 2025 онд анх удаа барилдаж хүрэл медаль хүртсэн.

-Чөлөөт бөхөөр хичээллэсэн үеэс хойших томоохон амжилтаасаа сонирхуулахгүй юу?

         -Чөлөөт бөхийн өсвөр үе болон залуучуудын УАШТ-д нэг, нэг удаа түрүүлсэн.

Саяхан залуучуудын Ази тивийн аварга шалгаруулах тэмцээнд барилдаж долдугаар байрт ороод ирсэн байгаа.

–Энэ онд ДАШТ-ээс өөр олон улс, тив, дэлхийн ямар тэмцээнүүдэд өрсөлдөх вэ?

        -Ямартай ч насанд хүрэгчдийн  дэлхийн аварга шалгаруулах тэмцээндээ төвлөрч бэлтгэлээ хийнэ. ДАШТ-ий дараагаас дараагийн оролцох тэмцээнээ шийдэх байх.