Герман Улсын  Райн Рурт хотод дэлхийн оюутны спортын зуны XXXII "Универсиад-2025" наадам болж өндөрлөв. Тус наадмаас Монголын тамирчдын цорын ганц медалийг хүртсэн ҮБДС-ийн оюутан Түвшинтөрийн Түмэнжаргалтай ярилцлаа.

-Дэлхийн оюутны спортын зуны XXXII "Универсиад-2025" наадмын жүдо бөхийн 60 кг-ын жинд хүрэл медаль хүртсэнд баяр хүргэе.

       -Маш их баярлалаа. Оюутан тамирчдадаа төлөөлөн дэлхийн оюутны “Универсиад-2025” наадамд амжилттай барилдаж хүрэл медаль хүртсэндээ баяртай байгаа.

-Миний дүү өөрийгөө танилцуулахгүй юу?

       -Намайг Түвшинтөрийн Түмэнжаргал гэдэг.

-Хэнтий аймагт төрсөн хүүхэд үү?

       -Тийм ээ, би Хэнтий аймгийн Хэрлэн суманд төрж, өссөн.

-Одоо хэдэн настай вэ?

     - Би 2003 онд төрсөн. Одоо 22 настай. 

-Аль сургуулийн оюутан бэ?

      -Үндэсний биеийн тамирын дээд сургуулийн оюутан. Одоо гуравдугаар курсэд орох оюутан байгаа.

-Анх жүдо бөхийн спортыг сонгон хичээллэх болсон шалтгаан юу байсан бэ?

       -Би 12 настай байхдаа төрсөн ахыгаа дагаж, анх жүдо бөхийн зааланд очиж бэлтгэл хийж, барилдаж эхэлсэн. Тэгэж л ахыгаа дагаж явсаар жүдо бөхөд дур сонирхолтой, хайртай болсон.

 -Жүдо бөхөөр хэд дэх жилдээ хичээллэж байгаа вэ?

      -Жүдо бөх гэдэг энэ сайхан спортоор хичээллээд арван жил болж байна.  

-Хэнтий аймгийн хэн багшийн шавь бэ?

      -Миний жүдо бөхийн анхны багш гэвэл Хэнтий аймгийн Хэрлэн сумын 4-р дунд сургуулийн багш Ганзориг гэдэг хүн бий. Анх Ганзориг багш дээр ахтайгаа цуг очиж бэлтгэл хийж эхэлсэн.

-Жүдо бөхийн спортын ямар зэрэг, цолтой тамирчин бэ?

       -Би одоо жүдо бөхийн спортын мастер цолтой.

-Дэлхийн оюутны “Универсаид-2025” наадмаас Монголын багийн цорын ганц медалийг хүртлээ. Хэдэн тойрог барилдаж хүрэл медаль хүртэв?

        -Дэлхийн оюутны “Универсаид-2025” наадмаас хүрэл медаль хүртэхдээ нийтдээ дөрвөн тойрог барилдаан хийсэн байгаа.

-Хагас шигшээ барилдаанд Испаний Баррозо Лопест ялагджээ. Түүнийг аргалчих боломж байсангүй юу?

     -Универсиад наадмын хагас шигшээгийн барилдаан үнэхээр харамсалтай барилдаан болсон л доо. Испанийн Баррозо Лопесыг хожих бүрэн боломж надад байсан. Тэр боломжийг би өөрөө л бүрэн дүүрэн ашиглаж чадаагүй. Үндсэн цагт хэн хэнээсээ үнэлгээ авч чадаагүй. Тэгээд нэмэлт цаг “Goldon skor” сунгаад өөрөөсөө л болж хожигдсон.

 -Шигшээ барилдаанд хүрэл медалийн төлөө манай бөх Унгарын Д.Нагиг цэвэр ялжээ.  Узбекистан, Энэтхэгийн тамирчид хэр хүчтэй өрсөлдөгч байв?

      -Универсиадад надтай барилдсан бөхчүүд бүгд л сайн, хүчтэй өрсөлдөгчид байсан. Сул өрсөлдөгч гэж байгаагүй.

-Жүдо бөхөөр гаргасан амжилтуудыг танилцуулахгүй юу?

      -Өсвөр үеийн УАШТ-ий гурван алт, залуучуудын УАШТ-ий алт, хүрэл, “Душанбэ Гран слам”-ын долдугаар байр, насанд хүрэгчдийн УАШТ-ий тавдугаар байрт орсон амжитуудыг гаргаад байгаа.

 -Насанд хүрэгчдийн УАШТ-д хэнд хожигдож тавдугар байрт орсон юм?

       -Насанд хүрэгчдийн УАШТ-ий хүрэл медалийн төлөөх барилдаанд ДАШТ-ий мөнгөн медальт, ОУХМ Э.Ариунболд ахад хожигдож тавдугаар байрт орж байсан.

-Манай улсын 60 кг-ын жингийн дотоодын өрсөлдөөн их ширүүн, тэнцүүхэн олон өрсөлдөгчид байдаг. Э.Ариунболдтой барилдаж үзжээ. Харин К. Ёолк,  Б.Сүхбат, Э.Сумъяабазар, Б.Энэбиш нартай таарч барилдаж байсан уу?

      -Тэгэлгүй яах вэ. Монгол Улсын 60 кг-ын жингийн дотоодын өрсөлдөөн ширүүн, өрсөлдөөнтэй, олон шилдэг тамирчин бий. Тэдний бүгдтэй барилдаж, хожиж, хожигдож үзсэн. Цаашид ч олон удаа таарч барилдах байх.