Жүдо бөхийн 2025 оны дэлхийн аварга шалгаруулах тэмцээний долоо дахь өдрийн барилдаан өнөөдөр буюу зургадугаар сарын 19-ний өдөр Унгар Улсын Будапешт хотод эхэлнэ. Энэ удаагийн ДАШТ-д дэлхийн 93 орны эрэгтэй 294, эмэгтэй 262, нийт 556 жүдочин өрсөлдөж байгаа. ДАШТ-ий эрэгтэйчүүдийн +100 кг, эмэгтэйчүүдийн +78 кг-ын жингийн барилдаан энэ өдөр болно. Өнөөдөр хувийн жингийн сүүлийн өдрийн барилдаан явагдаж, маргааш холимог багийн тэмцээнээр 2025 оны насанд хүрэгчдийн дэлхийн аварга шалгаруулах тэмцээн өндөрлөх юм.

ЭРЭГТЭЙЧҮҮДИЙН +100 КГ-Д Б.ГОНЧИГСҮРЭН

        Эрэгтэйчүүдийн +100 кг-ын жинд 33 тамирчин өрсөлдөнө. Манай улсаас Азийн аварга шалгаруулах тэмцээний -100 кг-ын жингийн мөнгөн медальт, Үндэсний шигшээ баг, “Женко” клубийн тамирчин, ОУХМ Батхуягийн Гончигсүрэн хүч үзнэ. Тэрбээр анх удаа жин өгсөн ДАШТ-ий +100 кг-ын жинд барилдах гэж байна. ОУХМ Б.Гончигсүрэн “С” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт  Египетийн Mohamed ABORAKIA-тай таарсан. Хэрэв түүнийг ялах юм бол гуравдугаар тойрогт, шөвгийн 16-д Японы OTA Hyoga, Чилийн Francisco SOLIS нарын хэн ялсантай барилдана.

ЭМЭГТЭЙЧҮҮДИЙН +78 КГ-Д А.АДЪЯАСҮРЭН

    Эмэгтэйчүүдийн +78 кг-ын жинд 32 тамирчин өрсөлдөнө. Манай улсаас “Ханжоу-2022” Азийн наадмын хүрэл медальт, Үндэсний шигшээ баг, “Алдар” спорт хорооны тамирчин, ОУХМ Амарсайханы Адъяасүрэн барилдах юм. Тэрбээр их чанга сугалаа татсан байгаа. “А” хэсгийн нэгдүгээр тойрогт Нидерландын хашир, туршлагатай тамирчин, Karen STEVENSON-той таарсан. Хэрэв түүнийг ялж, чадах юм бол хоёрдугаар тойрогт, шөвгийн 16-д Туркийн Hilal OZTURK, Молдавын Oxana DIACENCO нарын хэн ялсантай барилдах юм. “А” хэсгийг дээд талд Францын Romane DICKO, Хятадын Jinesinuer AYIMAN, Италийн Asya  TAVANO, Литавын  Rugile STASIULYTE нар бий.