Жүдо бөхийн 2025 оны дэлхийн аварга шалгаруулах тэмцээний тав дахь өдрийн барилдаан өнөөдөр Унгар Улсын Будапешт хотод эхэлнэ. Энэ удаагийн ДАШТ-д дэлхийн 93 орны эрэгтэй 294, эмэгтэй 262, нийт 556 жүдочин өрсөлдөж байгаа. Өнөөдөр эрэгтэйчүүдийн 90 кг, эмэгтэйчүүдийн 70 кг-ын жингийн барилдаан болно. Манай улсаас эрэгтэйчүүдийн 90 кг-ын жинд бөх барилдахгүй.

ЭМЭГТЭЙЧҮҮДИЙН 70 КГ-Д Б.НЯМ-ЭРДЭНЭ, Д.ЕСҮЙ

     Эмэгтэйчүүдийн 70 кг-ын жинд 41 тамирчин барилдах юм. Манай улсаас өсвөр үеийн дэлхийн аварга шалгаруулах тэмцээний хүрэл медальт, насанд хүрэгчдийн Ази тивийн аварга шалгаруулах тэмцээний хошой хүрэл медальт, 19 настай, “Женко” клуб, Үндэсний шигшээ багийн тамирчин, ОУХМ Батсуурийн Ням-Эрдэнэ, “Хүч” спорт хороо, Үндэсний шигшээ багийн гишүүн, 18 настай өсвөрийн тамирчин Дарханбатбаярын Есүй нар барилдана.

    ОУХМ Б.Ням-Эрдэнэ “В” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Ливаны Aqulina CHAYEB-тай таарсан. Хэрэв түүнийг ялах юм бол гуравдугаар тойрогт, шөвгийн 16-д Өмнөд Солонгос, Итали, Австралийн тамирчдын хэн ялсантай барилдана.

   Д.Есүй “D” хэсгийн нэгдүгээр тойрогт дэвжээний эзэн орон Унгарын шилдэг тамирчин, амаргүй өрсөлдөгч Szofi OZBAS-тай таарсан. Хэрэв түүнийг ялж чадах юм бол хоёрдугаар тойрогт Польшийн Katarzyna SOBIERAJSKA-тай барилдана.