Жүдо бөхийн 2025 оны дэлхийн аварга шалгаруулах тэмцээний хоёр дахь өдрийн барилдаан өнөөдөр Унгар Улсын Будапешт хотод эхэлнэ. Энэ удаагийн ДАШТ-д дэлхийн 93 орны эрэгтэй 294, эмэгтэй 262, нийт 556 жүдочин өрсөлдөж байгаа. Өнөөдөр эрэгтэйчүүдийн 66 кг, эмэгтэйчүүдийн 52 кг-ын жингийн барилдаан болно.

ЭРЭГТЭЙЧҮҮДИЙН 66 КГ-ЫН ЖИНД  Ё.БАСХҮҮ, Б.ЭРХЭМБАЯР, Б.НАРМАНДАХ

    Эрэгтэйчүүдийн 66 кг-ын жинд 50 тамирчин өрсөлдөнө. Манай улсын жүдочин, Ази тивийн аварга, ОУХМ Баттогтохын Эрхэмбаяр “А” хэсгийн нэгдүгээр тойрогт Литав Улсын 19 настай залуу тамирчин, Simas POLIKEVICIUS-тай таарлаа. Хэрэв түүнийг ялж чадах юм бол хоёрдугаар тойрогт Францын шилдэг тамирчин, Walide  KHYAR-тай барилдана. Түүнийг ялж байж шөвгийн 16-д шалгарч, улмаар шөвгийн наймд барилдах боломж нээгдэнэ.

    Дэлхийн аваргын хошой хүрэл медальт, Ази тивийн аварга, МУГТ Ёндонпэрэнлэйн Басхүү “С” хэсгийн нэгдүгээр тойрогт Эстон Улсын Viljar LIPARD-тай таарсан байгаа. Түүнийг ялах юм бол хоёрдугаар тойрогт Гүржийн Vazha MARGVELASHVILI-тай барилдана. Хэрэв Вазаг ялж чадвал шөвгийн 16-д барилдах эрхтэй болно.

   АНЭУ-ын нэр дээр барилдаж буй ОУХМ Баянмөнхийн Нармандах “В” хэсгийн нэгдүгээр тойрогт Сенегал Улсын Mouhamedou MBOUP-той барилдана. Хэрэв түүнийг ялж чадах юм бол хоёрдугаар тойрогт Франц Улсын Daikii BOUBA-тай барилдана.

ЭМЭГТЭЙЧҮҮДИЙН 52 КГ-ЫН ЖИНД Л.СОСОРБАРАМ, Б.ХОРЛООДОЙ

   Эмэгтэйчүүдийн 52 кг-ын жинд 35 тамирчин барилдана. Энэ жинд манай улсаас залуучуудын дэлхийн аварга, ОУХМ Лхагвасүрэнгийн Сосорбарам нэгдүгээр тойрогт гоц мөргөн ялалт авсан байгаа. Хоёрдугаар тойрогт АНЭУ-ын нэр дээр барилдаж буй Ази тивийн аварга, ОУХМ Бишрэлтийн Хорлоодойтой таарсан. Хэрэв Б.Хорлоодойг ялж чадвал шөвгийн 16-д Унгар, Нидерланд, Испанийн бөхчүүдийн хэн ялсантай барилдана.