Жүдо бөхийн 2025 оны дэлхийн аварга шалгаруулах тэмцээн өнөөдөр Унгар Улсын Будапешт хотод эхэлж байна. Энэ удаагийн ДАШТ-д дэлхийн 93 орны эрэгтэй 294, эмэгтэй 262, нийт 556 жүдочин өрсөлдөх гэж байна. Өнөөдөр эрэгтэйчүүдийн 60 кг, эмэгтэйчүүдийн 48 кг-ын жингийн барилдаан болно.

ЭРЭГТЭЙЧҮҮДИЙН 60 КГ-ЫН ЖИНД  Э.АРИУНБОЛД, К.ЁОЛК

     Эрэгтэйчүүдийн 60 кг-ын жинд 36 тамирчин барилдах мэдүүлэг өгсөн байна. Манай жүдочин К.Ёолк “В” хэсгийн нэгдүгээр тойрогт гоц мөргөн ялалт аваад байна. Хоёрдугаар тойрогт АНУ-ын 18 настай залуу тамирчин Jonathan YANG-тай таарсан. Хэрэв түүнийг ялах юм бол гуравдугаар тойрогт, шөвгийн 16-д “Токио-2020” олимпын мөнгөн медальт, Тайванийн YANG Yung Wei, Эквадор Улсын 19 настай залуу тамирчин  Jhonathan BENAVIDES нарын хэн ялсантай барилдана.

     Дэлхийн аваргын мөнгөн медальт, ОУХМ Э.Ариунболд “D” хэсгийн нэгдүгээр тойрогт Германы хашир туршлагатай жүдочин Maximilian HEYDER-тай таарсан байна. Хэрэв түүнийг ялж чадах юм бол хоёрдугаар тойрогт Узбекистаны Bakhrom  BOTUROV-той барилдана. Түүнийг ялах юм бол шөвгийн 16-д Бразил, Арменийн тамирчдын хэн ялсантай таарна.

 ЭМЭГТЭЙЧҮҮДИЙН 48 КГ-ЫН ЖИНД Г.НАРАНЦЭЦЭГ, Ж.АНУДАРЬ

        Эмэгтэйчүүдийн 48 кг-ын жинд 42 тамирчин барилдах мэдүүлэг өгөөд байна. Манай жүдочин ОУХМ Г.Наранцэцэг “А” хэсгийн нэгдүгээр тойрогт Хятадын 21 настай, залуу тамирчин HUI Xinran-тай таарсан. Хэрэв түүнийг буулган авч чадвал хоёрдугаар тойрогт Малта Улсын Katryna ESPOSITO-той барилдах юм. Шөвгийн 16-д Италийн Assunta  SCUTTO, Чилийн амаргүй өрсөлдөгч Mary Dee VARGAS LEY нарын хэн ялсантай барилдах магадлал өндөр бий.

      Өсвөрийн ДАШТ-ий мөнгөн медальт Ж.Анударь “С” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Вьетнамын ахмад, туршлагатай тамирчин Thi Tinh  HOANG-той хүч үзнэ. Хэрэв түүнийг ялж чадах юм бол гуравдугаар тойрогт, шөвгийн 16-д  Испани, Туркменистан, Азербайжан Улсын тамирчдын хэн ялсантай барилдана.