Монголын волейболын насанд хүрэгчдийн УАШТ  2025 оны тавдугаар сарын 12-18-ны өдрүүдэд Өвөрхангай аймгийн Арвайхээр хотноо зохион байгуулагдсан билээ. Тус улсын аваргад 23 багийн 280 гаруй шилдэг тамирчин хурд хүч, авхаалж самбаагаа сорьж өрсөлдсөн. УАШТ-ээс алтан медаль хүртэж, “ MVP Үнэ цэн”-тэй тоглогчийн шагналыг хүртсэн “Дархан Могул” багийн тоглогч ОУХМ Г.Энхсайхантай ярилцлаа.

-Волейболын насанд хүрэгчдийн УАШТ-д амжилттай оролцож түрүүлсэнд баяр хүргэе.

    -Баярлалаа.

-Улсын аваргын “Үнэ цэнтэй тоглогч MVP” болсонд дахин баяр хүргэе. Энэ удаагийн УАШТ-д хэдэн тоглолт хийж улсын аварга болов?

     - Баярлалаа. Энэ удаагийн волейболын УАШТ-д эмэгтэй найман баг, хоёр зоонд хуваагдан тоглосон байгаа. Манай “Дархан Могул” багийн хувьд УАШТ-д таван тоглолт хийсэн.

-Хамгийн хүнд ширүүн өрсөлдөөнтэй тоглолтыг ямар багтай хийсэн бэ?

     -Хамгийн хүнд, ширүүн өрсөлдөөнтэй тоглолтыг “Golden ball” болон “Эрчим” багуудтай хийсэн. Тус хоёр багтаа таван ээлжийн тоглолт гарч ширүүн тоглолт хийсний эцэст хожил авсан.

-Танай “Дархан Могул” баг шинэ баг уу, хэзээ байгуулагдсан баг вэ?

     -“Дархан Могул” багийн хувьд энэ удаагийн насанд хүрэгчдийн УАШТ анхны тэмцээн нь байсан. Цаашдаа энэ баг дээд лигт орох зорилготой баг юм байна лээ.

-Багийн бүрэлдэхүүнээ танилцуулахгүй, залуу тамирчдаас бүрдсэн баг уу?

       -Энэ удаагийн УАШТ-д орсон “Дархан Могул” багийн бүрэлдэхүүн нь “Enacoree” багийн хуучин буюу анхны бүрэлдэхүүн гэж хэлж болно. ОУХМ-  А.Пүрэвсүрэн, Ч.Халиун. Г.Энхсайхан, А.Батжаргал, Л.Отгонцэцэг, С.Пүрэвжаргал, спортын мастер Э.Пүрэвжаргал, Энхзаяа, Нэргүй болон Дархан-Уул аймгийн өсвөрийн шигшээ багийн Элбэгжаргал, Номин гэсэн залуу тамирчдаас бүрдсэн.

-Аль нутгийн хүүхэд вэ?

     -Би Хэнтий аймаг төрсөн.

-Волейболын спортод биеийн өндөр их чухал байдаг. Өөрийн чинь өндөр хэд вэ?

       -Миний биеийн өндөр 180 см байгаа.

  -Волейболын спортын анхны багш нь хэн бэ?

        -Хэнтий аймгийн харъяат, Монгол Улсын гавьяат багш, Д.Ренчин дасгалжуулагчийн шавь нь байгаа.

-Волейболын спортоор хэд жилдээ хичээллэж байгаа вэ?

       -Волейболын спортоор дунд сургуулийн сурагч байх үедээ хичээллэж эхэлсэн. Тэр үеэс хойш хичээллээд 23 жил болж байна.

-Одоо спортын ямар зэрэг, цолтой вэ?

     - Одоо волейболын спортын ОУХМ цолтой.

-Волейболын спортоор гаргасан амжилтуудаасаа сонирхуулахгүй юу?

       -2009 болон 2012 онд Азийн оюутны аварга шалгаруулах тэмцээнээс мөнгө, хүрэл медаль хүртэж байсан. Мөн 2009-2011 онд Үндэсний лигийн аварга шалгаруулах тэмцээнээс, алт, мөнгөн медаль, 2010 оны Азийн 16-р наадам, 8-р байрт шалгарч байсан.

-Цаашид “Дархан Могул” багт үргэлжлүүлэн тоглох уу, өөрт багт орж тоглох уу?

    - “Дархан Могул” багт цаашид үргэлжлүүлэн тоглох, үгүй юу гэдгийг яг одоогоор шийдээгүй байна. Ер нь тодорхойгүй байгаа.