Чөлөөт бөхийн “U20” ангиллын 2025 оны залуучуудын улсын аварга шалгаруулах тэмцээн тавдугаар сарын 5-6-ны өдрүүдэд Спортын төв ордонд амжилттай зохион байгуулагдаж өндөрлөсөн билээ. Тус УАШТ-ий эмэгтэйчүүдийн 62 кг-ын жинд барилдаж алтан медаль хүртсэн “Хантайшир”клубийн тамирчин, Энхбаатарын Гүндэгмаатай ярилцлаа.

-Чөлөөт бөхийн “U20” ангиллын УАШТ-ий 62 кг-ын жинд түрүүлж, алтан медаль хүртсэнд баяр хүргэе.

    -Баярлалаа “U20” ангиллын залуучуудын УАШТ тэмцээнд түрүүлсэндээ маш их баяртай байна

-Миний дүү өөрийгөө танилцуулахгүй юу?

     -Намайг Энхбаатарын Гүндэгмаа гэдэг.

-Одоо хэдэн настай вэ. “Хантайшир” клубийн тамирчин гэхээр Говь-Алтай аймгийн “унаган хүүхэд” үү?

      -Би одоо 18 настай. Миний төрсөн нутаг Баянхонгор аймаг. Баянхонгор аймгийн Жинст суманд төрсөн.

-Ямар сургуульд сурдаг вэ?

       -Баянхонгор аймагтаа сурдаг. Аймгийнхаа спортын төрөлжсөн сургалттай ерөнхий боловсролын дунд сургуульд сурдаг.

-Айлын хэд дэх хүүхэд вэ?

       -Би айлын хамгийн том хүүхэд нь байгаа. Доороо гурван дүүтэй.

-Багадаа ямар спортын төрлөөр хичээллэж байв?

     -Бага байхдаа волейбол тоглодог байсан.

-Танайд бөхийн удам бий юу, Аав, ах нь барилддаг уу?

     -Манай аавын тал бөхийн удамтай. Манай өвөө аймгийн арслан цолтой Ж.Төмөр гэдэг хүн байсан.

-Чөлөөт бөхийн спортыг сонгож хичээллэх болсон шалтгаан юу байсан бэ?

      -Өвөө барилдаг байсан болохоор барилдаж үзмээр санагдаад бөхийн спортыг сонгон хичээллэж эхэлсэн.

-Бөхийн спортыг сонгох үед тань гэр бүлийнхэн чинь эсэргүүцэж байсан уу?

     Үгүй ээ, харин ч аав, ээж хоёр маань маш сайн дэмжиж, тусалсан.

-Чөлөөт бөхийг сонгож хичээллэх үед найз охидууд, ангийн хүүхдүүд нь хэрхэн хүлээж авч байсан бэ?

      -Манай найз охидууд “Чи эршүүд болохоор бөхийн спорт яг чамд тохирох юм байна”  гэж дэмжсэн, урмын үг хэлсэн.

-Залуучуудын 2025 оны “U20” ангиллын УАШТ-д хэдэн барилдаан хийж түрүүлэв ээ?

        -Зулуучуудын “U20” УАШТ-д гурван барилдаан хийж түрүүлсэн.

-Улсын аваргын алтан медалийн төлөөх барилдаанд “Баянгол Аваргууд академи”-ийн Б.Үүрийнтуяатай ямар тактикаар барилдаж ялалт авсан бэ?

      -Улсын аваргын алтан медалийн төлөөх барилдаан хийхээр дэвжээнд гарахын өмнө багштайгаа ярилцсан. Багш “Өрсөлдөгчийнхөө зөвхөн гарыг таллаж барилдах хэрэгтэй” гэсэн зөвлөгөөг өгсөн.

 - “Хантайшир” клуб Говь-Алтай аймгийн клуб үү. Улаанбаатар хотод үйл ажиллагаа явуулдаг юм уу?

   “Хантайшир” клуб Улаанбаатар хотод бэлтгэлээ хийдэг.

 -Чөлөөт бөхийн спортоор хэд дэх жилдээ хичээллэж байгаа вэ?

        -Би чөлөөт бөхөөр хичээлээд гурван жил болж байгаа.