Олон улсын жүдо бөхийн холбоо “IJF”-ийн цуврал “Австри-2025” гран при тэмцээн энэ сарын 7-9-ний өдрүүдэд Австри Улсад болно. Өнөөдөр гран при тэмцээний барилдаан эхэлж байна. Энэ удаагийн тэмцээнд 52 орны эрэгтэй 247, эмэгтэй 169, нийт 416 тамирчин өрсөлдөж эхэллээ. Эрэгтэйчүүдийн 60 кг-ын жинд 25 тамирчин, 66 кг-ын жинд 37, 73 кг-ын жинд 46, 81 кг-ын жинд 47, 90 кг-ын жинд 37, -100 кг-ын жинд 30, +100 кг-ын жинд 25 тамирчин барилдана. Эмэгтэйчүүдийн 48 кг-ын жинд 21 жүдочин, 52 кг-ын жинд 21, 57 кг-ын жинд 29, 63 кг-ын жинд 31, 70 кг-ын жинд 30, -78 кг-ын жинд 19, +78 кг-ын жинд 18 тамирчин өрсөлдөнө. Манай улсаас энэ удаагийн гран прид тамирчин барилдахгүй. Харин АНЭУ-ын нэр дээр барилдаж буй ОУХМ Бишрэлтийн Хорлоодой эмэгтэйчүүдийн 52 кг-ын жинд, эрэгтэйчүүдийн 66 кг-ын жинд ОУХМ Баянмөнхийн Нармандах барилдана.

ЭРЭГТЭЙЧҮҮДИЙН 66 КГ-ЫН ЖИНД Б.НАРМАНДАХ

      Эрэгтэйчүүдийн 66 кг-ын жинд 37 жүдочин барилдана. АНЭУ-ын нэр дээр барилдаж буй ОУХМ Баянмөнхийн Нармандах тус жингийн “D” хэсгийг тэргүүлэн барилдах юм. Тэрбээр нэгдүгээр тойрогт гоц мөргөн ялалт авсан байгаа. Хоёрдугаар тойрогт Австрийн Marcus AUER-тай барилдана. Хэрэв түүнийг ялах юм бол гуравдугаар тойрогт Словенийн Gabriel ZADRAVEC, Израилийн Guy GUTMAN нарын хэн ялсантай барилдах юм. “D” хэсгийн доод хэсэгт Украины Mykyta HOLOBORODKO, Францын Driss MASSON JBILOU, Бразилийн Ronald  LIMA, Португалийн Rodrigo Costa LOPES, Киргизстанын Erbol ABASBEKOV  нар байна.

ЭМЭГТЭЙЧҮҮДИЙН 52 КГ-ЫН ЖИНД Б.ХОРЛООДОЙ

     Эмэгтэйчүүдийн 52 кг-ын жинд 21 тамирчин барилдана. АНЭУ-ын нэр дээр барилдаж буй ОХУМ Бишрэлтийн Хорлоодой “D” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Японы Iroha OI, Австрийн Carina KLAUS-STERNWIESER нарын хэн ялсантай барилдана. “D” хэсгийн доод хэсэгт Унгарын Roza GYERTYAS, Италийн  Ylenia MONACO, Косовагийн  Laurine GASHI нар байна.