Олон улсын жүдо бөхийн холбоо “IJF”-ийн цуврал “Ташкент-2025 Гранд слам” тэмцээн энэ сарын 28-ны өдөр Узбекистан Улсад эхэлнэ. “Ташкент-2025” их дуулгад 23 орны эрэгтэй 117, эмэгтэй 120, нийт 246 тамирчин оролцох мэдүүлэг өгсөн байна. Манай улсаас эрэгтэйчүүдийн 66 кг-ын жинд ОУХМ Ганболдын Хэрлэн барилдана. АНЭУ-ын нэр дээр барилдаж буй ОУХМ Бишрэлтийн Хорлоодой эмэгтэйчүүдийн 52 кг-ын жинд барилдах бүх тамирчдыг чансаагаар тэргүүлэн байна. Эрэгтэйчүүдийн 60 кг-ын жинд 20, 66 кг-д 19, 73 кг-д 15, 81 кг-д 18, 90 кг-д 18, -100 кг-д 15, +100 кг-д 12 тамирчин барилдах бололтой. Харин эмэгтэйчүүдийн 48 кг-ын жинд 20, 52 кг-ын жинд 18, 57 кг-д 17, 63 кг-д 19, 70 кг-д 17, -78 кг-д 22, +78 кг-д 16 тамирчин барилдах урьдчилсан мэдүүлгийг өгсөн байна.

ЭРЭГТЭЙЧҮҮДИЙН 66 КГ-Д Г.ХЭРЛЭН

      Эрэгтэйчүүдийн 66 кг-ын жинд 19 тамирчин барилдах мэдүүлэг өгчээ. Тус жинд ОХУ-ын Iago ABULADZE, Ramazan ABDULAEV,  Азербайжаны Yashar NAJAFOV,  Тажикстаны Nurali  EMOMALI, Узбекистаны Mukhriddin TILOVOV, Японы Hinata ONO нарын амаргүй өрсөлдөгчид ОУХМ Ганболдын Хэрлэнг хүлээж байна.

ЭМЭГТЭЙЧҮҮДИЙН 52 КГ-Д Б.ХОРЛООДОЙ

    Эмэгтэйчүүдийн 52 кг-ын жинд 18 тамирчин барилдах мэдүүлэг өгөөд байгаа. АНЭУ-ын нэр дээр барилдаж буй ОУХМ Бишрэлтийн Хорлоодой “Ташкент-2025” их дуулгын 52 кг-ын жингийн тамирчдыг чансаагаар тэргүүлж байна. Түүнийг Израилийн Gefen PRIMO, Испанийн Ayumi LEIVA SANCHEZ, Mireia LAPUERTA COMAS, Францын Lea METROT, Leonie GONZALEZ,  Японы Nanako TSUBONE,  Rin TAKEUCHI, ОХУ-ын Hanna  BURAKOVA, Liliia  NUGAEVA,  Karina EFIMOVA, Хятадын  Yuanli ZHANG нар хүлээж байгаа.