Бадмитоны тамирчин 2019, 2020 оны Монгол Улсын насанд хүрэгчдийн тэмцээний хошой аварга, 2017, 2018 оны “MONGOLIA JUNIOR INTERNATIONAL SERIES” тэмцээний мөнгө, хүрэл медальт, спортын мастер Энхбатын Сумъяасүрэнтэй ярилцлаа. Тэрбээр Япон Улсын Фүкүока хотын дунд сургуулиудын аварга шалгаруулах тэмцээнд түрүүлсэн байсан манай улсын шилдэг бадмитоны тамирчдын нэг билээ.

-Миний дүү өөрийгөө манай уншигчдад танилцуулахгүй юу?

     - Намайг Энхбатын Сумъяасүрэн гэдэг. Бадминтоны Монгол Улсын шигшээ багийн тамирчин.

-Одоо хэдэн настай вэ?

        -Би одоо 23 настай.

 -Айлын хэд дэх хүүхэд вэ?

     - Айлын том, доороо нэг дүүтэй.

-Бага нас нь хаана өнгөрөв?

        - Бага нас маань Дархан-Уул аймгийн Дархан хотод өнгөрсөн. Би 11 настай байх үедээ Япон Улс руу явж тэндээ дунд сургуульд сурсан.

-Зургаан настай байхдаа талбайн теннисээр хичээллэж эхэлсэн юм уу?

         -Тийм ээ, би зургаан настайгаасаа талбайн теннисээр хичээллэж эхэлсэн. Тэгээд есөн настайдаа бадминтон тоглож үзээд, түүнээс хойш талбайн теннисээ орхиж бадминтооноороо тууштай хичээллэсэн.

–Спортын ямар зэрэг цолтой вэ?

         –Одоогоор батмитоны спортын мастер цолтой.

-Агаар теннис буюу бадминтоны спортоор хэд дэх жилдээ хичээллэж байгаа вэ?

       - Есөн натай байх үеэсээ хойш гэхээр 14 дэх жилдээ хичээллэж байгаа юм байна.

-Яагаад бусад спортоос илүүтэйгээр бадминтоны спортыг сонирхон хичээллэх болов?

       -Бадмитон хурдан темптэй спорт. Биеийн бүх хэсгийн булчинг жигд ажиллуулдаг. Харааны болон биеийн хурд, хөдөлгөөний эсвэл, орон зайн мэдрэмжийг гойд сайжруулж, идэвхитэй байлгадаг онцгой төрөл байгаа юм.

-Энэ спортын чухам юу нь чамд илүүтэйгээр таалагдсан бэ?

     -Бадмитоноор хөгшин, залуу гэхгүйгээр бүх насны хүмүүс, найз нөхөд, гэр бүлээрээ баг болж, хаана ч тоглож болох боломжтой. Өрсөлдөгчтэйгөө ямар нэгэн контакт үүсгэхгүй торны наана, цаанаас л өрсөлддөг. Хамгийн цэвэрхэн спорт гэж бодддог. Спорт нь хүнд хүмүүжил, сахилга бат, эрүүл амьдралын хэвшлийг бий болгох гэх мэт олон сайн талтай. Тийм учраас хүмүүсийг өөртөө цаг,зав гаргаж ямар нэгэн спортын төрлөөр хичээллээрэй гэж уриалмаар байна.

-Бадминтоноор хичээллэсэн үеэс хойших томоохон амжилтаасаа сонирхуулахгүй юу?

      -Би 2019, 2020, 2023 оны насанд хүрэгчдийн улсын аваргаас алтан медаль хүртэж байсан. Япон Улсын Фүкүока хотын дунд сургуулиудын аварга шалгаруулах тэмцээнд түрүүлсэн байлаа. “Mongolian Junior International Series” тэмцээний 2017, 2018 оны  мөнгө, хүрэл медальтай.

-Өөрийн тань хамгийн хүчтэй өрсөлдөгч ямар тамирчид байна вэ?

    -Надад сайн өрсөлдөгч болж, намайг хурцалж өгдөг өрсөлдөгч гэвэл М.Батдавааг хэлнэ.

-Чөлөөт цагаараа юу хийх дуртай вэ?

      -Бэлтгэл, сургуулилалтгүй үед найзуудтайгаа уулзаж цагийг хөгжилтэй өнгөрөөх дуртай.