Монголын жүдо бөхийн холбооны 2025 оны насанд хүрэгчдийн улсын аварга шалгаруулах тэмцээн өчигдөр эхэлсэн. Энэ удаагийн эрэгтэйчүүдийн 48, эмэгтэйчүүдийн 33, багийн 11 дэх удаагийн УАШТ-д 47 клубийн эрэгтэй 212, эмэгтэй 101, нийт 313 тамирчин барилдаж байгаа юм. Өчигдөр эмэгтэйчүүдийн 57, 70, -78, +78 кг, эрэгтэйчүүдийн 73, 90, -100, +100 кг-ын жингийн барилдаан явагдаж УАШТ-ий эхний өдрийн жингийн медальтнууд тодорлоо. Харин өнөөдөр эрэгтэйчүүдийн 60, 66, 81 кг, эмэгтэйчүүдийн 48, 52, 63 кг-ын жингийн барилдаанууд болно. Маргааш буюу энэ сарын 12-ны өдөр багийн барилдаан явагдаж улсын аварга шалгаруулах тэмцээн өндөрлөх юм.

М.ИЧИНХОРЛОО  ГУРАВ  ДАХЬ УДААГАА ТҮРҮҮЛЛЭЭ

    Эмэгтэйчүүдийн 57 кг-ын жинд “Алдар” спорт хорооны тамирчин, ОУХМ М.Ичинхорлоо түрүүллээ. Тэрбээр өмнө нь 2022, 2023 онд 57 кг-ын жинд алтан медаль хүртэж Монгол Улсын аварга болж байв.  Энэ жингийн мөнгөн медалийг өсвөрийн дэлхийн аварга, “Токио-2024” их дуулгын хүрэл медальт, ОУХМ Т.Ариунзаяа хүртлээ. Т.Ариунзаяагийн хувьд 2023 оны насанд хүрэгчдийн УАШТ-ээс хүрэл медаль хүртсэн бол энэ жил амжилтаа ахиулж, мөнгөн медаль дээр бууж байна. Хүрэл медалийг “Монголын жүдо академи”-ийн залуу тамирчин Г.Ундрал, “Женко” клубийн Э.Номинтуяа нар хүртсэн.

57 кг-ын жингийн дүн:
1. М.Ичинхорлоо алтан медаль “Алдар” спорт хороо.
2.Т.Ариунзаяа мөнгөн медаль “Гүрү Дожо” клуб.
3.Э.Номинтуяа хүрэл медаль “Женко” клуб.
3. Г.Ундрал хүрэл медаль “Монголын жүдо академи”

5. Б.Алтанцэцэг тавдугаар байр.

5. Г.Ганцэцэг тавдугаар байр.

Б.ЭРДЭНЭБАЯР  ХОШОЙ АВАРГА БОЛОВ

      Эрэгтэйчүүдийн 73 кг-ын жинд  “Парис-2024” олимпын долдугаар байрын шагналт, ОУХМ б.Эрдэнбаяр түрүүллээ. Ингэснээр тэрбээр улсын хошой аварга болж байна. Тус жингийн мөнгө, хүрэл медалийг хүртсэн Л.Энхдөл, А.Өсөхжаргал нарын хувьд улсын аваргын анхны медаль нь юм. Харин Хэнтий аймгийн тамирчин О.Уранбаярын хувьд улсын аваргын нэг мөнгө, гурван хүрэл медальтай болж байна.

73 кг-ын жингийн дүн:

1.Б.Эрдэнэбаяр алтан медаль “Хилчин” спорт хороо.

2.Л.Энхдөл мөнгөн медаль “Хилчин” спорт хороо.

3.О.Уранбаяр хүрэл медаль Хэнтий аймаг.

3.А.Өсөхжаргал хүрэл медаль “Женко” клуб.

5. Б.Тэмүүлэн тавдугаар байр.

5.М.Идэрхүү тавдугаар байр.

Б.НЯМ-ЭРДЭНЭ ХОШОЙ АВАРГА БОЛЛОО

     Эмэгтэйчүүдийн 70 кг-ын жингийн аваргаар “Женко” клубийн тамирчин, ОУХМ  Б.Ням-Эрдэнэ тодорлоо. Тэрбээр аваргын төлөөх барилдаанд “Женко” клубийн У.Анужинг буулгаж авсан юм. Б.Ням-Эрдэнэ өнгөрсөн жил 70 кг-д аваргалсан амжилтаа ийн бататгаж байна.

70 кг-ын жингийн дүн:
1.Б.Ням-Эрдэнэ алтан медаль “Женко” клуб.
2.У.Анужин мөнгөн медаль “Женко” клуб.
3.Д.Есүй  хүрэл медаль “Хүч” спорт хороо.
3.Б.Анужин хүрэл медаль “Хилчин” спорт хороо

5. С.Лхагвадулам тавдугаар байр.

О.ХҮСЛЭН ХОШОЙ АВАРГА БОЛОВ

   Эмэгтэйчүүдийн -78 кг-ын жинд ОУХМ О.Хүслэн улсын аварга цолыг хоёр дахь удаагаа хүртэв. Мөнгөн медалийг “Хангарьд” спорт хорооны  Э.Буян-Өлзий хоёр дахь удаагаа үзүүрлэн хүртлээ. Харин “Хилчин” спорт А.Дуламсүрэн хоёр дахь удаагаа УАШТ-ий хүрэл медалийн тавцанд зогссон бол “One Team” клубийн Б.Тэргэлнаран насанд хүрэгчдийн улсын аваргад анх удаа оролцоод хүрэл медаль хүртэв.

-78 кг-ын жингийн дүн:
1.О.Хүслэн алтан медаль “Сүлд” спорт хороо.
2.Э.Буян-Өлзий мөнгөн медаль “Хангарьд” спорт хороо.
3.Б.Тэргэлнаран хүрэл медаль “One Team” клуб.
3.А.Дуламсүрэн хүрэл медаль “Хилчин” спорт хороо.

5. Ж.Урангоо тавдугаар байр.

5. Түмэннаст тавдугаар байр.

-100 КГ-Д ШИНЭ АВАРГА МЭНДЭЛЛЭЭ

     Эрэгтэйчүүдийн -100 кг-ын жинд “Алдар” спорт хорооны тамирчин А.Энхбаяр улсын аварга цолыг анх удаа хүртлээ. Финалд түүнд ялагдсан А.Мөнх-Эрдэнийн хувьд УАШТ-д хоёр дахь удаагаа ороод анхны мөнгөн медалиа авсан. Энэ жингийн хүрэл медалийг “Алдар” спорт хорооны Г.Пунцагцэрэн, “Боржин төв” дэвжээний Б.Хүдэрчулуун нар хүртэв.

-100 кг-ын жингийн дүн:
1.А.Энхбаяр алтан медаль “Алдар” спорт хороо.
2.А.Мөнх-Эрдэнэ мөнгөн медаль  “КАЧИ” клуб.
3.Г.Пунцагцэрэн хүрэл медаль “Алдар” спорт хороо.
3.Б.Хүдэрчулуун хүрэл медаль “Боржин төв” дэвжээ.

5. Д.Мөнхтулга тавдугаар байр.

5. Баатархүү тавдугаар байр.

Б.ГОНЧИГСҮРЭН  ДӨРӨВ ДЭХ УДААГАА УЛСЫН АВАРГАД ТҮРҮҮЛЛЭЭ

    ОУХМ Б.Гончигсүрэн улсын аварга цолыг дөрөв дэх удаагаа хүртлээ. Тэрбээр сүүлийн дөрвөн жил дараалан аваргалсан гэдгээрээ онцлог. Энэ тэрбээр жин өгсөн +100 кг-ын жинд барилдаж алтан медаль хүртэв. Финалын барилдаанд тэрбээр Б.Серикийг цаг дуусах мөчид сугадаж мушгиад хожлын үнэлгээ авсан юм. Б. Серик мөнгөн медаль хүртлээ. Л.Энхболд 2023 оны улсын аваргаас хүрэл авсан амжилтаа давтсан бол Г.Хангарьд тав дахь оролдлогоороо медалийн тавцанд анх удаа гишгэсэн юм.

+100 кг-ын жингийн дүн:  
1.Б.Гончигсүрэн алтан медаль “Хилчин” спорт хороо.
2.Б.Серик  мөнгөн медаль “Сүлд” спорт хороо.
3.Г.Хангарьд хүрэл медаль “Монголын жүдо академи”
3.Л.Энхболд хүрэл медаль Хэнтий аймаг.

5.Д.Цэрэнням тавдугаар байр.

5.Түвшинтөгс тавдугаар байр.

А.АДЪЯАСҮРЭН ДӨРӨВ ДЭХ АЛТАН МЕДАЛИА ХҮРТЭВ

    Эмэгтэйчүүдийн хамгийн хүнд жин +78 кг-ын жинд ОУХМ А.Адъяасүрэн түрүүлэв. Түүний хувьд улсын аваргын дөрөв дэх алт нь энэ боллоо. Харин ОУХМ Д.Номинзулын хувьд улсын аваргаас энэ удаа мөнгөн медаль авлаа.

“Хангарьд”-ын Э.Энхзул дөрөв дэх оролдлогоороо анхны хүрэл медалиа өөрийн болгосон бол “Алдар”-ын Э.Жаргалмаа УАШТ-д дөрвөн удаа орж, дөрөв дэх хүрэл медалиа хүртсэн өвөрмөц амжилтын эзэн болж байна.

+78 кг-ын жингийн дүн:

1.А.Адъяасүрэн алтан медаль “Алдар” спорт хороо.

2.Д.Номинзул мөнгөн медаль “Женко” клуб.

3.Э.Жаргалмаа хүрэл медаль “Алдар” спорт хороо.

3.Э.Энхзул хүрэл медаль “Хангарьд” спорт хороо.

5. М.Азжаргал тавдугаар байр.

5. Буянзаяа тавдугаар байр.

Ц.ГАН-ЭРДЭНЭ УЛСЫН ХОШОЙ АВАРГА БОЛОВ

     Жүдо бөхийн 2025 оны УАШТ-ий эрэгтэйчүүдийн 90 кг-ын жинд “Хилчин” спорт хорооны тамирчин Ц.Ган-Эрдэнэ түрүүллээ. Тэрбээр өмнө нь улсын аваргаас алт, хүрэл медаль хүртэж байв. Өмнө нь улсын аварга болж байсан Н.Дагвасүрэн түүнд дийлдэн мөнгөн медаль хүртсэн. Харин “Алдар”-ын Ц.Дагвадорж улсын аваргад тав дахиа ороод дөрөв дэх медалиа авч байна. Мөн “Алдар” спорт хорооны тамирчин Б.Мөнхбаяр  УАШТ-ээс хүрэл медаль авлаа.

90 кг-ын жингийн дүн:
1.Ц.Ган-Эрдэнэ алтан медаль “Хилчин” спорт хороо.
2.Н.Дагвасүрэн мөнгөн медаль “Иппон Дожо” клуб.
3.Ц.Дагвадорж хүрэл медаль “Алдар” спорт хороо.
3.Б.Мөнхбаяр хүрэл медаль “Алдар” спорт хороо.

5. Б.Алтансүх тавдугаар байр.

5. Алтангэрэл тавдугаар байр.