Батлан хамгаалах яам, зэвсэгт хүчний “Алдар” спорт хорооны дугуйн тамирчин, Ази тивийн аварга шалгаруулах тэмцээний хүрэл медальт, ОУХМ Цэрэнлхамын Солонгоотой ярилцлаа. Тэрбээр Монгол Улсын 11 удаагийн аварга. МБАТС-ын гурван удаагийн аварга. Монгол Улсын дугуйн спортын 2008, 2011, 2014, 2015, 2016, 2017, 2021, 2022 онуудад  “Шилдэг эмэгтэй тамирчин”-аар шалгарч байсан юм.

-Манай улсад эмэгтэй дугуйчин цөөн байдаг уу?

        -Дугуйн спорт техникийн хүнд, тэсвэр, хатуужил, хурд, хүч шаардсан, эрсдэл өндөртэй төрөл болохоор эмэгтэй тамирчид цөөхөн байдаг.

-Энэ удаагийн УАШТ заалны суурин виртуал дугуйн уралдаан байх уу?

     -Тийм ээ, энэ сарын 11-12-ны өдрүүдэд 2025 оны виртуал дугуйн УАШТ болох гэж байгаа.

-Өөрөө өмнөх жилийн виртуал дугуйн УАШТ-д уралдсан уу?

        -Тийм ээ, би түрүү жил виртуал дугуйн 2024 оны улсын аварга шалгаруулах тэмцээнд оролцож алт, мөнгөн медаль авсан.

-Энэ төрөл хэдий үеэс хөгжиж байгаа шинэ төрөл вэ?

      -Виртуал дугуйн УАШТ 2023 оноос эхэлсэн. Би виртуал дугуйн УАШТ-д гурав дахь жилдээ орох гэж байна.

 -Өөрөө хэдэн настайдаа дугуй унаж сурсан бэ?

     - Би анх 12 настайдаа дугуй унаж сурсан.

 -Багадаа ямар спортоор хичээллэж байв, яагаад эрсдэл ихтэй дугуйн спортыг сонгож хичээллэх болов?

     Дунд сургуулийн сурагч байхдаа анх дугуйн спортод хөл тавин орж, хичээллэж эхэлсэн. Тэр үед 15 настай байсан. Өөр спортын төрлөөр бол хичээллэж байгаагүй. Би багын л дугуй унах дуртай охин байсан. Тэгээд 2005 онд дүүргийн аварга шалгаруулах дугуйн тэмцээнд оролцож, анхны алтан медалиа хүртсэн. Тэр үеэс хойш эргэлт буцалтгүй дугуйн спортод орсон. Одоо хүртэл дугуйгаар уралдсаар л байна даа.

 -Дугуй техникийн спорт тийм болохоор тамирчны бэлтгэл сургуулилалтаас гадна дугуйны бүрэн бүтэн байдал нь амжилтад нөлөөлнө биз?

    -Тэгэлгүй яах вэ. Дугуйн спорт өртөг өндөртэй. Улсаас дугуйн хангалт байдаггүй учраас хувиасаа хөрөнгө, мөнгө гаргах нь чанга, хүндрэлтэй байдаг. Аль болох л чадлаараа сайныг нь худалдан авч, орчин үетэйгээ хөл нийлүүлэн, ойртуулах хэмжээний дугуй авахыг боддог.  Боломжийн дугуй, сайн туслах хэрэгсэл, материал бэлтгэхийг хичээдэг.

-Уралдааны замд дугуйн хөнгөн эвдрэл гэмтэл гарвал өөрөө засдаг уу?

   -Уралдааны замд дугуйн эвдрэл, гэмтэл гарах нь эмэгтэй тамирчдын хувьд хүнд хэцүү асуудал байдаг.

-Дугуйн ямар төрөл, зайд уралддаг вэ?

    -Манай улсад эмэгтэй тамирчид цөөхөн бий. Тийм болохоор бүх л зай, төрөлд нь уралддаг даа. Ганцаарчилсан, багийн, бөөн болон цуваа гараатай уралдаан, уулын дугуй гээд л бүх төрөл ангилалд уралдаж байгаа.

-Дугуйн спортоор хичээллэсэн үеэс хойших томоохон амжилтаасаа сонирхуулахгүй юу?

     -Монгол Улсын 11 удаагийн аварга болсон. Монголыг бүх ард түмний спартакиад их наадамд 2012, 2016, 2022 онд дараалан гурван удаа түрүүлж, аваргын алтан медаль хүртсэн байгаа. 2022 онд Азийн аварга шалгаруулах тэмцээний цуваа гараатай уралдаанаас хүрэл медаль ,бөөн гараатай уралдаанд шагналт  зургадугаар байрт шалгарч байлаа.  2008, 2011, 2014, 2015, 2016, 2017, 2021, 2022 онд дугуйн спортын  “Шилдэг эмэгтэй тамирчин”-аар шалгарч байсан. 2022 онд Ерөнхийлөгчийн “Хүндэт медаль”-аар шагнуулсан.

-Одоо ямар клуб, нийгэмлэгт бэлтгэл, сургуулилалтаа хийж байгаа вэ?

         -Батлан хамгаалах яамны харьяа “Алдар” спорт хорооны тамирчин. Дугуйн спортын ОУХМ цолтой. Дугуйн спорт эмэгтэй хүнд спорт хэдий ч гоо зүй, биеийн галбирыг жигд хөгжүүлдэг.  Мөн техниктэй харьцах чадварт сургадаг. Хотын их түгжрэлд бензин тос гэхгүй машинаар нэг цаг явах газар, дугуйгаар 15 минут явах жишээний давуу талууд бий. Дугуй унах нь эрүүл чийрэг бие, бялдартай, сэтгэл санааны хувьд маш их эрч хүчийг олж авах үндэс болно. Дугуйн унах олон сайхан давуу талууд байдаг. Тийм болохоор амьдралын минь салшгүй нэг хэсэг дугуйн спорт яах аргагүй мөн. Би дугуй спортоор 19 дэх жилдээ тууштай хичээлэж байгаа даа баяртай байдаг.